Vawiin July 17, 2026 khan Rajya Sabha MP K. Vanlalvena chuan Aizawl Press Club-ah chanchinbu mite kawmin, Zoram mipuite hriatturin press statement a nei a, a thu dahte a pumin a hnuaiah hian ziah lan a ni.

"Mizoram mipuite, in zavaiin chibai ka bûk a che u.

July ni 20,2020 aṭang khan Mizoram Rajya Sabha MP nihna ka chelh ṭan a. Naktip July 19, 2026 (Pathianni) ah hian ka MP term chu ka lo hmang zo dawn ta reng mai a. Ka MP term chhunga kan hnathawh leh thiltih tlangpui te, chhuan tham ni lo mah se a tlangpui zawr zawr Zoram mipuite hnena inhrilhhriat paha lawmthu sawina nei pahin hetiang hian press statement ka han siam ta rawih a ni.

Member of Parliament-in kan mawhphurhna pawimawh ber, Parliament Session-a kan performance ṭhenkhat ka tarlang hmasa ber duh a:-

MP ka nih chhung hian vawi 17 Parliament Session kan nei a. Heng parliament session ah hian loh theih lohna avang a nih loh chuan ka kal nitin a. Parliament session a ka nitin attendance record hi 97% a ni a. Ka absence te hi kum 2023 December thla tira Mizoram MLA election vote chhiar laia Aizawlah ka awm ve a ṭul avang te, kan Kohhran khawmpui lian 2024 December chawlhkar hnihna Sunday-ah Sermon hun ka chan avangte leh India ram state ṭhenkhatah Parliament Session laia Chief Guest-a ka ṭan avang te a ni.

Parliament Session-ah hian thu vawi 26 ka sawi a. Chairman phalnain thu vawi 24 ka sawi a.Google record ṭhenkhat ten vawi 23 thusawi angin min record a. Ka thusawi hmasak ber Establishment of Ayush Training Institute in Mizorama tih an record tel loh vang a ni a. Chairman phalna lovin Manipur buaina chungchang vawi hnih ka sawi bawk a ni.

Parliament Session-ah hian zawhna lian tham vawi 32 ka zawt a. Zawhna tesep vawi 38 vel ka zawt bawk a ni. Heng bakah hian Parliament Session neih hma ni chiahah All Parliamentary leader meeting leh NDA leader meeting kan nei ziah a. Heng meeting-ah hian Mizoram tana thil ṭul nia lang te ka sawi chhuak ṭhin bawk.

MP ka nih hun chhung hian hun harsa chi hrang hrang, heng, Covid 19 hripui lêng, Assam nena ramria buaina, Manipur-a chi leh chi inkara buaina, Myanmar Military Coup avang leh Bangladesh Chittagong Hills-a buaina avanga raltlante harsatna. Heng buaina chi hrang hrang avangte hian Mizoram leh Hnam chhan nan theihtawp kan chhuah ṭhin a. Kan tih theih tam lo mahse Mizoram state chhung leh pawna kan unaute harsatna maimitchhin san zawngin rilru kan pu ngai lo va. Central sawrkar hotute laka tlaktlum loh hlauh vangin Hnam chhan ngamlo zawngin thil kan ti ngai lo bawkin, chutiang rilru chu kan pu ngailo tih Zoram mipuite ka hriattir duh a ni.

Ka MP chhung hian Parliamentary Standing Committee hrang hrang - Committee on Commerce-ah te, Chemical Fertilisers-ah te, Railways-ah te, Water Resources-ah te, Paper Lay-ah te ka awm a. FCI Chairman of State Consultative-ah leh Court of Mizoram University member-ah te ka awm bawk a ni.

Covid hripui lêng avangin ka MP term ṭan tirh kum hnih dâwn lai MP LAD Fund sem tur Central sawrkar aṭangin pek kan ni lo va. Hei mai hi a ni lo va, Covid 19 avang hian Central sawrkar aṭangin state hmasawnna tur sum hai chhuah a harsa hle a ni. Chuti chung chung chuan kan ram hmasawnna tura kan thil thlen ṭhenkhatte erawh chu sawrkar laipuiin min ngaihpawimawh sak thin a, ka lawm hle a ni.

Ka MP chhunga Mizoram hmasawnna tura kan hmalak, a hlawhtlinna kan hmuh nghal tlem azawng lo târlang ila:-

1. Union Home Ministry a ziak leh ṭawngkama ka thlen, Tlabung bul khawthlang tuipui chungah Motor lian zawh theih lei (permanent bridge) siam tura ka ngenna chu tihhlawhtlin a ni a. Ministry of Home Affairs chuan he lei dawh nan hian cheng Vaibelchhe sawmnga pali (Rs 54 Crores) chuang a sanction a. He Bridge hi tunah dawh mêk a ni.

2. Ministry of Road Transport and Highways ah, Bairabi to Mamit road chu National Highway ah min puan sak tura kan ngenna min tihhlawhtlin sak a. Tun aṭanga hun reiloteah he kawng hi Double Lane a laih ṭan beisei a ni.

3. Mizoram chhim tawp Zorinpui to Lawngmasu inkar National Highway ah puanga kawngpui min laih sak tura ka ngenna chu min pawm sak a. Tun aṭanga hun rei lo teah Double lane Road laih thuai beisei a ni.

4. Kum thum chhung zet hna chawlh san, Thingsai - Bualpui - Saisihchhuah - Pangkhua - Sangau, Myanmar ramri kawngpui chu min laih zawh sak thuai tura ka ngen ṭhinnate chuan hlawhtlinna hmuin tunah hian chak taka motor kawngpui Double lane road laih mek a ni.

5. Hnahthial - Darzo - S. Vanlaiphai kawngpuia awm Tuipui D ah Motor lian zawh theih lei lian (Permanent bridge) min siamsak tura ka lo ngen ṭhin pawh a hlawhtlinna kan hmu mek a. Tunah hian lei dawh hna thawh ṭan a ni tawh a ni.

6. Mizoram chhim tawp leh Tuifinriat inkal pawhna kawngpui KMMTTP road laih mek kum thum dawn hna thawh mumal awm lova chawlhsan chu a hmun ngeiah kal in, Myanmar ram chhung thui tak luta ka thil hmuhte India sawrkar hotute hnena report ka pek leh hna chak taka thawk chhunzawm tura ka ngennate chu a hlawhtlinna kan hmu mêk a. KMMTTP road pawh tun aṭanga reiloteah siam zawh thuai beisei a ni.

7. Parliamentary Standing Committee on Railways a member ka nihna hmang ṭangkaiin Bairabi to Sairang rel kawng siam lai chu chak zawka hna thawh a nih theih nan te leh pawisa dah belh a ṭul thu te Union Railway Minister hnena ka thlen thin chuan rah duhawm tak chhuahin Sairang thlenga Rêl a lo lut ta hi ka lawm hle a ni.

8. Mizoram chhim tawp Zorinpui/ Hmawngbu chhuah thlenga Sairang Rel kawng extend tura Railway Ministry a vawi engemawzat ngenna ka lo thlen ṭhin pawh Sawrkar laipui chuan min pawm sak tawhin Preliminary Survey hna pawh thawh zawh khat a ni tawh bawk.

9. Mizoram leh India ram hmun danga Sawhthing chingtute harsatna sutkian a nih theih nan China aṭanga Sawhthing lakluh titawp tura Parliament session-a ,um hnih lai ka lo au chhuahna chuan hlawhtlinna hmuin Mizoram leh India ram hmun danga sawhthing chingtu ten man man zawkin Sawhthing kan hralh thei ta hi ka lawm hle a ni.

10. Mizoram leh India ram hmun danga Red Oil palm chingtute harsatna sutkian a nih theih nana Sawrkar laipui hruaitute hnena ka ngenna chuan hlawhtlinna hmuin India ram puma Red Oil Palm chingtute zingah rate chhe lutuka Oil Palm hralhtute hnenah India sawrkar chuan kum tin Support Price a pek phah ta te hi ka lawm hle.

11. Vawk hrileng PRRS leh ASF avanga vawk vulhtute harsatna sutkian sak tura Sawrkar laipuia ka ngenna ten rah ṭha chhuahin Mizorama vawk vulhtu mi engemaw zat ten ṭanpuina tangka fai an dawng ta te hi lawmawm ka ti.

12. Myanmar nena kan inkar ramri hung lo tura kan ngenna te min zah sak a, tun thlenga min la hung luih sak lo te hi Sawrkar laipui hruaitute chungah pawh ka lawm hle a. Kan ngennate min ngaihpawimawh sak avanga Myanmar ram, Chin State aṭanga kan unau raltlante thlamuang taka Mizoram chhunga an awm min phalsak avangte leh heng raltlante ṭanpuina tura buhfai leh sum fai engemawzat sawrkar laipuiin min pek avang pawh hian Sawrkar laipui hotute chungah ka lawm hle bawk a ni.

13. Manipura kan unau harsatna tawkte tawrhna a ziaawm deuh beiseiin N. Biren Singh kaihhruai Manipur sawrkar chu President Rule-a dah tura kan ngenna te leh Manipur phai ram leh Tlangmite inkara Central Para- Military Force te dah tura kan ngenna te pawh tihhlawhtlin a ni a. Hengte avang hian Sawrkar laipui chungah pawh ka lawm hle a ni.

14. Gas Authority of India Limited hruaitute hnenah, Cachar District kaltlanga Gas pipeline Mizorama rawn phum luh tura ruahmanna an neih sa chu Cachar mipuite nena intibuai fo kan nih avanga him lohna awm theia a lan avangin Tripura - Karimganj district - Mizoram tri-junction aṭanga rawn luhtir zawk tura ka ngenna ten rah an chhuah a, ka lawm hle bawk a ni.

15. MP ka nih ṭantirh lamah chuan Aizawl to Delhi Direct flight a awm loh avangin Delhi kal turte Kolkata Airportah Darkar 5 te kan chawlh hnuah zan rei tak hnuah Delhi khawpui kan lut ṭhin a. Delhi airport aṭanga mahni thlenna hmun pan tur ten harsatna kan tawk fo ṭhin. Chumai a la ni lo va, Delhi aṭanga Aizawl haw tur ten Kolkata to Aizawl flight nan hman loh hlauin Delhi to Kolkata thlawhnaah kan chuan a ṭul ṭhin a. Zing khawvar hmain airport panin kan chhuah a ṭul thin a ni. He harsatna sukiang tur hian Delhi to Aizawl Direct flight awmtir turin kawng awm thei zawng zawng dapin hma kan la a. Vanneihthlak takin tunah chuan darkar hnih emaw lek chhungin Aizawl leh Delhi inkar kan thlawk thei ta a. Chhun khaw ên lai hlirin Aizawl leh Delhi kan thleng thei ta te hi lawmawm ka ti hle a ni.

16. Damlo, a bikin kal(Kidney) thlak ngai leh Cancer natna tuartute tana Central sawrkar aṭanga ṭanpuina Dr. Ambedkar Scheme awm ṭhin chu harsatna eng emaw avangin ka MP ṭan tirh laiin Mizoram damdawiina awmte tan dil theih lovin a awm a. Ka MP tirh phat aṭangin chhunzawm leh turin hma ka la nghal a. Kan hlawhtling nghal bawk a ni. Tin, tun hmaa kan State aṭanga kan la dil ve ngai loh Cancer veite leh Kal(Kidney) thlak ngaite puihna tho Prime Minister Relief fund dilna form State dang MP te dilna ka hai chhuak a. Hei pawh hi kan ṭangkaipui hle bawk a ni.

17. Zirlaite, infiammite, damlo leh khualzin veivak rail reservation nei lo harsatna tawk mi tam tak Rail Reservation kan tihsak bawk ṭhin.

18. Sairang to Silchar Rel service tir tura Railway Ministry a kan ngenna a hlawhtling bawk a. Christmas dawna Delhi to Aizawl Rel service min tihpun sak tura kan ngennate tihhlawhtlin a ni bawk.

Hengte bakah hian kan hmalakna ṭhenkhat Lianpui khua, India ram hmun pawimawha puang tura kan ngenna te a hlawhtling a. Myanmar aṭanga Kuhva ro lo lut ṭhin titawp tura sawrkar laipuia kan thlen ṭhin pawhin rah ṭha a chhuah ta bawk a ni. Seling to Tipaimukh road double lane laih mekah pawh Manipur leh Mizoram dawh zawmtu tur Tuivai lei Permanent bridge siam tura kan ngen ṭhinna pawh DPR siam tawh a ni bawk.

Khing bâkah khian Sawrkar laipuia kan thu thlen, a hlawhtlinna kan la hmuh rih loh te a awm nual bawk. Mizoram Chhim lam hmasawnna atan Lunglei District Vuakmuala Thlawhna ṭumhmun min siamsak tura kan ngen, Helicopter hmanga Aerial Survey kan neih tawh chu hlawhtlinna kan hmu rih lo va. Bangladesh nena ramria insumdawn tawnna hmun Kawrpuichhuaha Border Trade Centre din tura kan hmalakna pawh Bangladesh politics inlumlet avangin tihhlawhtlin lohin a la awm bawk a. MMyanmar leh Bangladesh ramri hmun engemaw zatah ramria insumdawn tawnna hmun tenau, Border Haat din tura kan ngennate min pawmsak tawh chungin ṭhenawm ramte buaina avangin a taka kalpui theih a la ni rih lo bawk.

MP LAD Fund chungchangah mi ṭhenkhat ten hna thawk lo va pawisa eiral theih anga ngaiin MP Fund hmanna kan hre lo tihte an sawi fo va. MP Fund hi a taka hnathawh awm si lovin cheng khat mah lakchhuah theih a ni lo.

MP Fund hmanga hnathawh tur reng reng hi hna thawhna hmun tur DC Office emaw, BDO ten emaw work order an issue ṭhin a. Hnathawh endik turin DC Office emaw BDO office emaw aṭangin JE te tirh ṭhin a ni a.JE ten hna thawh zawh a ni tih completion certificate an pek chauhin MP Fund hmanga hna thawktute hnenah pawisa pek ṭhin a ni. MP Fund kan pekte hi an thawh ṭhat leh ṭhat loh hi MP ten kan en pui tawh lo va, hna endik hna hi JE ten an thawk ṭhin.

MP LAD Fund hmanna hrechiang duhte chuan RTI hmangin zawhfiah theih reng a ni tih mipuite ka hriattir duh a. Vanduaithlak takin Covid hripui lêng avangin MPLAD Fund hi kum hnih dawn kan nei lo va. Kan MP term hun chhung rei ngaihtuahin hmasawnna hna kan thawh tlem phah a, a pawi ka ti hle a ni.

MP ka nih hun chhungin thuthar thehdarhtu kan journalist zawng zawng ten ka phu hauh loh duhsakna min dawn tirin min thawhpui ṭha em em a. MJA member zawng zawngte chungah lawmthu ka sawi a. Kan ram leh hnam tan a ṭha taka ka thawh theih nana min ṭawngtaisak ṭhintu te chungah pawh lawmthu ka sawi bawk a. Ka mawhphurhna hlen chhuak thei tura min fuih chak reng ṭhintu leh chhungkuaa ka hmun awl zawng zawng min luah phui saktu ka nupui H. Lalhuapzauvi chungah lawm thu ka sawi bawk a ni.

MP Rajya Sabha ni tura min candidate-tu Pu Zoramthanga leh a kaihhruai MNF party leh MLA te chungah tih tak zetin lawmthu ka sawi a. Ka phu hauh loh duhsakna te, chawimawina te, fakna te min hlân ṭhintu Mizoram mipuite leh khawvel hmun danga awm Zofate hnenah thinlung tak zetin lawmthu ka sawi bawk a. Ka MP chhungin ka MP nihpui engemaw zatin an MP term hmang zo thei lovin khawvel an chhuahsan laiin, ka MP term hmang zo theia ka nunna min ngaihhlut saktu Engkimtithei Pathian chungah ka thinlung zawng zawngin lawmthu ka sawi bawk a ni. MP ka nih chhungin mimal emaw, party leh pawl ho emaw, Kohhran emaw, hnam emaw pawi sawi ka lo nei palh a nih chuan ngaihdam ka dil a ni tih mi zawng zawng hriatah ka puang a. Mite hriatpui loh Pathian mithmuha fel lohna ka neih te lakah Pathian zahngaihna ropui tak ka chan avangin Pathian chu chawimawiin awm bawk rawh se.

Ka term zawh hnua min thlaktu Mizoram Rajya Sabha MP thar Pu K. Laltluangkima ka lawmpui a. Mizoram leh Hnam tana mi ṭha leh ṭangkai tak ni turin duhsakna ka hlân bawk a ni.

Ka lawm e."