PU LALDENGA THIH CHAM VAWI 33-NA, A THLANAH PANGPAR AN DAH

PU LALDENGA THIH CHAM VAWI 33-NA, A THLANAH PANGPAR AN DAH

Mizo National Front
General Headquarters
Mizoram : Aizawl

Press Release

PU LALDENGA THIH CHAM VAWI 33-NA, A THLANAH PANGPAR AN DAH

MNF President: Kan hnam movement hi Pathian tan a ni, chu thuthlung chu a rei tulh tulh a, a pawimawh tulh tulh

Vawiin ni 07.07.2023 Ningani hi Pu Laldenga (1927-1990) thih champha vawi 33-na a ni a, zing dar 7 khan MNF party hotuten a thlanah pangpar dahna hun an hmang.

MNF founder Pu Laldenga (L) thlan, Treasury Square, Aizawlah hian MNF President Pu Zoramthanga, Vice President – Pu Vanlalzawma leh Pu Lalthlengliana te, Treasurer Pu K.Vanlalauva, MNF National Core Committee member, Pi Biakdiki W/o Pu Laldenga (L), Minister/MLA, AMC Dy. Mayor/Corporator leh mi thahnem takin pangpar an dah a ni.

He hunah hian MNF President & Chief Minister Pu Zoramthanga chuan thusawiin – Rinna chu an vawng tlat a, rinna neiin an thi ta… tih changthlanin, Pu Denga pawh khan kum 1961-a hnam thuthlung an áš­an a, movement an kalpui lai khan hma lam hun a hmu chiang bik hauh lo. Keini pawh chu tho chu kan ni. Amaherawhchu, chu rinna chu vawng tlatin a thi ta a. Keini pawh chutiang chuan kan thih ve a ngai, a ti.

“He ram min petu, he hnam siamtu leh min kaihruaitu hian a mipuite hi kan thluthlung angin Pathian tan a ni a, a dawtah kan ram tan. Pathian leh kan ram tan kan ti. Chuvangin kan hnam movement hi Pathian tan a ni. Chu thuthlung chu a rei tulh tulh a, a pawimawh tulh tulh a ni.

“MNF chuan Pathian zarah kum 62 chuang harsatna leh lungngaihna a lo hneh tawh a. Pathian tanpuinain, a duh zawng ti turin a hneh zel ang tih rin tlat ngamnna hi kan chakna a ni. He rinna vawng tlata kan awm hi kan felnaah ruat a ni,” tiin, Pu Laldenga chi tuh chu rinnaa vuan tlattuah a lo tiak chho zel a ni, a ti bawk.

Pu Zoramthanga chuan khawvel pumah mi nuai tel thihna hripui a leng a. Buaina avangin Burma, Bangladesh, Manipur leh Tripura atangin kan unaute an lo tlankhawm tih sawiin, “Zoram hi chhim leh hmar, chhak leh thlang atanga an luhkhawmna tur, kan Jerusalem atana min siamsak a ni a. Hengte hi Pathian thiltum ropui tak tihhlawhtlinna tur a ni,” a ti.

“Engtinnge Pathianin min kalpui zel a tum tih thlir chungin rinawm takin, rinnna nghet tak vuanin kan thih ve a ngai a ni. A result pawh Zoramah, India ramah, khawvelah a lo lang zel ang tih ring ang u,” tiin kalkhawmte chu inhlan thar turin a chah bawk a ni.

He hunah hian Pu Laldenga (L) fanu Dr. Lalrinzuali pawhin hun tawite hmangin, a pa Pu Laldenga’n inremna siam hun lai khan a duh anga thil a thlen lohzia a hrilh thin thu leh a tum ang leh a duh ang hmang hman lova a boralsan thu a sawi.

Dr. Lalrinzuali: “Ka pa khan Mizoram hi a lo va hmangaih em!” a ti a. “Khang hun zawng zawngah khan kan family a number one lem lo. Mizoram tan a nih chuan keini kha chu min sacrifice a hreh lo. Harsatna tam tak kan paltlang a, thuawih takin kan zui thin. Mizoram a hmangaihnaah a tum a thlen dawn chuan a nupui fanaute a number one lo.” a ti.

“A dam rei lo lutuk leh Mizoram, a hmuh tum ang leh a indin chhuahna a hmu hman lo erawhin rilru a tina. Pathianin MNF party hi Mizoram dinchhuah nan a din a ni a, chumi kawnga kal zel chu kan tihtur niin ka hria,” a ti bawk.

Pu Laldenga thlana inkhawm tawi hi MNF Vice President Pu Lalthlengliana’n a kaihruai a. Rev. K. Lalpiangthara’n hunserh a hman bakah malsawwmnain hun a tawp a khar.

Sd/-
MALSAWMPUIA RALTE
Jt. Secretary
Media & Publicity Department
Mizo National Front
Memo No. MNF/Media 04/2023/761
Dt. 07.07.2023

Leave a Reply

Your email address will not be published. Required fields are marked *