Mizo National Front
General Headquarters
Mizoram : Aizawl

Press Release

PU LALRUATKIMA’N RALTLANTE A TLAWH

An tawrhna chu kan tawrhna a ni a, an natna pawh kan natna a ni: Lalruatkima

Vawiin Dt 11.05.2023 hian Pu Lalruatkima, I&PR Minister, MNF Adviser ni bawk chuan Saitual Jail Quarter-a awm mek Manipur aṭanga raltlante a tlawh. Pu Ruatkima chuan he hunah hiaa thusaawiin, Zofa hmun hrang hranga chengten harsatna an tawh chungchang a sawi a. “Kan unaute an ni a, an natna chu kan natna a ni a, an tawrhna pawh kan tawrhna a ni. Chutiang bawkin an hlimna leh lawmna pawh kan hlimna a ni. An kiangah kan ding tlat dawn a, kan kalsan lovang,” a ti a. “Zofate Jerusalem, Zoramah hian kan raltlante pawh thlamuang takin awm rawh u,” a ti bawk.

Pu Lalruatkima chuan, “Kan unau Manipur, Burma leh Bangladesh amite’n harsatna an tawk mek tih kan hria a. A pawi kan ti tak zet a. Mizorama rawn raltlan mekte a hnam angin kan lo dawnsawn a pawimawh hle. Sorkar, Kohhran, NGO leh mipui zawng zawng kan ṭanrual a, thu khat vuaa kan lo buaipui mekte hi a ropui ka ti tak zet a ni,” a ti.

MNF Adviser chuan, “Zofate hi ram hrang hrang – India, Burma leh Bangladesh-ah te ṭhendarhin kan awm a. Hei bakah hian India ramah pawh State hrang hrangah ṭhendarh kan ni a. Zofa ṭhendarha awmte rorelna pakhat hnuaia awm hi kan nghakhlel em em a, Pathian engkim tithei zarah chu hun chu Zofate hian kan chuangkai ngei ang tih ka ring tlat a ni,” a ti bawk.

I&PR Minister chuan, “An sahimna zawnga Mizorama rawn raltlan mek kan unau te, an mahni in leh lo ngeia hlim taka an let theih kan duhsak a. Chutih rual chuan an himna duha raltlante kan theih ang tawka chhawm dawl hi Zofa zawng zawngte mawhphurh a ni,” a ti a. “Assam nen kan ramri a buai a, silai hial a puak a. Assam-in min dan chah vek lai khan, ‘Ei tur kan neih chhung chu in nghei bik lovang,’ min ti a. Chutianga min titu kan unaute tuamhlawm hi kan bat a ni. Chutiang chuan min ti lo pawh nise, kan chipuite tuamhlawm hi kan bat a ni tho tho a ni,” a ti bawk.

“Pathianin Mizorama remna leh muanna min pek te, sorkar ṭha tak kan nei te, Chief Minister Nationalist tak kan neite hi, Pathianin hmun hrang hranga Zofate kuahkhawm nan a lo ruahman lawk niin ka hria a ni,” MNF Adviser chuan a ti bawk.

MNF Adviser-in raltlan a tlawhnaah hian General Secretary VL Krosshnehzova leh YMA Saitual Sub Hqrs. hruaituten an ṭawiawm a. Raltlante tan hian Pu Lalruatkima chuan ₹20000/- a hlan nghal bawk a ni.

Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media//04/2023/697
Dt 11.05.2023