Mizo National Front
General Headquarters
Mizoram : Aizawl

PRESS RELEASE

REMNA HI INREM LOH VANGA SIAM A NI; KAN INREMNA HI REMNA TLUANTLING A NI: MNF Vice President

“Pu Duhoma hi khaw te lo hal ang deuh a nia; MBJP President hi lungpui chunga nghavawk theihnghilh ang a ni”

Vawiin June ni 30, 2023 Zirtawpni hian Tlungvel MNF Joint Unit huaihawtin ‘Remna Ni Vawi 37-na’ lawmna Tlungvel Govt High School-ah neih a ni a. Khuallian MNF Vice President Pu Lalthlengliana chuan mi thar 120 MNF-ah lawmlutin Remna Ni thuchah a sawi a, MNF leh India inremna chu remna tluantling a ni, a ti.

“Remna hi inrem loh avanga siam a ni. Kan hnam sipaiten silai an tung a, kan martar tam takte nunna avangin remna a lo awm a. MNF dan buah pawh democracy, socialism, kan sakhaw humhumna, zo hnahthlak inpumkhatna etc. kan dah thlap a ni,” a ti.

Pu Lalthlengliana chuan: “Independence kan neih theih nan kan thalaiten nunna an hlan a. India sorkarin ralthuam tha ber nen ralpui sualin min sual a. Kan hnam martarten ‘Zoram dam reng rawh se’ tia ban pharin khawvel an chhuahsan laiin kohhran mai ni lo, Zoram mipui zawng zawngin kan tlin ta lo, tiin London-a awm Pu Laldenga chu inphahhniam turin an dawr a. Ani chuan, ‘Kan beihsak mipuiten in tlin si lovah chuan,’ a lo ti a. India nen inbiakna neih zui a ni.

“Mi thenkhatin MNF chu in-surrender angin an sawi thin. Surrender chu inpe tihna ni a, inbiak a ngai tawh lo. He (MNF leh India) inremna hi chu kum 20 chhung rambuaia inbiakna neih rahchhuah a ni a, inremna tluantling a ni.

“Article 371G a lo pian phah a. He miin a ken tel chu kan ram/ro inhlanchhawn kawngah te, kan sakhaw himnaahte Mizoram sorkar thu lovin a tihdanglam theih loh,” a ti.

MNF Vice President chuan: “Kum 30 vel chauhah Mizote chu India ramah pawh hnam ropui leh hnam pawimawh kan ni ta der mai. Sorkar kal tawhten engmah ti lo ang maia an sawi thin hi – tunah chuan hmasawwna hi a takin a lo thleng mek a. India rama state hmasawn ber pawl kan ni.

“Hetih lai hian kum za tam liamtaa lo awm tawh ram leh hnam changkang tak takte intehkhina min bei thin hi chu thil dik lo a ni.”

Pu Thlenga chuan: “Kan Pathian engkim hretuin hripui leng tur, raltlan tur te, ramri buai turte a hre vek a. Hetih hun atan MNF hi he ram enkawl tur hian a dah a ni,” a ti a. “Heng karah hian party awmna nghet lo neite kutah dah chi a ni lo. Pu Duhoma hi khaw te lo hal ang deuh a nia, a tirah a khu ve luai a, a tukah a reh leh vek zel. Tunah hian pawl sawmnaah a thu mek a ni.

“MNF-a a awm lai khan hling zinga awm ang kan ni a, kan buai char char a. Zoram tibuai hrim hrim tura setana bel ruat niawm a ni. Hetianga politics khel thin, bum hmang hi zui tawh lo turin ka sawm che u a ni,” tiin kalkhawmte a ngen.

Mizoram BJP chungchang sawiin, “An president hi lungpui chunga nghavawk theihnghilh ang chauh a ni,” tiin, “Nghavawkte chu an tal phurh a, an thi daih zel,” a ti bawk.

“Congress pawh zu zuar sorkar leh vai pathian chibai buk an ni a, an sorkar dawn lo. That loh theih lohna bawm an siam hi tak tak a nih chuan kum 20 hnuah an ding chhuak mahna,” tiin MNF Vice President chuan party mipui pungkhawmte chu rinawm taka ding nghet tlat turin a chah a ni.

Tlungvela Remna Ni lawmna inkhawm hi Pu C. Zodingliana, Chairman MNF Jt. Unit-in a kaihruai a. Kalkhawmte lawmna thu Pu R. Lalhanzama, VC Member-in a sawi a. Upa PC Zohmingliana’n hunserh a hmang a. MNF Gen Hqrs atangin Pu LT Kima Fanai, GS pawhin thu a sawi a. Upa K. Lalhluna, Treasurer Tuikum Block chuan tawngtainain hun a khar a ni.

Tlungvela Remna Ni hmannaah Tuikum bial party mite leh MNF Gen Hqrs. hruaitu thahnem tak an tel a ni.

Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/757
Dt. 30.06.2023