Mizo National Front
General Headquarters
Mizoram : Aizawl

Press Release

MNF VICE PRESIDENT-IN KEIFANGAH MNF ZAWM THAR 198 A LAWMLUT

_Hun harsa a Pathianin rorel tura a ruat hi hun ralmuangah a thlauh thla lovang_

– Lalthlengliana, Vice President

Vawiin August ni 18, 2023 (Zirtawpni) hian Zawlbuk Hall Keifang Venghlunah Keifang MNF Group Committee huaihawtin ‘Mi thar lawmluh leh intuaitharna hun’ hman a ni a, he hun hi Pu Lalthlengliana MNF Vice President leh MNF General Headquarters atangin hruaitu engemaw zatin an hmanpui.

He hunah hian MNF Vice President Pu Lalthlengliana chuan Keifang MNF Group hnuai Unit 7 atangin Congress-165, ZPM- 15 leh Neutral- 18 , a vaiin 198 MNF party-ah a lawmlut. Mi thar lawmluhte hi an hming chhiar chhuak a, dintir thlap an ni a, an awmna party-ah nihna pawimawh hrang hrang neite an ni. An zingah hian Pu Lalhunlawmawma, ZPM Block Secretary ni reng thin, Pu Thamawia, Congress Unit OB ni lai, Pu Lalthlamuana Congress Unit President leh Vice President ni reng thin, Pu Zohmingliana Congress Unit-111 Vice President, Pu Laltlanzova Treasurer, Congress Unit, Pu Lalnunmawia Secretary Congress Unit leh Pu Adama Congress Unit Vice President-te an tel. Lawmluhte hian an party lo awm tawhnaa seal an dah nghal a, thu an sawi bawk a ni.

Pu Lalthlengliana, MNF Vice President chuan ZPM leader Pu Duhoma chanchin sawiin, a vanglai chuan pa viak tha leh fel tak, hotute thuawih thei tak, politics a luhchilh atang chuan engmah a tihfuh theih loh chungchang a sawi. Political party hrang hrang 10 dawma awm tawh, ama din ngei party pawh chhuahsan, tlin duh luat vanga a chhuahsan party pawh inthlan dawnah a thawhpui fo tawh dan leh a tlakpui zel thin thu a tarlang. A hnung zuitu tam tak beidawngin an thamral zel a, a kawng zawh loh tur a zawh ni bera a ngaih thu a sawi. A tute rual lek lekin Cabinet Minister-ah an luhsan zung zung a, tunlai technology sang zel a man pha ve si lo a, a che sual pheng phung a, Congress-ah khan thuawih tak leh rinawm takin awm reng se chuan, a Chief Minister ve tawh mai thei a a rinthu kalkhawmte a hrilh. Serchhip By-election ah a campaign laia a intiamna pakhat pawh a tihhlawhtlin loh thu a sawi bawk.

Pu Lalthlengliana chuan, “MNF chu Pathian leh kan ram tan titu, ram aiin Pathian kan dah hmasa zawk a, hei hi kum 1961 a, Pu Denga hova din anih lai atanga vawiin thlenga kan la kalpui reng, Mizote sakhua humhim leh chawisan, Mizoram tihhmasawn leh dinhmun chawisan, Mizo hnah thlak zawng zawng rorelna pakhat hnuaia awm hi MNF thil tum chu a ni. Mizo Hnam pasalthaten Mizote zalenna tura beiin, kum 1966-ah India sorkar nen kan indo a, kum 20 zet thing leh raw innawhna karah Zofate kan awm a. Kohhran aiawh 7 te, political party zawng zawng, NGO zawng zawngten London-ah Pu Denga in hnuk hniam turin an ngen a. Kum 1986-ah MNF leh India sorkar chu an inrem ta a ni,”

“Tun hnaiah Myanmar, Bangladesh leh Manipur buaina avangin kan chipuite an lolut a. Heng boruakte hian rorelna pakhat hnuaia Zofate kan awm hun a hnuk hnaiin ka hria. MNF chu kan thil tumah inches khat pawhin kan la tawlh lo a, kan duh ber chu Independence a la ni reng. Ni hnu hnunga chanchintha hril turin Zofate hi Pathianin min ruat a, MNF chu kan chhiat chang awm mahse; Lalpa’n min hruai chhuak leh zel a ni. Mizote hun harsa leh hun khirha Zoram kaihruai turin Pu Zoramthanga kaihhruai sorkar hi Pathianin a ruat a ni. Hripui leh buaina hrang hrang kan hmachhawnte hi party dang kaihruai laia thleng chu ni se, kan tawrh dan tur hi a rapthlap zual ang. Pathian zarah hun ralmuang kan thleng chho mek a. Hun harsa a rorel tura Pathianin a ruat hi hun ralmuangah a thlauh thla lo ang, Congress leh ZPM hi Pathianin a sorkar tir thut ngai lo ang,” MNF Vice President chuan a ti.

Congress President Pu Lalsawta chanchin sawiin, ani hi kan MLA lo ni reng tawh thin a ni a, kan party-a a awm lai pawhin a zawi ngiai ngiai kan tih thin kha a ni tiin a kaihruaina hnuaiah Congress an sorkar a rin ngai loh thu a sawi bawk.

Pu Lalrinenga Sailo, AMC Mayor pawhin thu a sawi a. MNF General Headquarters atangin Tawi ‘E’ bialtu Pu MS.Dawngliana General Secretary leh Pu Lalthanliana General Secretary-ten thu an sawi bawk.

He hun hi Pu Lalnunringa, President, MNF Group Committee chuan kaihruaiin, Pu R.Zoliansanga, Group Joint Secretary, Member VC Venglai chuan hunserh a hmang a. Report leh Introduction chu Pu R.Lakthakima Secretary Keifang MNF Group Committee chuan a pe bawk. Pu K.Malsawma, Senior Adviser, Keifang MNF Group leh VCP Venghlun ni bawk chuan lawmthu sawiin hun a khar.

Sd/-

(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/823
Dt.18.08.2023