Mizo National Front
General Headquarters
Aizawl, Mizoram
Press Release
Remna hi Chapona tlang atanga neih theih a ni lo. -L. Thangmawia, MLA
Vawiin ni 30.6.2022 khan Pu L.Thangmawia, MLA chuan, Ngurlianthanga Hall Kawrthah khuaa REMNA NI puala hun hman chu hmanpuiin REMNA hi chapona tlang atanga neih theih a ni lo va, thuhnuairawlhna leh inngaihtlawmna atang chauh a chhuak thin a ni a. Zalenna suala lu chhum ban chhum huama chhuak hnam pasalthate inngaihtlawmna leh Mizo hnam an hmangaihna rah liau liau a ni a ti. Remna a awm theih nana kha tih hun laia nasa taka beitu chu Kohhran leh tlawmngai pawlte an ni a, an ni pawh he REMNA NI lo thlengah hian an lawm thar leh ngeia a rin thu a sawi bawk.
Kawrthah khua MNF sawrkarin Town a a puang ta chu a lawmpui thu sawiin, Hachhek bial chhung tho Kawrtethawveng pawh BDO thuthmun turin hmanni lawk khan tih fel a ni bawk a, Pu Zoramthanga kaihhruai MNF sawrkar hian Opposition bial nih vanga hrek lam aiin Ruling bial nena ang khat renga a enkawl thin zia a lang mek zel a, hei hi ram hmangaih tu tih dan tur dik tak a ni, a ti.
Pu Thangmawia chuan Kawrthah MNF party in Political training hun chawhnu lama an buatsaih hmanpui nghalin, MNF party chu Mizo te tana Pathian pek a nih thu a sawi a. Mizoram tana Political party ding chu tam tak awm tawh mahse MIZO HNAM tana ding chu MNF chiah a la nih thu a sawi a. MNF hi mi fel leh tha awmkhawm te ni lo mahse PATHIAN LEH RAM tana ding a nih avangin chung lam malsawmna pawh a dawng a. Mizoram leh India rama Party ding tawh tamtakin kum 20 chuang an daih zawh loh laiin MNF chuan Diamond Jubilee, kum 60-na, kum 2021 khan a thleng a, hei hi MNF memberte fel famkim vang lam ai mahin Pathian hruaina a ni a, chapona tur lam ni lovin Pathianin Mizo hnam dinchhuah nana mi fel leh tlawn tlai thate aia mi inngaitlawm, Chief Minister, Pu Zoramthanga a hruai dan lan chhuahna a ni a ti.
Zoram Politics ah pawh mi dangte duh khawp lo leh fel leh tha zawka in ngai tam tak awm thin mah se, thuthlunghlui huna Israel LAL tur an zawn laia Jesaia fate zinga LAL awm tak ni a an ngaihte aia beram vengtu Davida Pathianin a thlan dan kha thil chhinchhiah tlak tak a ni a, kan Pathian hian mi chapo, mi dangte hmu tling lo reng mai aiin mahni hnaa rinawmte a thlang fo zawk thin a ni, a ti.
Pu Thangmawia chuan malsawmna lam aiin tawrhna hi a hun laiin hreawm viau thin mahse thil ropui zawk a ni a. Tawrhna a nasat poh leh ropuina a lo thleng thin a. Hei hi ringtu hmasate history ah pawh a chiang viau a ni, a ti a. Malsawmna lamah chuan thiktu an tam thin a, tawrhna hi mi dangin min thik loh ber a ni thin a ni, a ti a. Chuvangin MNF member te chu Mizo hnam tana tawrh huam turin a chah a, Mizo hnam tana lo tuar tawhtu te zawng zawng he REMNA NI ah hian zahna chibai a buk thu a sawi nghal bawk a ni.
Programme hi Pu T.Rodinthara, MNF Unit II President-in a kaihruai a, Pastor Malsawmzuala, BCM in hunserh a hmang a ni. Chawhnu lam Political training hi Pu J.Lalnuntluanga, Kawrthah MNF Join unit Chairman in a kaihruai a ni.
Sd/-LALVENHIMA RALTE
Joint Secretary
Media & Publicity Dept.
Mizo National Front
Memo No. MNF/Media/03/2022/456
Dt. 30.06.2022