Mizo National Front
General Headquarters
Mizoram : Aizawl
PRESS RELEASE
Sawrkar tanpuinaa innghat mai lova, hlawhtlin duhna thinlung pua, mahni tha leh zung seng duh an awm ta zel hi a lawmawm hle a ni. -Pu C. Lalrinsanga, Minister.
Vawiin ni 21 July, 2022 Ningani hian Zonun Enterprise, Silaimual ah, Agriculture department buatsaihin, Agricultural Machineries and Under Sub-Mission on Agricultural Mechanisation (SMAM) hnuaia kuthnathawk tute hnena semchhuah tur Tractor leh khawl dangte flag off program hman a ni a. Pu C. Lalrinsanga, Minister, Agriculture etc. chuan he hun hi hmanpuiin, “Sawrkar tanpuina beisei miahlo a, intodelh duhna avanga tha leh zung tamtak seng duh an awm ta zel hi a lawmawm hle a ni, ” a ti.
Agriculture Minister chuan, “Leilehna atan chauha hmantur nilo, fu leh thlai dang herna tur hmanraw changkang zawk nei tura hmalak mek a ni a. Buh phun leh sengna khawl pawh chah thlen tawh niin, enchhin a, a tul ang zela neih belh dan dap mek a ni. Central Minister te nena kan innel pawhna a zarah tluang tak leh chak takin hma kan sawn zel a. Digital Agriculture Mission hnuaiah Agriculture lama hmasawnna tam zawk leh changtlung zawk, hmanraw changkang zawk a lo chhuak dawn a. Digital market system hmangin thlaithar tam zawk tihralna kawngah hmalak a ni ang,” a ti.
Pu Sangtea chuan, hun hmasa lamah intawm tura semchhuah Tractor leh khawl thenkhat, mimal ta emaw ti an awm thin a. Hei hi dan kalh anih avangin kan remti ve lo a ni, a ti. Tun sawrkarah hian, power tiller sang chuang semchhuah a ni tawh a, leilet zawl zau tawk tak siam tawh a ni a. Ram changkang leh hmasawn zawkte dinchhuahna chu leilung behchhana lo thleng a ni tlangpui a, keini pawhin kan dinchhuah ve na turin theihtawp kan chhuah zel tur a ni, a ti bawk.
He hunah hian Tractor/khawl dang 25 kuthnathawktu intelkhawmte hnenah semchhuah a ni a. Semchhuah leh zel tura ruahhman a ni. Farmer zau khat enkawl tute hnenah, an intawm tlan atana semchhuah a ni.
Kut hnathawktute hnena Tractor leh khawl dangte semchhuah vailiamna hun hi Pu J. Hmingthanmawia IAS, Secretary Agriculture department chuan a kaihruai a, Pu James Lalsiamliana Director, Agriculture department hnen atangin technical report ngaihthlak a ni a. Agriculture board member leh mi pawimawh tak tak ten an hmanpui a. Pu James Vanlalluaia, Addl Director, Agriculture department chuan lawmthu sawiin he hun hi a tin a ni.
Sd/-
PETER CHHANGTE
Joint Secretary
Media & Publicity Dept.
Mizo National Front
Memo No.MNF/Media/03/2022/472
Dt.21.07.2022