Pu Laldenga hming…Pu K.Vanlalauva, MNF Treasurer

Pu Laldenga hming…Pu K.Vanlalauva, MNF Treasurer

Mizo National front
General Headquarters
Mizoram: Aizawl

Press Release

Mizo hnam leh Mizoram a awm chhung chu, Pu Laldenga hming a dai tawh lo ang- Pu K.Vanlalauva, MNF Treasurer

Vawiin February ni 13, 2023 (Thawhtanni) hian Mizo Hnam Run-ah chhung inkhawm neih a ni a, hun hnihnaah Pu K. Vanlalauva Ex-Minister, MNF Treasurer chuan Pu Laldenga anga mi ropui, Pathianin Zofate min pe kha vanneihthlak a tih thu a sawi.

“Pathianin Mizote hi Hnam, sakhua leh ram min pe a, hemi humhalh tlat duhna leh hmangaihna thinlung chu Pu Laldenga’n Zofate hnenah a tuh hi a ropui takzet a. Pu Laldenga anga hnam tana mi ropui, hnam thinlung mipui hnena tuhtu hi hnam dang pawhin neih ve an duh a, duh avanga neih ve ngawt theih erawh a ni lo a ni,” a ti.

Pu Denga chu India ram mai ni lo, khawvela Mizo hnam min pholangtu a nih thu sawiin, khatih hun laia Zofate mai ni lovin, thangthar zelte thinlung thleng pawh hian Hnam thinlung (nationalism) a tuh a. Sawisel a ngaihnep tum awm áš­hin mahse; kan finna a sang tulh tulh a, Pu Denga hlutna hi kan hrechiang chho tulh tulh a. Mizo hnam leh Mizoram a awm chhung chu, Pu Laldenga hming a daih tawh loh tur thu a sawi.

MNF Treasurer chuan, mi thenkhatten MNF Party leh Pu Laldenga hi Lehkhabu a ziak meuhin, dawt hmangin chhuahin sawi sel mahse, Pu Laldenga dikzia miten an hre chiang tulh tulh a, miten a chanchin an chhiar zau tulh tulh a, mipuiten thu dik chhui zau an chak a, thudik dik hi an hre zel a ni, a ti bawk.

He hunah hian Pu B.Vanlaltana, MNF General Headquarters Secretary pawhin kar hmasa a, MNF Vice President Pu Lalthlengliana hova Siaha zin report pein, social media-a kan hriat ang ngawt kha a lo nilo a, a takah kan lo la chhelo hle a, banna thehlut tam tak anga sawi kha, MNF atanga hnawhchhuah tawhten boruak siam nan banna an lo thehlut nawn mai mai a lo ni a, banna thehlutte kha tih tham pawh an lo awm lo a, a hmun ngeiah kan va zir chiang a, hlawk kan inti hle a ni. Mara mipuiten thu dik leh thil awmzia an hriat chian hnuah MNF boruak a tha sawt zawk. Nimin piah thleng khan Siaha MNF District Headquarters hruaitute chu Thingsen khua, Dr.K. Beichhua pianna ngei zu tlawhin, induhsakna lantir nan vawk inches 50 zeta lian an lo talh a, a hma ai khan MNF boruak a kang nasa em em a ni, a ti bawk.

Hnamrun chhung inkhawm hi Pu Harvey Lalrinliana, Gen. Secretary-in a kaihruai a, Pu Rochungnunga Gen. Secretary chuan hunserh a hmang a. Pu VL.Kroshnehzova Gen. Secretary hnen atangin MNF Party hmalak tawhna report ngaihthlak a ni bawk.

Sd/-

(LALTHAKIMA)
Jt. Secretary
Media & Publicity Department
Mizo National Front
Memo No.MNF/Media/04/2022/602
Dt. 13.02.2023

Leave a Reply

Your email address will not be published. Required fields are marked *