Mizo National Front
General Headquarters
Mizoram : Aizawl

Press Release

SORKAR THAR HI ENCHHIN TIIN PARTY DANGIN VOTE PUI NASA

– K.Laldawngliana, MLA

Vawiin February ni 2, 2024 (Zirtawpni) hian Mizo Hnam Runah chhung inkhawm neih a ni a, hun hnihhnaah Pu K.Laldawngliana, MLA chuan dik tak leh rinawm tak, lawm chunga Lalpa leh kan ram rawngbawl tur hian ka theihna zawng zawngin ka rawn pen chhuak ve a, kei mi tlinglo leh fel lo tak hi Tuirial bial mipuiten chung lam remruatna ka tan a tihhlawhtlinna turin chanvo min pe ve a, lawmawm ka ti hle. MNF chu Hnam thuthlung kengtu a niin, martar-te thisena din, Mizo tawh phawt awmna tur a niin ka hria. Kan ram hi tluchhe vek, politician leh sorkar hnathawk zawng zawngte corrupt em em veka tuten emaw an puh hi chu thil diklo tak a ni tih ka sawi duh, a ti.

Tuna ZPM sorkar hi Pathian remruatah pawm theuh ang u. Congress tello leh MNF tello sorkar tiin an inzuar a,Congress leh party dang atanga bang chuang si lo te, party hrang hrang khan enchhin tiin an vote pui nasa hle a ni tih kan hria. Kan lo enchhin zel dawn a, a la reilo em a, sawisel leh puhmawh vak hun a la ni lo. A tak taka kalphung thar a awm leh awm loh chu Assembly Session hmasa berah kan la hmu dawn chauh a. Hman ni Assembly Session-ah khan opposition leh rulling bial kan thliar lovang an tih kha a lawmawm hle a, kan lo thlir zel ang a, kan tawngtai pui zel ang a, an sawi anga an awm loh erawh chuan kan nawr nek mai dawn a ni. Intodelna tura kalphung thar hi eng tak ni maw? beiseina sang tak nen mipuiin an thlir a. Chief Minister Adviser an dah teuh maite hi inrenchemna tura kalphung thar tha nge kan lo thlir zel dawn a, sorkar thar hi tha taka ke pen zel turin duhsakna ka hlan a ni, a ti.

Thusawitu dang Dr.ZR.Thiamsanga Ex-MLA pawhin MNF hi Pathianin mei mit lovin kum 60 chuang min kaihruai tawh a, kum 20 chuan ram leh hnam tana ram mu tawh a. Covid kha sawi ninawm tawh hle mahse, kan sorkar kha COVID in nasa takin min nuai a, kan sum neih chhun ang ang kha kan dam nan kan hmang a, a hun laite ngaihtuah chuan kan hre vek a, chhuanlam tlak anihzia chu kan la hre vek a ni. Covid a reh a, kum khat awrh hna kan thawk dawn a, inthlan a lo ni leh ta mai a. Ramri chungchangah lah MNF sorkar kha sawisel bo a ni. Kan thenawm uanute raltlan thlengin theihtawpin kan tuam hlawm a, a dang harsatna zawng zawng pawh mipuiin an hria. Department hrang hranga kan hnathawh that zawng zawngte kha he kalphung thar sorkar inti hian chhunzawm ngei se kan duh a ni. Sorkar thar hi thil tha an tihnaah chuan kan thlawp zel dawn a, an tihdik loah chuan nasa takin kan do tlat ang, a ti bawk.

Inkhawm hi Pu HB.Lianmunga, Adviser, MNF General Headquarters chuan kaihruaiin, Pi K.Remthangi, Adviser MNF Gen.Hqrs.chuan hunserh a hmang.

Pu C.Manliana, General Secretary chuan zin report a pe bawk.

Sd/-

(R.LALHMANGAIHA)
Secretary
Media & Publicity Deptt
Mizo National Front
Memo No.15/2024
Dt.02.02.2024