Mizo National Front
General Headquarters
Mizoram : Aizawl
Press Release
REMNA LEH MUANNA HI RAM CHANGKANG A PIANGIN AN NGAI HLU- Dr.R.LALTHANGLIANA
Vawiin June ni 30, 2022 (Ningani) hian Parish Hall, Kolasib-ah ‘Remna Ni vawi 36-na’ lawmna hun hman a ni a. He hun hmanpuitu MNF Adviser, Dr.R.Lalthangliana chuan vawiin remna ni hi ram leh hnam inhmangaih tawnna thar ni se a duh thu a sawi a. District hrang hrangah Minister-ten an hmang a, kan Chief Minister pawhin a hmanna pui ber Aizawlah a hmanpui thu a sawi. Remna leh muanna hi ram changkang a piangin an ngai hlu a, keini pawhin remna hi kan ngaih hlut zel a tul a ni, remna leh muanna kan neih theihna tura sulsutu zawng zawngte kha an hluin an zahawm takzet a, nang leh kei avangin an rammu a, an martar tih hi theihnghilh ngai lo ang u. Peace Accord sign ni champhaah hian kan ram leh hnam tana inpete i hlut thar zual zel ang u. Mizote khawvel hnam zahawma min phochhuaktu Pu Laldenga hi kan chawimawi a, chibai kan buk thar leh a ni. Vawiin hian Mizote hi indem hman kan ni lo a, inhmangaihtawnna nen ram leh hnam tan i tang tlang zel ang u, a ti a. Remna ni atana thuchah a ziah urhsun tak chu a chhiar chhuak a ni.
Health Minister Dr.R.Lalthangliana chuan thla hmasa khan Gujarat-ah india ram pum Health Minister Conference an neih thu sawiin, kha tah khan helai bial hi India ram pumah hriselna lama Mizoram tihmingthatu an ni a, Health lama inenkawlna a that avangin thih tlemna ber District an nih thu a sawi. Mizoram chu India ramah a mi cheng tam dana chhutin a test tha ber, positive neih atanga a thi tlem ber kan nih thu sawiin, mi 1000 zela nausen kum khat hnuai lam pang thihna (IMR) tlem ber kan nih thu a sawi. “Kolasib District hi MLA bial dang zawng aia sulsutu in nihna lai a tam a, ramri buai leh eibar lakna kawngah Mizoram kawt chhuah in ni a. Rail Head awmna District in ni bawk a, covid hluar lai pawha paltlang nasat ber District in ni. Tuna bialtu MLA leh Minister in neihte hian hma an la nasa a, an fakawm ka ti em em a, a mipui hrim hrim hmalakna hi inchhuanawm takzet a ni. He laiah hian cheng nuai 2000 senga sak tur District Hospital bul pawh kan tan thei ta a ni. Kolasib District hi in vannei bik a, in PHC leh Sub-Centre te hi kan upgrade vek tawh a ni,” a ti bawk.
“Covid khan khawvel, India leh Mizoram chu kum hnih chuang zet min nuai a, beisei loh lamah sum sen a ngai nasa hle a, sorkarin duhthusamin hma kan la thei lo. Covid awm hma Health Minister ka nih hlim khan Health department-a thawktu indaihlo zuaipui post 734 lak nan Chief Minister zahawm tak hovin cheng vbc 50 kan dah a. Mahse, covid lo awm tak avangin hma kan la chhunzawm thei lo. Mi sorkar laiin covid a leng lo a, ramri a buai ve vak lo hek lo. Kan sorkarah chuan vawk hri pulh hri a leng a, myanmar raltlan kan dawnsawn a ngai a, lirnghing kan tuar reng bawk. Mi dang sorkar laia an tawn loh harsatna tam tak kan hmachhawn a. Heti chungin Pathian malsawmna kan dawng nasa hle a ni,” Health Minister chuan a ti.
Sorkar hlimah Civil Hospital-ah ICU 5 chiah a awm thu sawiin, tunah chuan naupang ICU-te nen 35 lai a awm tawh tih a sawi a. ZMC-ah ICU 13 chiah awm thin kha, tunah chuan naupang ICU nen 60-70 kan nei ta. Khum 170 awm kha 300 chuang a ni ta bawk. Zemabawkah Cancer speciallity hospital, India ramah pawh zahpuiawm loh tak tur Japan nen tangrualin cheng nuai 6600 senga din tur kan hlawhtling a, bul kan tan ta a, hmalakna a len tham em avangin a thawh zawh hun chu kum 2028 daih a ni ang, Dr.R.Lalthangliana chuan a ti bawk.
He hun hi Pu John L.T Sanga, Deputy Commissioner Kolasib chuan a kaihruai a ni. Khuallian hi MNF General Headquarters leh Kolasib MNF Block atangin hruaitu engemaw zatin an tawiawm a ni.
Sd/-
R.LALHMANGAIHA
Secretary
Media & Publicity Dept.
Mizo National Front
Memo No.MNF/Media/03/2022/445
Dt.30.06.2022