TUN HNAIA MNA INTI LEH EX-MNA TE MIN HRIAT PAWLH SUH U- Ex-MNA

Tun hnaiah Youtuber pakhat Engkima Ralte Kawlni intiin, a channel-a a tih chhuah pakhat, 'MNA ten warning pe rup mai, Ralleng Tuikhur siam dan chungchang/AMC Mayor rinhlelh a ni' tih thehdarh mekah, 'MNA' tia a sawi hi, keini Mizoramin zallenna a sual laia Mizo Hnam sipai (Mizo National Army), tuna Ex-MNA te hi kan ni lo tih Zoram mipui hriatah kan puang. MNA leh keini Ex MNA-te min ngaih pawlh lo turin Zoram mipui zawng zawng kan ngen takzet che u a ni.

Keini Ex-MNA chuan MNA pawl inti hi a awm pawh kan hre ngai lova, hnam sipai zinga Capt Kapliana an tih pawh hi keini chuan a awm kan hre lo.

Tun hnaia ding thar ni awm tak MNA intite thiltih dan en hian pawl puitling pangngai chet dan a anglo kan ti a, ram leh khawtlang ṭhatna tura hmalatu ni lovin, ṭhenawm khawveng inhuatna mai a ang niin keini chuan kan hria. YouTube-a an tih chhuaha an thil sawite pawh hi chhui chian dawl a nih kan ring lo a, hemi chungchangah Ex-MNA chuan engmah kan hriatpui lovin, keimahni kan ni lo tih kan han puang a ni e.

(T Vanlalkunga)

Secretary I/c Publicity

Ex-Mizo National Army Association (Ex-MNA)/ 31.03.2026