NATIONALISM-A CHIANG, CHUTA INNGHAT TLAT CHU KAN NI: -Pu Lalthlengliana, MNF Vice President

Vawiin ni 09.06.2022 (Ningani) hian Chandmary Inpui, Lawngtlaiah political training neih a ni a. Hei hi kum 1986 hnu lamah Lawngtlaia ‘MNF Political Training’ neih lehna hmasaber niin, Resource Person Pu Lalthlengliana, MNF Vice President chuan MNF chu Mizo Nationalism-a chiang, chuta innghat tlat chu kan ni a, chuta tanga kan kal pen vaih chuan kan hnam a ral ang, a ti.

“MNF Party dinchhhan leh a thiltum kan hrechiang tur a ni,” tiin, Pu Laldenga leh a hoten Oct 22, 1966-a an din thu a sawi a. “Nationalism chu mahni hnama chiang, hnam rilru pu, hnam dang rahbehna hnuaia awm duh lo, mahnia ro inrel leh mahni kea dinchhuah duhna rilru pute an ni.

“India awpbehna ata zalenna famkim kan neih theih nan March ni 1, 1966 khan independence a puang a. Kum 20 chhung India sorkar kan do. Hetiang political party hi Mizoramah an la awm lo. MNF atang lo chuan an awm thei leh tawh ngai lo ang,” a ti.

India sorkar leh MNF indo avanga Zoramin harsatna a tawh avangin Pol party leh NGO an rawn au chhuak a. Kohhran aiawh pasarihte London-ah kalin Pu Laldenga chu India sorkar be turin an ngen a. An ngenna vangin January 1976-ah Pu Denga a lo haw a. Union Home Secy SL Khurana leh Pu Denga-ten 18.02.1976 khan inhriatthiamna thuthlung an ziak a. Ni 07.07.1976-ah Mizoram biak in tinah lawmthu sawi tawngtai rualna neih a nih thu a sawi a, “June 30, 1986-ah inremna thuthlung ziah fel a ni a, India Constitution pawh Mizoram tan bik tihdanglam a ngai ta hial (Constitution Amendment Article 371G),” a ti.

Remna awm hnuah MNF chu party thiang (regd) a lo ni ta tiin: “Pu Denga’n, ‘Heta tang hian economy dinhmun kan sawisang ang a, politics-ah full-stop a awm lo. Kan kal zel dan tur kan la ngaihtuah ang,’ a tih angin Pathian leh kan ram tan kan la kal zel a. Kan hnamin zalenna a sual avangin hnam martar tam tak an awm phah,” a ti a. “Tunah hian a takin zalenna hi sual tawh lo mah ila, kan thinlung duh ber chu zalenna famkim a la ni reng,” a ti bawk.

MNF danglamna sawiin Pu Lalthlengliana chuan: “Ram tana tha turah sorkar hmasa hmalakna kan hlamchhiah ngai lo. Congress-in thu chauha an puan district panga chu kum 1998-ah MNF sorkar-in a function-tir a. Kum 2008-a district thar pathum kan pek – Hnahthial, Sailtual leh Khawzawlte chu Congress kum 10 sorkar tihpuitlin duh loh pawh tun sorkar hian thla 8 chhungin kan tipuitling vek,” a ti.

“Hripui, ramri buai, lirnghing, raltlan leh ran pulh hri kara Pu Zoramthanga sorkar hian Congress kum 10 thawh ai khan a thawk tam zawk. Kan CM anga thil tithei leh taima hi hmun dangah an awm ka ring lo. Union Budget-ah Bamboo Link Road Rs. Vbc 100 leh Aizawl Bypass Road Rs. Vbc 500 pek kan ni a. Central budget atanga direct-a sum hmuh hi tunhmaa la awm ngai lo, a vawi khatna a ni,” a ti.

Resource Person chuan eptute chungchang sawiin: “ZPM nihna mipuiin kan hre chiang tawh. MLA inthlan kha an len lai ber a ni. Tunah chuan an hruaitute inkar a khi a, bel keh phuarkhawm – tui pai thei lo ang an ni. Ram veina thinlung pu lo, party lian pahnih huat vanga ding an ni a, mi pali panga velin social media an vil a, an bengchheng hle. Bur ruak khawn rik ang chauh an ni.

“Congress chu India ramah an tlachhe ta, president tur pawh an hmu zo lo, State inthlanah an artelukawn lo chauh zel a. Mizoramah chuan Pu Hawla khan la kaihruai sela MLA pali panga an nei mahna! Pu Lalsawta ‘That loh theih lohna bawm’ an tih hi chu ‘That theih reng reng lohna bawm’ tih tur ni zawk awm tak a ni,” a ti.

MNF chu tiin: “Inthlanna kan hmachhawn tam tawh hle – MP (LS & RS), VC/LC, LADC, SHC, AMC, Tuirial by-election-ah chak zelinin, MADC-ah kan sorkar zel a. Pathian leh mipui zarah Pu Zoramthanga kaihruai hi nakum kum tawpah kan sorkar leh ngei dawn,” Resource Person Pu Thlenga chuan a ti.

Lawngtlaia Political Training-ah hian bialtu MLA Pu H.Biakzauva, Vice Chairman, Agri. Development Board leh Pu C. Rongura, Dy Leader LADC bakah Pu Ngurzamlova, GS Gen. Hqrs-ten thusawina hun an hmang bawk.

Training hi Session hnihah thenin, First Session hi Pu Lalramliana Colney, President MNF District Hqrs.Lawngtlaiin a kaihruai a. Second Session chu Pu Lalzahawma Chinzah, Treasurer MNF District Hqrs Lawngtlaiin a kaihruai thung a. Pu F. Hrangtukhuma, GS Lawngtlai District-in district report a pe a. Pu J. Kapchungnunga, GS Lawngtlai District-in vote of thanks a sawi bawk.

He training-ah hian MNF Gen.Hqrs.atangin G/S, Secretary leh Jt.Secy-te bakah MNWF atangin, mi engemaw zat an tel a. Dist.Hqrs Lawngtlai atangin EM, MDC leh palai 300 chuang an tel a ni.

Sd/-MALSAWMPUIA RALTE
Joint Secretary
Media & Publicity Dept.
Mizo National Front
Memo No.MNF/Media/03/2022/437
Dt.09.06.2022