Khawpui nuam leh Thianghlim din turin MNF kan inbuatsaih- Lalruatkima, MNF Treasurer

Aizawl Municipal Corporation (AMC) inthlanna chu April ni 21, 2026 hian neih a lo ni dawn ta a. He inthlan lo awm turah hian party tinte theih tawp chhuahin kan tang theuh a, Party pakhat an sorkar laia Election apianga MCC bawhchhia an awm ziah hi a zahthlak hle mai. MNF campaigner zawng zawng ten MCC zawm chungin theih tawp kan chhuah a. Pathian leh mipui zarah MNF chuan hlawhtlinna kan chan ngei kan beiseiin kan in ring tlat a ni.

MNF-in tlin kan inrin chhan te han tarlang ila–

Mizoram khawpui sawn duh leh duhlo buk a ni dawn: CM-in Mizoram khawpui Aizawl chu micheng kan tam tawh avang leh Traffic tawt lutuk avangin, State capital mi nuai 10 chen theihna tur hmun danga din tura ruahmanna an siam hi kan duh lo. Tun laia a Tourist tam takin Aizawl khawpui Traffic nawm zia an rawn hmu a, Youtube hmangin sum siam nan an hman mek laia, Mizoram khawpui hmun dang a sawn tum a ni hi kan duh lo a. Tun tumah hian State capital sawn duh leh duh lo buk a ni dawn.

Leiba salah Zoram a tang mek: Kum 2023 MLA inthlan hma khan sum kan puk ve lovang tiin ZPM hotute campaign na ah an au kuk kuk a nih kha. ZPM sorkar hian sum nasa takin an puk a, nasa taka sum an puk avang hian ZPM sorkar chuan leiba salah Mizoram chu min hruai lut ta zawk ani. Budget session hnuhnung berah pawh kan hriat angin kan budget pumpui cheng Vbch 17,076.92 niin Mizoramin leiba kan neih erawh chu cheng Vbch 19,085.15 lai a ni ta mai a, cheng Vbch 2,008.23 zetin Budget aiin leiba a tam zawk a ni. Leiba sala Mizoram min hruai lut tu ZPM sorkar hi mipuiten an hnawl ngei kan ring.

Sum an ti lapse nasa: ZPM sorkar hi sum enkawl kawngah an hlawhchham hle mai a. Lunglei khawpui hmasawnna tur LMC sum chu a zawnin (FY 2024-25) ah cheng Nuai 923.12 leh FY 2025-26-ah Nuai 946.80 belhkhawmin cheng nuai 1869.92 lai an ti lapse a. Hei bakah hian AMC sum cheng nuai 1526.60 lai an ti lapse bawk a ni. Tun Financial year tawpah sorkar inthlahdah vangin liau liauin ram hmasawnna hnathawhna tur SASCI sum cheng nuai 11152.00 zet a lapse bawk a ni. ZPM Sorkar Financial management-a hlawhchham hi Aizawl enkawl tlakah mipuiten an ngaih kan ring lo.

ZPM sorkarah Eirukna leh Hlemhletna a hluar: ZPM-in MNF eiru-a an puhna lian ber chu Restricted Tender a ni a. Tun sorkarah hian an ti tawp dawn emaw kan tih laiin a uar uar-ah an tang a. MNF kum 5 sorkar aiin ZPM sorkar kum 2 chuang awrh chhung hian Restricted Tender-in hna an pe tam tawh zawk a ni. Hei bakah hian party mi leh chhung khat duhsak loh intiam si khan ‘Work Superviser’ hming vuahin dan kalhin an duhsak zawngte hna an pe mawlh mawlh mai bawk a ni. Ration Buhfai chungchangah pawh eirukna lian tak a awm a, Lengpui Land Scam chungchangte hi rapthlak khawpa induhsakna leh eirukna hnuhma lian tham a tling a ni.

Eirukna leh hlemhletnain nasa taka ZPM sorkara bu a khuar mek avang hian ZPM hi inthlanpui lo awm leh turah an tla dawn mai ni lovin, tun AMC inthlanah pawh hian mipuiin an hnawl ngei a rinawm hle a ni.

Chhiah leh bill a pung nasa, mipuiah erawh sum avang: Kan sorkar hunah chuan chhiah kan ti pung ve lo ang titu te, ZPM sorkar hian Buhfai man a letin an ti to a, Petrol leh Diesel-ah kawng siamna tur chhiah an la a, Revenue Stamp man an tipung nasa hle bawk a. Tui leh Electric bill nasa takin a pung bawk a. Hei hian sum leh pai lengvak a ti vang a, mipui kan harsaa kan rethei ngawih ngawih mai a ni. Mipui phurrit nasa tak min siam mektute hi mipuiin an hnawl ngei ang tih hi kan ring a ni.

Mipui support hlawh lo MUHCS:Road Map nei sa in ti ten, MUHCS-ah Sorkar hnathawk, CSS leh Pensioner te tihluihna hmanga dolet tura an ti hi a pawi tak zet a ni. Mipui support hlawh lo, MUHCS ah hian 14th April, 2026 thlengin mi 29472 chauh an la inziak lut a ni, a chhan ber ni alang chu sumdawng rilru pua enrollment man tam lutuk vang hi a ni. Mipui kan retheih em em si avangin enrollment man an tih san vanga lungawi lo te tan Vote chi an ni lo.

Aizawl khawpui thenfai kan tum: Zofate Jerusalem Aizawl-ah Thalai Ruihhlo ngaite an zalen hle mai a, langsar takin Zu leh Drugs an hmang a, hmun lunlaia awmkhawm hmer hmur hmuh tur an tam hle a ni. Hei hian Aizawl khawpui a ti tawp hle a, khualzin mi tam takin Aizawl an rawn bawh ruih ruih lai hian kan hnam mualphona a thlen mek a ni. Heng zawng zawng a bo theih nan theih tawp chhuah kan tum a, Aizawl nuam leh khawpui thianghlim ni turin thenfai kan tum a ni.

Hnam dang sumdawng Aizawl-ah an zalen: Kum hnih khat kal ta atang khan Aizawl-ah kawng hrang hrangin hnam dang sumdawng an pung nasa hle a. Sumdawnna lamah min chimral ang tih a hlauhawm ta hial! AMC-a MNF kan sorkar a nih chuan theih tawp chhuahin hei hi tih tawp kan tum a ni.

Hindu puithiam company Patanjali Foods Ltd ten bu an rawn khuar: ZPM sorkarin FC Act, 2023 pawmpui avangin kan inhumhimna Peace Accord/Remna Thuthlung avanga kan neih Article 371G chu thiatin an bawhchhia a, Peace Accord/Remnaa Thuthung bawhchhe hmasa ber ZPM sorkar kan enchhin hi a vanduaithlak tak zet a ni. Tunah hian Hindu Puithiam Swamy Ramdev company Patanjali Foods Limited te chuan Lawngtlai District leh District thenkhatah ram neiin bu an rawn khuar tan mek a ni. ZPM sorkarah kan ram a him lo, Kan Hnam a dam loh vangin mipuiin an Vote kan ring lo.

Hmachhawp leh hmalakna turte: Sorkar inrelbawlna ah mipui ngaihdan te thlir chunga chinfel ngai tam taka a awm thin tih kan hria, Building permission, ran vulh leh khuahkhirh chungchang etc ah Dan lo awmsa te hmangin mawhphurhna/responsibility kan la lo thei lo a, Mipui dinhmun thlir chungin kan zawh tawk anga zela in her remin, siamthat ngai leh ennawn ngai chu kan siamtha dawn.

MNF-in AMC-ah Sorkar ngialnghet din turin Candidate kan nei tha ber: AMC-ah hian Congress, ZNP leh MNF kaihhruai alo ding tawh thin a. Congress leh ZNP sorkar lai phei chuan sorkar a inthlak zut mai a, Aizawl Musical Chair tih hial anih kha kan la hrereng awm e. Aizawl mipuiten sorkar ngialnghet din thei tur party an zawng lo thei lova, Chuvang chuan, Party dangte aiin MNF hian Sorkar ngialnghet din turin Candidate kan nei tha ber in kan hria, hei hi kan hlawhtlin pui kan ring hle. Party dang Candidate te pawh kan thlir a, MNF Candidate te an tluk lo nasa hle. Kan Candidate zingah AMC Corporator/Councillor thin mi 4 awmin, Sorkar hnathawk sang ber Secretary, Govt of Mizoram pension, Sport lama India ram aiawh mekte, Kohhran Upa, Bial KTP Leader leh YMA hruaitute, Zoram thalaite entawn leh ngaihsan rawn te an ni hlawm. Kan Candidate te ah experienced nei, lehkhathiam leh mi tha tak takte an Ward Corporator turin mipuiin an duh tih kan hria a, kan hlim hle a ni.

AMC Election kan hma maia lo awm turah hian Aizawl khawpui a Vote nei zawng zawngte Vote thlak theuh turin MNF chuan kan ngenin kan sawm a, MNF chhinchhiahna ARSI-ah lo Vote theuh turin Aizawl mipui zawng zawng kan ngen tak zet a ni.

Issued by: Publicity Board MNF General Hqrs. @ Aizawl Press Club 18 April, 2026