PRESS STATEMENT OF K.VANLALVENA, LOK SABHA MP MNF OFFICIAL CANDIDATE

PRESS STATEMENT OF K.VANLALVENA, LOK SABHA MP MNF OFFICIAL CANDIDATE

PRESS STATEMENT OF
K.VANLALVENA, LOK SABHA MP MNF OFFICIAL CANDIDATE

The 23rd March, 2024 (Inrinni) : Kumin 2024 April Ni 19-a Lok Sabha MP thlanna neih turah MNF Party Official Candidate atana min thlang chhuak hi Pathian rawn chungin lawm takin ka pawm a. ‘Zoram Mipui Candidate’ ni tura kan inbuatsaihnaah heng a hnuaia tarlante hi min hriatsak turin Zoram mipuite ka ngen a ni.
Pathian leh kan party hotute zarah kum thum leh a chanve chuang hret Rajya Sabha MP ka lo ni ve ta reng mai. Ka term kal lai mek hi kum 2026 July thlaa tawp tawh tur a nih avang leh ka term tawp hnuah chuan min thlak turin Rulling party MLA te chuan an party mi an duhsak zawng an theh chhuak ngei dawn tih hriat sa a nih avangin, Mizoram, Mizo Hnam leh kan Sakhua vawng him tura Parliament chhung leh pawnah au chhuak zel tura hun tam zawk ka neih theih nan he Lok Sabha MP atana candidate nihna hi lawm takin ka pawm a ni tih Zoram mipuiten min hriatpui se ka duh a. Zoram mipui ten min hriat chian zawk nan Rajya Sabha MP ka nih chhunga ka hnathawh leh thil tih thenkhatte hetiang hian ka han tarlang a ni:-
1. Rajya Sabha MP ka nih chhung hian Parliament Session ah Mizoram leh Hnam tan vawi 15 ka lo au chhuak ve tawh a, zawhna engemawzat ka lo zawt tawh bawk a. Parliament session vawi eng emawzat nei tawhin MLA vote chhiar avanga Mizorama ka haw chhung ni 4 tih loh chu ka la kal kim a ni.
2. Parliament session a ka thusawiah te leh Parliamentary Standing Committee on Commerce meeting-a ka thusawiah te hlawhtlinna engemawzat hmuh tur a awm mek a, chung zinga then khat te chu – Man man zawka Sawhthing hralh a nih theih nan China atanga sawhthing lak luh ti tawp tura ka ngenna avanga sawhthing rate lo sang ta nia lang te, Oil Palm hralhna man tih san a nih theihna tura ka ngennain hlawhtlinna hmel hmua Oil palm chingtu, Kg khat cheng sawm aia tlawma hralhtute hnena Minimum Support Price pek an lo ni ta te, Parliament Session-a ka thusawi hmasak ber Mizorama Ayush Hospital cum Training Centre din tura ka ngennain Central sawrkar hotute thinlungah rah tha a chhuah mek te hi ka lawm hle a ni. Mizoram khawchhak tlangdunga lirnghing thin ngaihsak tura ka ngenna te, Vawk hrileng tuartute hnena zangna dawmna pe tura ka ngenna te pawhin rah tha a chhuah a. Myanmar atanga kan unau Mizorama rawn tlan lutte lo kuangkuah tura ka ngenna te pawhin rah tha a chhuah bawk a. Myanmar leh Bangladesh te nena insumdawn tawnna tura ka rawtna te pawhin rah tha a chhuah mek a. Manipura kan unaute thlavang kan hauhna pawhin Central sawrkar bengkhawn a hlawh hle bawk a ni.
3. Bangladesh ramri hrula khaw engemaw zat te motor kawngin a pawh theih nan Tlabung thlanga Khawthlang Tuipui kanna Lei (bridge) dawh tura Union Home Ministry ka ngenna pawhin hlawhtlinna hmel hmuin lei dawh nan hian cheng vaibelchhe 54 lai sanction a ni tawh a, a thawktu tur contractor pawh CPWD ten an thlang fel tawh a ni. Bairabi leh Mamit inkar kawngpui laih zauh a nih theih nan National Highway thar hawng tura ka ngenna chu tih hlawhtlin niin National Highway tharah puan a ni tawh a, kawngpui laih dan tur survey mek a ni a. Zorinpui leh Longmasu inkar laih zawma National Highway thar puang tura ka ngenna pawh hlawhtlingin puan fel a ni tawh bawk a. Tuipui D bula Chhimtuipui lui chunga Permanent Bridge siam tura kan ngenna leh Thingsai leh Pangkhaw inkar kawngpui laih chawlh san ringawt, chhunzawm tura hma ka lakna te pawh a thuphunga pawm a ni tawh bawk a. Pangkhua to Saisihchhuah Myanmar border road siam tura harsatna awmte sukiang tura kan hmalakna te pawhin rah tha a chhuah thuai ka beisei bawk a ni.
4. Lengte peng atanga Mamit kaltlanga Tripura panna kawng pui sial mek revised estimate MORTH in hun rei tak an pawm theih loh pawh nasa taka kan nawrna avangin pawm fela sanction tih chhuah a ni ta bawk a. Tlabung bul Khawthlang Tuipui lui mawng then faina tura kan ngenna pawh tih hlawhtlin ni tawhin pawisa sanction fel a ni tawh bawk a. Manipur leh Mizoram dawh zawmtu tur Tuivai lui chunga permanent bridge siam tura kan ngenna pawh DPR siam mek a ni bawk.
5. Mizoram leh Tuifinriat thlunzawmtu tur kawngpui KMMTTP Road siam mek hna muang lutuk tichak nana Myanmar ram chhunga contractor awmte leh Arakan Army te tlawha a hmun ngeia kala kan hmalakna ten rah tha an chhuah mek bawk a ni.
6. National Institute of Technology (NIT) Permanent Campus Lengpui in harsatna a tawhte su kiang tura Director, Silchar lam mi la chhuak tura kan hmalakna te a hlawhtling chho zel bawk a. Cheng vaibelchhe 600 chuang sanction tawh-ah vaibelchhe 300 vel chauhin hna thawh a ni a, kum 2 lai hna chawlhsan a nih hnuah nasa taka hma kan lak avangin hna chhunzawm leh thuai thei turin tunah hian hmachhawp a lo awm ta a, hei pawh hi thil hlu tak a ni.
Tun tum Lok Sabha MP thlanna lo awm turah hian Pathian leh mipuite zarah hnehna ka chang a nih chuan kan Ram, kan Hnam leh kan Sakhua a him theih nan Parliament House chhung leh pawnah a tul apiang ti turin ka inhuam a ni tih Zoram mipuiten min hriatpui se ka duh a. Sum leh pai emaw, chhung leh khat te emaw chhuan tur engmah ka nei lo va. Zoram mipuiten kan ram tana kan thil tih tlawm te te min hriatsaka min khawngaihna dawn beiseiin, Pathian kutah ka innghat a ni. Hmun hrang hranga cheng mek Zofate insuihkhawmna tura thil pawimawh hmasa inunauna tha nei thei turin, a tul ang zela Zofa Hnam hrang hrangte kuahkhawm tur leh, he kan ram rawng hi nasa zawka ka bawl chhunzawm theih nan April Ni 19-a Lok Sabha MP thlanna lo awm turah hian ka chhinchhiahna Arsi ah ngei lo Vote turin Zoram mipuite in khawngaihna ka ngen a ni.
Ka lawm e.

Issued by
Media & Publicity Department
Mizo National Front, General Headquarters
23.3.2024