Mizo National Front
General Headquarters
Mizoram : Aizawl

Press Release

Party hrang hrang zingah Mizo Hnam tana din chu MNF chiah a ni – L. Thangmawia

Vawiin July ni 11, 2022 Thawhtanni hian Mizo Hnamrunah chhung inkhawm neih a ni a, he hunah hian Pu L. Thangmawia, Adviser, MNF General Headquarters leh Vice Chairman, Human Resources Development Board chuan thu a sawi.

Pu Thangmawia chuan Mizoramah political party tam tak a lo ding tawh a. A ṭhen chu a tawp leh tawh a ni. Heng din zawng zawng zingah hian Mizo hnam tana din chu MNF chiah a ni. Mizo hnam tan, Pathian hming lama din a ni. Chuvang chuan hun harsa tam tak MNF hian a tawk tawh a, Diamond Jubilee kan thleng tawh a ni. Kan Golden Jubilee kha ropui takin, rulling ni chunga lawm a chakawm nen opposition kan nih lai a ni hlauh. Diamond Jubilee hi kan rulling lai a ni bawka ropui takin lawm ang aw tia ngaihtuah kan sen laiin Dam khawchhuak tura beih ngaiin, hripuii vangin kan buai a ni. Heng zawng zawng hi ka ngaihtuahin kan chapo hi Pathianin a phal lo a ni tih hi ka hmuh dan a ni a ti.

Pu Thangmawia chuan Covid vangin khawvel pumah buaina leh harsatna a thleng a, Mizoramah pawh kan tuar na hle tih sawiin, Kut hnathawktu aṭanga a lal ber thlengin engmah tih theih a ni lo a. Chief Minister leh Council of Minister te hi Opposition ten sawiselna tur an hre lo. An thawk ṭha em em a, selna tur an zawng chawp mai mai a ni. Ni 100 inhlawhna, Gas, Buhfai leh ei leh in lakluh thilah pawh pangngai takin kan kal reng thei a ni. Hun harsa in min nang a, mipuiah theihtawp kan chhuah chungin min duhkhawp lohna tam tak a awm ang, Covid vang a ni. Ram hruaituten theihtawp an chhuah tih lanna tur chu nakkum te nakkum kum leh te a ni chauh tih a sawi.

Malsawmna period-ah kan ram a awm thuai a beisei thu sawiin, opposition party te chhunkaw buaina hi thlir ila kumin inthlan ni thut se an buai hle ang a ti. MNF chu an in peih reng thu a sawi bawk.

Chung lamin kan ram hi hun harsa min pe a, kan elpui turte insingsak ngaiin an awm thung a ti. Tuna opposition party buai dan chu MNF sorkar leh theih nana chunglam remruat a ni a ti.

HRD Vice Chairman chuan MNF sorkar tirhah Thingtlang khaw 400 ah tal Zirtirtu Quarters awm se tiin an rel a, central-ah an dil vek tawh thu sawiin Covid a lo hluar vangin file a mu rih a ti. SEDP Board 14 te hi Congress hunlaia Parliamentary Secretary ang a ni lo tih sawiin, ‘Board in Kan hmalakna te hlawhtling se chuan Board enkawl nana senso let nga hi kan hmu tawh ang a ti.
Covid len hma khan HS zirtirtu 157 lakna tur tihfel a ni a. Covid-19 leng thut avangin inrenchemna (Austerity measures) kalpui a nia, hna lak theih a ni ta lova. A pawi kan ti hle. Zirtirtu indaih lohna a awm reng bawk si a, SEDP teacher lak an ni a, a hming chauhin lawmman pek an ni a ti.

Tun hnaiah Primary leh Middle School ah indaih loh zualpui awmnaah SEDP Teacher 771 rawih thar leh an ni tih sawiin Hna pangngai anga lak a theih veleh SEDP Teacher hi a tawp leh ang a ti.

Lehkhathiam kan duh a, sapṭawng kan uar lutukna lamah kan hnam ṭawng kan thiam ṭha ta lo. Kan tu leh faten mahni hnam ṭawng an thiam meuh ta lo. Sapṭawng chauh ni lo hnam dang ṭawng hrim hrim Mizo ṭawnga seng luh a ngai ta. Chutiang tithei tur thuneitu sang Mizo Language Development Board chu CM ruahmanna in din a lo ni ta. Hei hian ram leh hnam tan Mizo ṭawng hmasawn nan nasa takin hma an la thei dawn a ni a ti.

Mihring te hi thihni pan ṭheuh kan ni a, kan ram tana thawh baka hlu enge awm chuang le! Pathian malsawmna dawng tlaka thawk zel turin mitinte ka sawm a ni a ti.

Vawiin chhung inkhawm hi Pi K. Lalrengpuii, President, MNWF Headquarters chuan a kaihruai a. Pi Hmingthari, Adviser, MNWF Hqrs chuan hunserh a hmang bawk.

Sd/-LALLIANZUALA FANAI
Joint Secretary
Media & Publicity Dept.
Mizo National Front
Memo No. MNF Media/02/2021/469
Dt. 11.07.2022