Mizo National Front
General Headquarters
Mizoram : Aizawl
Press Release
PROF. F. LALNUNMAWIA MLA-IN SAMLUKHAl HEALTH & WELLNESS CENTRE BUILDING SAK THAR HAWNG
May ni 1, 2023, (Thawhtanni) chawhnu khan Samlukhai Health & Wellness Centre Building sak thar chu Aizawl S-III MLA Prof. F. Lalnunmawia’n a hawng. He hunah hian Dr. Eric Zomawia Mission Director, NHM chu Khualzahawm a ni.
Prof. F.Lalnunmawia chuan thu sawiin, “Health Minister leh Health Department hmalaknain Mizoram hmun hrang hrangah PHC leh Health Sub Centre thahnem tak sak thar a ni a, Kan bial chhungah Samlukhai Health & Wellness Centre leh Maubuangah Health Sub-Centre leh Staff Quarters-te sak thar a ni a. Health & Wellness Centres leh Sub Centres dang pawh a tahtawla la sak that zel kan beisei a ni. Tin, Sialsuk PHC building thar sak zawh niin luah fel tawh tawh a ni. Hei bakah hian kan bialah Health Clinic Centre 4 din thar a ni a. Hengte hi tih changtlun chhoh zel kan tum a ni,” a ti.
“Mi thenkhatin kan sorkar hi thil dang aia Sports infrastructure, a bikin Football ground siam uar lutuk min ti; mahse kan bial chhungah hian Health leh Education lamah hmasawnna tam tak kan neih bakah PHE department kaltlangin mipuite tui hnianghnar zawka pekna turin nasa taka hmalak a ni. Hengte hi Sports lama hmalakna aiin a thahnem fe zawk a ni. Tin, Samlukhai internal road Black-topping turin PWD in ruahmanna a siam mek a, hna an thawh thuai kan beisei a ni. Tin, kum 2018 MLA election dawna kan in tiam tawh angin, Tlawngkual agriculture linkroad pawh tun term chhung ngeia laih tlang kan tum a ni, ” a ti bawk.
Khualzahawm Dr.Eric Zomawia pawhin thu sawiin, “Sorkarin mi zawng zawng thleng phak Healthcare tha zawk siam sak turin hma a la a. Chutianga mipui nawlpuiten awlsam zawka an pan theih tur Health Sub Centre leh Health & Wellness Centre te tihchangtlun chhoh mek a ni a, natna satliah deuhah phei chuan Hospital lian pan kher ngai lovin Health & Wellness Centre-ah hian in enkawl a theih tawh a ni,” a ti bawk.
He Health & Wellness Centre building hawnna inkhawm hi Pu PC Lalmuanpuia, Samlukhai VCP-in kaihhruaiin Pi Sarah Lalruatfeli, Health & Wellness Officer-in lawmthu a sawi a, he building hawnna hi Samlukhai NGO hrang hrang aiawh leh khaw thenawm atang tein an hmanpui a ni.
Sd/-
(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/684
Dt.02.05.2023