Hmathlir leh rawtna nei, tute tan pawh Sorkarah rawtna a thlen theih a, sorkarin a dawngsawng thei reng a ni.-Pu Tawnluia, Dy. Chief Minister

Vawiin ni 5, October 2023, Ningani hian Aizawl Smart City Ltd. buatsaihin MINECO Junction-ah Khuallian niin Dy. Chief Minister Pu Tawnluia chuan Urban Landscape and Avenue Plantation at MINECO lungphum a phum a, ZMC leh Aizawl Civil Hospital hnenah 5G/Smart Ambulance hlanin, hemi rual hian Kangthelhna hmanrua YMA Branch hrang hrang hnenah a hlan bawk.

Hemi hnu hian MRB Conference Hall, MINECO-ah hun hman chhunzawm a ni a, hetah hian khuallian chuan thusawiin, Hmathlir thui tak nei a, hnathawh kawngah tan kan lak zel a pawimawh a, Hmathlir leh rawtna nei, tute tan pawh Sorkarah a thlen theih a, sorkarin a dawngsawng thei reng a, kan ram hi a neitu theuh kan nih angin tupawhin thurawn leh rawtna an neih ang angte inthlahrung lova thlenin, Sorkarin a dawngsawng thei a, lawm takin a hmang tangkai thei reng a ni, a ti a. Mipuite hi sorkar neitu kan nih angin sorkar hi kan ta neih vek a tul a ni, a ti bawk.

Pu Tawna chuan, Smart City Mission hnuaiah State tinte vbc 500 theuh min pe a, chumi hmanga hnathawh tura duan chu thawh zel a ni a, hripui avanga thawh chak tawkloh tamtak awm avangin nakum June thlengin central lamin min pawhsei sak a, hun tiam chhunga zo hman turin theihtawp chhuah a ni. Kan hmalakna ah hriselna lam hawi leh kangmei ven kawngah te tangkai turte pawh thawh a ni a, PWD nen pawh khawpui changkanna turin nasa taka thawh ho zel a ni. Tlawmngai pawlte nen pawh inpawh takin thawhho a ni a, hemi kawnga nasa taka min thawhpuitu CYMA chungah pawh lawmthu ka sawi a ni, a ti.

Office dawrtu mipui leh Office hnathawkte tan pawha chawlh hahdamna tur leh tuallenna tur MINECO ah siam a ni tur leh a lunghum phum a ni ta chu hi a lawmawm em em a, khawpui tihmasawntu leh mipui tana hmuh hahdam leh chawlhna hmun nuam a nih ngei ka beisei a ti. Hun hmanhmawha hman tura 5G/Smart Ambulance ZMC leh Aizawl Civil Hospital ah pek a ni chu damlo tan malsawmna a ni ngei dawn a, Hospital dang 5 ah pek an ni leh zel turte hi thil lawmawm tak a.ni. A dawngtu Pvt. Hospital te pawhin mipui tana mantlawm zawka hman theih tura an hman tangkai ngei beisei a ni.

Kum tinin kangmei a chhuak thin a, In kang chauh ni lovin, ram pawh a kang fo mai a, hemi venna leh thelhna tur hmanrua tlawmngaia thawk thintu YMA hnena pek a ni thei pawh hi a lawmawmin, Fire Dept.hnenah Kangthelh Motor pek belh a ni dawn bawk a. Hei hian thawktute tha a tihchak lehzual kan beisei a ni, a ti bawk.

Dy. Chief Minister chuan, Sports lamah pawh khawpui thalai tan hmalain, khelmual tha tak din turin hmun 6-ah hmalak mek a ni a. Zuangtuiah Badminton Court 6 awm theihna tur Indoor Stadium sak mek a ni a, zirna lamah pawh zirlairte tihmasawn turin Smart Classroom din kawngah hmalain, library tihchangtlunna tur pawhin hma lak mek a ni. Power lamah an hruizam hnawk tamtak te, felfai zawka siamrem tur te, khawlai tieng nuam zawk tura Solar Light hmangin hmalak a ni a. Bawlhhlawh sawngbawl kawngah pawh chak taka thawh mek a ni a, mipui tana tawp leh rimchhia, hnawm te pawh tihral theih tiral a, hmannawn theih hmannawn tura siamchhuah kawngah te pawh theihtawp chhuah a ni.

Hmuh theiha Smart City hmalakna lo lang zel hi a lawmawm takzet a, a chhawrtu pawh mipui an ni zel a. Central atanga Fund kan hmu thei te a lawmawmin, heng hmanga tha tak leh chak taka hna thawh theih a ni hi a a lawmawm em em a ni. Thawktu zawng zawngte inpekna leh thawhrimna ah lawmthu ka sawi tak meuh a ni, a ti bawk.

He hun hi Pu Lalmalsawma, Secretary, UD&PA chuan kaihruaiin, inlawmna thuva sawi a, hmalakna report Pu CC. Lalchuangkima ,CEO, ASCL hnen atangin ngaihthlak a ni a. Dr. Lalmalsawmi Sailo, Director, H&ME Deptt., Pu Zosangliana, Director, F&ES Dept.,Pu R. Lalngheta, Prrsident, CYMA ten thu an sawi a, Pu V. Vanlalruata, Dy. CEO, ASCL in lawmthu sawiin hun a khar a ni.

Sd/-

(PETER CHHANGTE)

Secretary

Media & Publicity Deptt.

Mizo National Front

Memo No.MNF/Media/04/2023/869

Dt.5.10.2023