Mizo National Front
General Headquarters
Mizoram : Aizawl
Press Release
SORKAR KAL TAWH LEH SORKAR LAI BEIH RINGAWT, THIL THA TIH SAWI DUH LO, MIZORAM CHHE LAILET ANGA SAWI THIN HI KALPHUNG THAR ZUARTUTE KAL DAN :
-Dr.R.Lalthangliana
Dr.R.Lalthangliana, MNF Adviser chuan vawiin March ni 27, 2023 (Thawhtanni) hian LMC campaign vawrhtawp beihpui thlakin ward hrang hrang tlawhin thu a sawi a. Venghlun leh Salem Lunglawn campaign office-te a tlawh leh bawk.
Heng hmunah hian Dr.R.Lalthangliana chuan LMC campaign naah hian mimal ang leh a party ang pawhin na deuh deuh leh dawt phuahchawp hmang te, tawngkam mawilo taka MNF campaigner-ten party dangte bei ve chiam chiam lo turin a chah. ‘Pathian leh kan ram tan’ titu kan nih angin, Lunglei mipui tan MNF sorkar hmasain LMC a dinah hian state sorkar nen, rorellai MLA-te leh LMC member tharte nen inlaichinna tha tak neia Lunglei khawpui nasa taka tihhmasawn dan tur chu mipui hnenah hrilhfiah zawk thin turin a chah.
Sorkarna la chelh ve ngai reng reng lo, sorkar kalphung leh ram hruai dan pawh la tem chhin ve ngai loten Congress, PC leh MNF sorkar kal tawh leh sorkar lai beih ringawt, an thil tih that lai sawi duh si lo, a chhe lai ringawt sawi reng mai. Mizoram hi chhe lai let der anga sawi a, a beidawng zawng hlira mipuiah zirtirna pea kalphung thar zuartute kal dan chu tha a tih loh thu a sawi. Budget pawh la khawih ve ngai reng reng loten LMC lo piang tur thil lian tham hi kalpui ngaihna an hriat loh tur thu sawiin, MNF LMC a pian chuan model LMC an din dawn tih a sawi bawk.
“SEDP pawh tuna kan inpek dan hi kan tum lawk dan a ni lo, a bei tham kan ti. Mahse, sawi tawh thin angin tu sorkar mahin a tawrh ve loh covid-in hun rei tak min nuai a. Kumin ral se, sorkar tharah chuan awmze nei takin SEDP pawh kan kalpui dawn. Department hrang hrangah post ruak a tam a, hripui vang bawkin hna thar kan la thei rih lo. Hetiang hi khawvel sorkar ropui tak tak leh India sorkar pawhin a tuar vek a. Mizoram ang em ema party thenkhatten covid awm lo ang maia sorkar an beih a awm ve ngai lo,” a ti.
Dr.R.Lalthangliana chuan, “Lunglei mipuiin kum 20 tel Tlumtea thlira an thlir, MZU Southern Campus hi kum 2020 January-ah Higher Technical Minister ka nih angin USA ka zin haw pahin sanction kan hmu ta a. CM pawhin theihtawp a chhuah bawk. A hmun hma zawng zawng tihfel a ni a. DPR pawh engkim kan siam diam a, a thawktu tur lak leh building sak turte pawh Central-in covid nghawng avangin min pe thei rih lo a, hmannia Delhi ka zu kal khan ka nawr nawn leh a, a la fel thuai ang,” a ti. Lunglei by-pass road atan cheng vaibelchhe tam tak ruahmanna an siam tawh thu leh, NHIDCL hnenah tender pek tawh niin MoRTH chuan DPR a chhuah tawh chu a sawi nawn leh a. Tui lama harsatna lian tak awm thin sutkian nan tui in tur thianghlim Lunglei mipuiten an neih theih nan project lian tak an siam tawh thu a sawi bawk.
Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/04/2023/634
Dt 27.03.2023