Mizo National Front
General Headquarters
Mizoram : Aizawl

Press Release

Insawisel mai lo a tanrual hi kan chakna tur a ni- Lalchhandama Ralte, Minister

Vawiin October ni 27, 2022 Ningani hian Darzo tlang Liandala Runah, Mizo Zirlai Pawl Assembly Vawi 66-na leh Zirlaite Ni ni bawk chu, Pu Lalchhandama Ralte Education Minister chuan khuallian niin a hmanpui a. “Mizote hi hnam tlemte kan ni a, insawisel mai lova kan tanrual angai, chu chu kan chakna tur a ni,” a ti.

Minister chuan, “Mizoram sawrkarin hun engemaw chen atang khan October ni 7 hi ‘Zirlaite Ni’ atan a puang tawh a. He ni hi zirlaite hnenah nunkawng dik leh zirna kaihhnawih hrang hranga inzirtirna hun atan hman thin a ni a. He ni hi, zirlaite tan ruihhlo leh HIV laka fihlim inzirtir nan te, aia upa zahna leh mizo nationalism inzirtir tharna hun atana hman nise a tha hle mai,” a ti a. Mizo nun zemawi a ral mai a hlauhawm tawh hial a, i tuaithar leh ang u, a ti bawk.

Education Minister chuan, ram hruaitute an famkim biklo a, zahlo taka sawisel mai loin, tawngtaipui thin ang u. Kan ramin a mamawh em em chu central service a luh tam hi a ni a. Mizo zirlaite hian kan tum chuan kan thei a, Pathian tih leh Ram leh Hnam vei mi nichungin lehkha i zir ang u, a ti a. Education leh sports hi kalkawpin naupang talent nei thate dapchhuah tum a ni, a ti bawk.

He hun hi Pu Sanghmingthanga Treasurer, MZP Gen. Hqrs chuan a kaihruai a, Pu K. Lalzarzova, President MZP Hqrs. Hnahthial chuan hunserh a hmang a ni.

Sd/-
(PETER CHHANGTE)
Jt. Secretary
Media & Publicity Dept.
Mizo National Front
Memo No.MNF/Media/03/2022/541
Dt.27.10. 2022