Vawiin February ni 17, 2023 Zirtawpni hian Mizo Hnam Runah chhung inkhawmna neih a ni a, hun hnihna ah Col.Lalrawnliana, Adviser, MNF Gen. Hqr. chuan thusawiin, ‘Pu Laldenga kha ramhruaitu tura Pathian ruat a ni’ , a ti.

MNF Adviser Pu Rawna chuan, ramhnuai sawrkarah khan Pu Lalnunmawia kha Vice President niin a fel em em a, amaherawh chu Pathian leh kan Ram tan, tihah hian famkim lohna lian deuh a nei a, mipui thinlung kha a nei thei tlat lo a ni, a ti. MNF mipuite khan Pu Lalnunmawia kha a nungchang atang khan hruaituah kan pawm thei tlat lo a, Chin hills beih pawh ama rawt chhuah a ni a. Pu Denga phei chuan, a thenin kan vah laiin a thenin min hal khum a, a ti nghe nghe a ni, a ti.

Col.Lalrawnliana chuan, Pu Lalnunmawia Diary lo chhuah atanga tuten emaw thudik lo an vaivir hi a tha lo a, thudik zawk hi mipuiten kan hriat zel a tha a ni a ti. Pu Lalnunmawian a diary-a a ziah lan kum 1969 leh 1971 vela mi te chu a tha em em a, a tluang tlam tha, amaherawh chu, a hmun leh hunte ziah sual a ngah em em tih sawiin, keima chanchin ngei pawh a ziak dik lo a, MNF party tan chhiatna tur a awm lo a ni, a ti.

Pu Rawna chuan, MNF Dumpawl lo chhuah dan leh Pu Bualhranga te ho a dumpawl an nih chhan hi Pastor Zairema atanga intan a ni a, Cabinet-ho nen intiam rualin India biak an duh a, mahse Pu Denga khan political status min pek hun a ni lo, a ti a. Nimahsela, anni ho khan biak an tum tlat si a, khang hunlaia India biak kha thil tih chiah a ngailo a. East Pakistan lak an tum tawh avangin inbiakna atan khan hun tha a nilo tih Pu Denga khan a hrechiang em em a ni a ti. Kan ralthuam dahtira min biak an tum a, mutual agreement-te siamin anmahni duh danin camp-a min khungbeh a, Naga-ho an tihdan a min tih an tum a. Hei hi kan hotuten an duh silova, Pu Denga kha a chhe thei ang berin an chhuah a, ‘Pu Laldenga hi biak tlak a ni lo’ tih te chanchinbu leh Radio-ah thu an chhuah a. Chutih laiin capital lamah Pu Denga beihna thu a tam em em a, khang zawng zawng kha kan hruaitu thenkhatten India role-play a ni, tih an hriatthiam loh vang a ni, a ti.

Ramhnuaia MNF sipai hotu hlui chuan ‘khatia kan buailai tak khan Pu Zoramthanga leh Pu Tawnluia te Jail tang lo chhuak kha rawn langin Pu Denga an rawn thlawpa, felfai takin hun kan hmang chho ta a ni, a ti.

Col.Rawna chuan, tunlaiin social media-a kan ram hruaitute beih vak vak ching ho hi khawtlang leh kohhran a chhawr tlak an awm lo tih hi ka chhuichhuah a ni, a ti. Khawvel hmun tinah hian ram hruaitute hian sawichhiat an hlawh nasa em em a, kan party President ngei pawh archuk tuilo khawpin an bei thin. An beih avang a chhe ta an nilo a, an that avang a bei an ni zawk a ni, a ti.

Col.Lalrawnliana chuan MNF party hi famkim kan ni bik lo a, amaherawh chu rinawm takin kan kal zel dawn a. Hripui leng kara kan hotuten ram an hruaina hi a tha a, an rintlak a, inthlan leh hunah pawh hnehna kan chan leh ngei ring tlat ang u, a ti bawk.

Hnam Run chhung inkhawm hi Pu R.Vanlalsawma, Adviser, MNF Gen. Hqrs. chuan kaihruaiin, Pu R.Zaiawithanga NEM chuan hunserh a hmang a. Pu Malsawmpuia Ralte, Jt.Secy.chuan Ex-MNA ten Hmunpui ram a Raw hmun an siam, MJA member thenkhatte nen an tlawh chungchang report ngaihnawm leh bengvarthlak tak a pe bawk.

Sd/-

(B. Lalhmangaihzuala)

Jt. Secretary

Media & Publicity Department

Mizo National Front

Memo No.MNF/Media/04/2023/604

Dt. 17.2.2023