Mizo National Front
General Headquarters
Mizoram : Aizawl
Press Release
SORKAR TERM TAWP DAWN THLENGIN RAM TANA ROTLING, THIL LIAN TAK TAK A LO THLENG – Dr.R.Lalthangliana, Minister
Vawiin May ni 13, 2023 (Inrinni) zingkar hian Health Minister, Dr.R.Lalthangliana chuan District Hospital Serchhip a tlawh a. Ward hrang hrang mamawh leh dinhmunte a enfiah nghal. Minister chuan covid-in kum hnih chuang min tibuai chung pawhin Pu Zoramthanga kaihhruai sorkar hian hna tam tak an thawh thu sawiin, sorkar term tawp dawn thlengin ram tana rotling thil lian tak tak a lo thlen thu leh hna ropui tak tak an thawh thu a sawi.
Serchhip District Hospital thar cheng nuai 2000 senga sakna tur hmun hma leh sak dan turte a enfiah nghal a, he building sakna senso tur hi Power Grid Corporation of India atanga hmuh tur a ni. Minister chuan District Hospital thar sa tur hian thil tam tak chinfel hmasak ngai a awm thu te, tuna building hlui hi lo thiat ta i la, khawiah nge damlo enkawl mekte tha taka lo enkawl lailawkna tur ngaihtuah hmasak a tul thu a sawi a. Eng pawh nise, tha taka an sak theih tur thusawiin, Serchhip khawpui mai ni lo, Serchhip District khaw hrang hrangten Hospital changtlung leh tha tak an neih tur chu a lawmpui thu a sawi.
Vawiin hian Dr.R.Lalthangliana Minister hian Hnahthial DC office thar tur Rallang tlanga PWD hnuai atanga cheng nuai 1000 senga sak mek chu tlawhin DC room, Adl.DC.room, library room, revenue section, strong room, SDO (Sadar) room, SO room sak mete chu sa tha a tih thu a sawi a, kumin August thla chhung ngeia luah hman a, hawn theih turin thawktute a chah.
Hnahthial District Hospital thar cheng nuai 1700 senga khum 50 awm theihna tur sak mek pawh tlawhin a hmun hma a enfiah nghal a. He Hospital hi Hnahthial khawpui leh a chhehvel khaw hrang hrangten an chhawr tangkai tur anih avangin lawmawm a tih thu a sawi bawk
Hnahthial Circuit House sak tur enfiahin a tlawh leh nghal bawk a. Minister chuan Hnahthial IB hi a sakna a rei tawhin a awngrawp tawh hle a, rualawh a na em em a, tunah he lai hmuna VIP-te thlenga thlenna hmun tha tak kan nei tur hi a lawmawm hle a ni, a ti.
Vawiin chawhnu hian Hnahthial bialtu MLA, Dr.R.Lalthangliana hian Hnahthial District Inter Branch YMA, Valley Ball Tournament Final chu khuallian niin, a kharna hun a hmanpui nghal a ni. Mipaah Buaipui H leh Thiltlang, hmeichhiaah Lungleng leh Tuipui D-ten final an khel a ni.
Minister hi MNF party hruaitu te, E-in-C, PWD; Chief Architect PWD; CE PWD, (Building); CE PWD (road); Director, DHME, Sr.EE H & FW leh Health department hotuten an tawiawm a. Hnahthial SP, Adl.DC.leh official hrang hrangin an lo dawngsawng a ni.
Sd/-
(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/702
Dt.13.05.2023