MNF SR VICE PRESIDENT PU TAWNLUIA’N LUNGLEIAH PRESS MITE A KAWM
Vawiin ni 24.3.2023 hian Pu Tawnluia MNF Sr Vice President chuan Mizo Hnam Run, Lungleiah thuthar lakhawmtute a kawm a. “MNF party hian Lunglei mipuite tan theih tawp a lo chhuah tawh ṭhin a. Lunglei khawpuiin hmasawnna lamtluang a zawh zel theih nan he Lunglei Municipal inthlan lo awm turah hian MNF candidate te vote ṭheuh turin thinlung takin Lunglei Mipuite ka sawm a ni,” a ti.
Pu Tawnluia chuan, “Mipui aiawhte hnena thuneihna sem zai hi MNF sorkar chuan a duh a, chumi tur chuan kawng hrang hrangin hma a la a. Mipuiten thuneihna sang zawk an neih theih nan Lungleiah pawh Lunglei Municipal Council office pawh hawn fel a ni ta a. Lunglei mipuite chu an mahni kutah ngei inrelbawlna an kalpui dawn ta a ni. He LMC inthlan hmasaberah hian a hringtu ngei MNF hi min vote tling turin mipuite kan ngen a ni,” Dy CM chuan a ti bawk.
Pu Tawnluia chuan, “Furpui avang leh chhan dang avangin duh angin Lunglei kawng kan siam chak tawk lo a, theih tawp chhuah mek zel a ni a, furpui hma chuan kan siam zo turah kan ngai a ni,” a ti a. “Lunglei by-pass road Congress sorkar-in an tlak dawn hnaih 2018 kum tawpa a hming maia sum an dah pawh bypass road siam nan a bei tham lutuk avangin, Lunglei tan tho thilah hman a ni a. Lunglei by-pass road chu km 22-a thui vaibelchhe 300 velin ruahmanna siam thar a ni a. NHIDCL hnenah tender pek niin an niin sum an zawng a. Ministry of Road Transport & Highway (MoRTH) chuan DPR siam tur tender a rawn chhuah tawh nghe nghe a ni.
“A hmaa Congress sum dah kha campensation-a ram lakna tur pawh awm lo, km 4 vel chauha thui siamna daih a ni a. Tuna kan ruahman hi chu km 22-a thui ram lakna turte pawh daih vek a ni. Kei ni chuan vote zawn nan mai kan ti ve lo a, Lunglei mipui hian kawng ṭha leh by-pass road ṭha in neih hi thinlung takin kan duhsak che u a ni,” a ti bawk.
MNF Sr Vice President chuan, “Assam Rifle sawn chhuak tura Mizo Hnam Pa Pu Laldenga hma lo lak tawhna pawh bawh zui zel a ni a. Kan Chief Minister zahawm takin chak taka hma a lakna avangin AR chu an inthiar chhuak ṭan ta mek a. Zokhawsanga Assam Rifle hmun hawnna Union Home Minister Amit Shah chuan a rawn nei dawn ta ni. AR chhuahsan tur ram hi mimal kuta a luh loh nan dan siam a nih mai bakah, cabinet meeting pawhin AR rama LSC neite cancel hi a rel tawh a. AR ram chhuahsan tur hi mipuite tan ṭangkai taka hman a ni dawn a ni,” a ti bawk.
Pu Tawnluia chuan, “ZPM-in an zawrh mek kalphung thar chu a chhiat leh a ṭhat a hriat lawk loh a. Thil thar chhia hi tumahin kan duh chuang lo. Tuna sorkar kalpui mek ‘kalphung ṭha’ hi mipuiin vote tlin leh an tum niin kan hria a, kan lawm hle,” a ti.
Pu Tawnluia chuan, “ZPM party chuan hmun ṭhenkhatah chuan hma an sawn vein lang bawk mahse sorkar turin rin an hlawh lo a. Congress party lah nise phai lama an chhiat ang bawkin Mizoramah an hniam em em a. Covid hripui avangin MNF sorkar hi duhthusam zan chuan kal lo mah ila mipuite hian sorkar leh turin MNF hi min duhin min ring niin kan hria a, kan lawm hle a ni,” a ti bawk.
Pu Tawnluia Sr Vice President hi Dr R Lalthangliana Adviser, Pu C Lalrinsanga Adviser, Pu Lalruatkima Adviser leh Er K Lalsawmvela Adviser-in an ṭawiawm a ni.