Mizo National Front
General Headquarters
Mizoram : Aizawl

Press Release

SEDP Pilot Project zinga Dragon Fruit hlawhtlinna hian, sorkar a chawimawi a, sorkarin a market a ngaihtuahpui zel dawn – Prof.F. Lalnunmawia MLA,Vice Chairman, Horticulture Development Board

November ni 9, 2022 (Thawhlehni) khan, Thenzawl Dragon Fruit
Grower’s & Marketing Society chuan General Assembly hmasa ber an nei a. Prof. F Lalnunmawia MLA, Vice Chairman, Horticulture Development Board chuan Khuallian niin a hman pui.

Prof. F Lalnunmawia chuan thu sawiin, “MNF Ministry Flagship Programme SEDP pilot project zinga Dragon Fruit hlawhtlinna hian sorkar a chawimawi a, sorkar pawhin a market a ngaihtuah zel dawn a ni, “a ti. SEDP bulṭanna atan Mizoram hmun hrang hrangah, Thlai chi hrang hrang hmangin kum 2019 aṭang khan Pilot Project kalpui ṭan a ni a. Chung zingah chuan Thenzawl ram Pukpui Zâu, Tuiripup Zâu, Kawipui Zâu leh Mualvum Zâu-ahte hian Dragon Fruit chinna turin ruahmanna siam a ni a. Heng zâu-a hmalaknate hi a tirtê aṭanga sorkarin a hriatpui bakah a theih ang angin bul a tanpui a. Chief Minister leh Horticulture Department Minister ni bawk Pu Zoramthanga chuan, Cooperative Society anga hmalakna hi a tuipuiin, a phurpui hle a. SEDP Pilot Project kum 2 lekah a rah seng tur a awm ṭan ta hi a lawmawm takzet a ni. Kan sorkarin kuthnathawktute dawmkanna tura flagship programme a ruahman SEDP hlawhtlinna kan hmu chho mek a zel a. Chief Minister, Horticulture Deptt. changtu kaihhruaina hnuaiah SEDP leh MIDH sum hmangin District dangah pawh Dragonfruit chin belh mek zel a ni a, kan tharchhuah pawh a pung zel a, a hralhna pawh sorkarin a ngaihtuah zel dawn a ni,” a ti.

Pu Mawitea chuan, “Kuthnathawktute’n a huhoa hmala a Society-te dina awmze nei zawka thei leh thlai chin an uar chho mek a, Tomato, Lakhuihthei bakah thlai (vegetable) chi hrang hrang kan thar tam tial tial a ni. Hetianga Society hma la ṭhate hi, sorkar tan pawh puih an phurawm em em a ni. Family Oriented-in SEDP pawh kalpui chhoh ṭan a lo ni ta zel a. Kuthnathawktute Tapchhakzawl thleng phak SEDP beneficiery-te hnenah MNF Ministry chuan a ṭul ang zelin sum pawh a pe chhunzawm zel dawn a. Thihna/Hripui leng vangin duhthusam a bul kan ṭan ṭha thei lo kha, pawi ka ti hle a. Tunah chuan hripui pawhin min kiansan chho mek zel a. Malsawm kum a herchhuak dawn ta a. SEDP atana vawiin a kan la thlan lohte pawh, a tahtawlin beneficiary thlan an la ni zel dawn a. SEDP dawngtu zawng zawngin hlawhtlinna an chan ngei theih nan, taimakna leh tumruhna nen a hmala zel turin, duhsakna ka hlan vek bawk a ni” a ti. Dragon Fruit chingtute chu, lungrual taka ṭan la sauh sauh turin a fuih bawk.

Thenzawl rama Dragon Fruit chinna atan hian sorkar Scheme hrang hrang FOCUS, MIDH leh SEDP aṭanga tanpuina pek a ni a. A panna kawng hi SEDP sum ₹ Nuai 80 zet senga laih a ni bawk.

Thenzawl Dragonfruit
Grower & Marketing Society-te hian kum 2020 June thla aṭanga hma la ṭanin, tunah hian chhungkaw 54 zetin hma la chho mek zelin, kumthar lamah chhungkaw engemaw zat luh belh tir turin Horticulture Department chuan ruahmanna a siam chho mek a.
Zau pali Pukpui, Mualvum, Tuiripup leh Kawipui zauah hian, Unit 118-ah Dragon Fruit ban 23600 chuang zet awmin, Unit tinah hian Ban (post) 200 zel a awm a. Collapsible Water Tank lian tak tak 13 zet siam a ni bawk a. Drip hmanga tuipekna tur pawh kalpui ṭan mek a ni bawk. Kum thar aṭang chuan Ban tinah hian Kg 10 tharchhuak thei tura an beisei thu leh, chumi aṭang chuan wholesale rate, a chhe berah Kg khat ₹ 130 anga chhut pawhin, ₹ 35,00,000 chuang man hralhchhuah tur an neih ngei an inrin thu, TDGMS Chairman Pu C Lalrinthanga chuan a sawi.

He hun hi Serchhip Horticulture Department DHO Pu Lalrintluanga leh a thawhpui te, Mizoram Dragon Fruit Grower’s Society hruaitute leh, Horticulture Development Member leh Mizo Hnam Run lam aṭangin hruaitute ṭhenkhatin an ṭawiawm bawk a ni.

Sd/-

(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/03/2022/550
Dt. 9.11.2022