Mizo National Front
General Headquarters
Mizoram : Aizawl

Press Release

PATHIAN KAN LAMTANG ANIH MIAU AVANGIN MIN BEITUTE HRIAMHREI CHHER TE HI A SAWT DAWNLO
– C. Lalrosanga MP (LS)

Vawiin August ni 14, 2023 (Thawhtanni) hian Mizo Hnamrun chhung inkhawm leh mithar lawmluhna hun neih a ni a. Hun hnihnaah Pu C. Lalrosanga MP(LS) MNF Adviser ni bawk chuan thu sawiin, “Pathian leh kan ram tan titute kan ni a, Pathian kan lama a tan tlat avangin, min beitute hriamhrei chher hi a sawt dawnlo. Pathian zarah hnehna kan chang zel ang. Thil tha tia theihtawp kan chhuah ve laiin beih kan tawk fo a. Rilru nat chang pawh a awm ve thin. Mahse, diriam taka min beitute tawpna hi a ropui vak ngailo,” a ti.

Delhi tlang boruak sawiin Lok Sabha MP chuan, thu in nasa takin kan inkap reng mai a. Central leh Manipur sorkar in an tihtur an tih angai tiin na takin all party meeting ah kan sawi tawh a. MNF President Pu Zoramthanga’n huai tur leh Zofate tana ding nghet tlat tura min tih angin, theihtawp kan chhuah a ni, a ti a.

State dang MP te lakah chuan pawimawh thamlo hle mah ila, kan vei apawimawh si a. NDA meeting ah, Manipur chungchang leh UCC chungchang sawilan an phalloh avangin thu ka sawi duhloh phah a. A hnu lama MP inkoh khawmah pawh Manipur leh UCC chungchang sawi an phalloh avangin kan haw phah a. A hnulam meeting-ah pawh kan tel duhloh phah zel a ni. Session ah Manipur chungchang sawi ka tum reng a. Thusawi ka dilna chu a pilbo zel a, adjournment motion ka thehluh pawh hnawl a ni. Ka nu ICU a awm pawh ngaihsak theiloin, House-ah No Confidence motion thlawp turin ka thu tluan parh a ni, MP chuan a ti.

MNF Adviser chuan, House ah hmui phuarsak nimah ila, National media lamin Manipur buaina chungchanga kan dinna an hriat avangin, min bawr nasa a. Na tak leh huai takin kan dinna ka sawitheih phah a. NDA lama kan thiante pawhin min be tha duhloin, chibai pawh ka dawng thei ta manglo hial a ni. Chutihrualin, kan unaute an lawm em em a, lawmthu ka dawng nasa a, inpumkhatna pawh a ngheh zel phah niin ka hria, a ti bawk.

Thusawitu dang, Pu Lalfamkima Ralte, Ex-Chairman, Jt. VC, Vairengte chuan, ramria MNF sorkar in hmasawnna tamtak a thawh thu a sawi a. Pathianin MNF a hruai nasa tih hrechiangtu leh a taka hmutu, ramria awm kan ni a. Covid hripui na takin min nuai laia ramri buai chungchangah MNF sorkarin nasa takin hma a la a. Ramri ah sipai camp thahnem tak sa tharin, kawng pangngai takin a pawhtir vek tawh a. Tui leh eng pawh pangngai tak an nei zel a ni. Sipai company Hqrs. thar pawh sak zawh vek tawh a ni. MNF hi ramri thu ah a sawiril lo va, a lutril a ni, a ti bawk.

Pu Lalthlengliana, MNF Vice President chuan mithar lawmluh paha thusawiin, thuthlukna an siam fuh a tih thu leh, mithar dang lawmluh tur hmun hrang hrangah an thahnem thu a sawi a. MNF a sorkar leh ngei dawn a. MNF a lutkhawm zel turin mipui a sawm bawk.

He hunah hian mithar mi 26 lai lawmluh an ni a. Lawmluh zinga mi, Pu Romalsawma, Ex Gen. Secy, ZPM thalai chuan thu sawiin, ZPM MLA ten VUC te thu vawi hnih ngawt an palzut tawh a. Hotu lian pahnih khat lekin appointment hraw tak tak an tichhuak thin a. Dan bu a chuanglo, working president post phuahchawp a ni chu party chhungah pawh sawiselna a tam hle. Candidate tura an sawmluh te hian candidate tur nilo se, member pangngaiah an awm duh pawh a rinloh thu a sawi a. MNF chu unaute tana ding ngam leh theihtawp chhuaha hna thawk anih vanga zawm anih thu a sawi bawk.

Mizo Hnam Run chhung inkhawm hi Pu Vanlalzawma, Vice President MNF chuan kaihruaiin, Pu Khawlremthanga, Gen. Secretary, MNYF Hqrs. chuan hunserh a hmang.

Sd/-
(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/820
Dt.14. 08. 2023