Mizo National Front
General Headquarters
Mizoram : Aizawl
PRESS RELEASE
Ram leh Hnam neitu thinlung pua hmalakna chuan rahtha a chhuah thin.
-Pu H. Rammawi, Adviser, MNF Gen.Hqrs.
Vawiin ni 15 July, 2022 (Zirtawpni) hian Mizo Hnamrun chhung inkhawm hun hnihnaah, Pu H. Rammawi, Ex Minister, Adviser, MNF Gen.Hqrs. Mizoram Planning Board Vice Chairman ni bawk chuan a hmanpui a. Thu sawiin,” MNF chu ram neitu thinlung pu chunga hma la thin party a ni a. A neitu thinlung pu chunga ramhruai hna thawk thinte zarah ram mipuiten hlawkna an tel thin a, ramin hma a sawn thin,” a ti.
Pu H.Rammawi chuan, “Mizoram hruaitu hmasaten theihtawp chhuahin ram hruai thatna leh ram humhimna an lo thawk thin a. Hruaitu hmasate hmalakna lian tham chhunzawm duhlo an awm thin. MNF erawh chuan, Pu Laldenga CM na hnuaiah, hruaitu hmasate hmalakna Bairabi Hydel Project pawh chhunzawmin, techno economic clearance pawh a hmu hman hial a. A hnuah Congress sorkarin a chhunzawm duhlo a ni. Pu Laldenga hmalaknain Airport siamna tur pawh bultan a ni a. Ram neitu thinlung putu, MNF sorkarin KMTTP chungchang pawh MNF sorkar, Pu Zoramthanga hmalaknaa bultan a ni a, MINECO leh hmun hrang hranga hmasawnna pawh kalpui zel a ni. Ram neitu thinlung pu a hmala thin, MNF sorkar hnuaiah Central sorkar rilremloh chung chungin raltlante pawh buaipui an ni,” a ti.
MNF Adviser chuan, “SEDP hnuaiah pilot project-ah chhungkaw 32756 hnenah bultanna pek tawh a ni a. Kumin chhungin, chhungkaw singruk chuangah, cheng 50000/- zela pek hman tuma hmalak mek a ni,” a ti a. MNF party hi vision neitha a ni a, kum 2020 atangin Aizawl khawpui chhungah ropeway siam tura hmalak a ni a, company-te nena inremna siam vek tawh niin, ground survey neih mek a nih thu a sawi. Budget-a sum hmuh tarlang kim duhloa MNF sorkar puhtu party-te hian, budget kalphung an hriatloh vang a ni a. Leiba chungchanga MNF sorkar puhtute hi sorkar ve ta se, leibatna tur zawnga virbuai nasa ber tur an ni ang, a ti bawk.
Chhung inkhawm hi Pu Lalzahawma Khiangte, Vice President, MNYF Hqrs. chuan a kaihruai a. Pu H.C Lalmalsawma Zasai, Dy. CEM, MADC hnen atangin, MADC inthlan thlirletna ngaihthlak a ni a, MNF Gen.Hqrs.lam hmalakna leh thawhrimna avanga thuneihna chang an ni thu report ngaihthlak a ni bawk. Pu Lalchhunga, Adviser, MNF Gen.Hqrs chuan hunserh a hmang a ni.
Sd/-PETER CHHANGTE
Joint Secretary
Media & Publicity Dept.
Mizo National Front
Memo No.MNF/Media/03/2022/470
Dt.15.07.2022