Mizo National Front
General Headquarters
Mizoram : Aizawl
Press Release
PATHIAN LEH MIPUI ZARAH PU ZORAMTHANGA KAIHHRUAI MNF HI NAKKUMAH A SORKAR LEH NGEI DAWN – DR.R.LALTHANGLIANA, MNF ADVISER
Vawiin October ni 24, 2022 (Thawhtanni) hian ‘MNWF Aizawl South-1 Political Training- 2022’ chu Liando Resort, Sakawrtuichhunah neih a ni a.
Khuallian Dr.R.Lalthangliana MNF Adviser leh Health Minister ni bawk chuan MNF chuan kum 60 a tlin lawmna kan hmang zo chiah a. MNF danglamna chu Mizo zawng zawng kan lenna pawl a ni a, he pawl lo irhchhuahna chu Mizoramah Tampui mitthi a thlen lai khan, eng pawl mahin hma an la lo a, Assam sorkarin min enkawl lai kha a ni a, ngaihthah kan nih atanga min chhanchhuak tura he pawl hi lo ding a ni. Hun a lokal zel a, October ni, 22, 1961-ah Pu Denga In Tuikhuahtlangah mi fing ber ni bik lo, mi 8 lekte kalkhawmin an din a ni a. An innghahna pawh Sam 20 : 7 kha a ni. He pawl hi Mizo nihna dik tak, Mizo Nationalism phochhuak tura Pathian ring chunga kal a ni. He pawla awm kan nih chuan ‘Pathian leh kan ram tan’ tih hi a pawimawh em em a. Pathian kan dah hmasa ber a, a dawtah ram kan dah pawimawh leh a ni. A chang chuan hunkhirh takah kan ding thin a, mahse, a hunah Pathianin min hruaichhuak leh zel a ni, a ti.
Dr.R.Lalthangliana chuan, “Pu Denga’n min awm loh san hnuin kum 1990 atang khan Pathian tih mi leh hruaitu fel tak, leadership nei tha Pu Zoramthanga kan nei a, a kaihhruaina hnuaiah lungrual takin kan kal zel a, Pathianin sorkarna min pe leh ta a ni. A changin opposition-ahte kan awm thin a, Pathian hian sorkarna min pe leh mai thin a, nakkum inthlanah hian Pathian leh mipui zarah Pu Zoramthanga kaihhruai MNF hi a sorkar leh ngei ngei dawn a ni. Pathian lawm tlak leh pawm tlaka kan kal hi kan sorkar lehna tur atan a pawimawh takzet a ni,” a ti.
“Sorkar hmasak kum 10 chhung khan Mizoram inkalpawhna kawng tam tak kan lai a, thil ropui tak tak sawisen loh kan din a. Tun term-ah hian kan sorkar tantirh kum khat hnu chauhah khawvela nunna tam tak suattu Covid-in min nuai a, kan in lock down hnan a, kum hnih leh a chanve dawn hripuiin min nuai a, engmah ti theiloin kan awm a. Sorkar hna kan la thei lo a, contract/supply hna a inpek theih theih loh a, hun pangngaiah kan dinglo a ni tih hi mipui hian min hriatpui ka duh a, enge maw chen chu Covid khan min la nghawng dawn a ni. Tunah hian dan pangngaiin kan kal tan ve dawn chauh a, theihtawp chhuah kan tum zel a ni. Nakkum inthlanah hian Pathianin hun tha min pe ang a, kan sorkar leh ngei dawn a ni,” Health Minister, Dr.R.Lalthangliana chuan a ti.
MNF Adviser chuan, “Kan sorkar kum 4 a kal chhung hian inthlan hrang hrang vawi 10 chuang kan hmachhawn tawh a, tui let hnuah vawikhat mah kan la sorkar ngai lohnaah majority-te lain kan sorkar zel a ni. Kan inpumkhatna tha zel se, mahni theihna zawn theuhah insangmar zel ang u,” a ti bawk.
Resource Person Pu R.Lalhnuna PAC, MNF Gen.Hqrs.pawhin kum khat chhungin kum 5 thleng ang che u, South-I hi opposition bial kan ni reng thin a, chuvangin opposition-a awm hi sim ang che u. Party dang hi pakhat mah hlauh tur an awm lo tih hria u la, Pathian zarah MNF hi nakkum inthlanah kan sorkar leh ngei dawn a, lo zam reng reng lo ang che u. Social Media atangin ZPM hi an lian ber zel a, inthlan result a chhuah apiangin an artelukawn lo chauh zel a ni. Congress lah an sorkar leh hun tur a la sawi phak loha MNF bak sorkar tur an awm chuang lo, a ti bawk.
He hunah hian Pu BC.Biakngura, MNF General Secretary leh Pu Hrangkunga, Aizawl South-I MNF Block President pawhin thu an sawi a. Inhmelhriattirna leh report hrang hrangte chu Pi K.Lalchhanhimi Venghlui Unit hnen atanga ngaihthlak a ni.
He hun hi Pi K.Lalchhuanawmi Venghlui Unit chuan a kaihruai a, Pi Sapzingi Republic Vengthlang Unit chuan hunserh hmangin, Pi Kawlramthangi Bethlehem veng Unit-II chuan lawmthusawiin hun a khar.
Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/537
Dt.24.10.2022