Mizo National Front
General Headquarters
Mizoram: Aizawl
Press Release
Cheng nuai 9200 senna tur lei lian kan dawh theih tur thu ka puang a, hmasawnna ruhrel lian tak a ni – Dr.R.Lalthangliana, Minister, Commerce & Industry
Vawiin May ni 26, 2023 (Zirtawpni) hian Dr.R.Lalthangliana Minister, South Tuipui bialtu MLA hovin ’29-South Tuipui A/C MNF South Block Political Leadership Training’ chu Tourist Lodge S.Vanlaiphaiah neih a ni a. A bial khaw hrang hrang Tuipui D, S.Vanlaiphai, Darzo, Muallianpui, S.Lungleng, Lungpuitlang leh New Kawnpui atangtin party hruaitu chin chauh an lo kalkhawm a ni.
He hunah hian Dr.R.Lalthangliana C & I Minister chuan Darzo Kai,Tuipui D lei lian cheng nuai 9200 senga an dawh thei tur chu puangin lawmawm a tih takzet thu a sawi a, cheng nuai sing chuang pawh a la ni theih tur thu a sawi. He lei ropui tak dawh tur hi sut tlang harsa a tih thu leh nasa taka a nawr hnuah, a hlawhtling ta chu MNF sorkar hnuaia hmasawnna ruhrel lian tak anih thu a sawi bawk. “He lei dawh tur atan hian a bul vela mite tana compensation pek tur cheng nuai 700 zet pawisa pawh DC office-ah a awm tawh a ni. He mi thilah hian Delhi ka kal apiangin BRO hotute leh finance ministry lamte nasa takin ka nawr ziah a. China ral lo lian ta se, a tangkai dan tur ka sawi chu Central lam pawhin an ngaih pawimawh phah hle bawk. Thlalehah emaw chuan Chief Minister Pu Zoramthanga emaw, Central Minister-in a lung an rawn phum ang tih ka puang nghal bawk a ni,” a ti.
Commerce & Industry Minister chuan he lei tangkai dan tur sawiin, “Hei hi tu sorkar kal tawh mahin an la tih theih ngai reng reng loh, Siaha/Lawngtlai District mipui Aizawl panna tur atan mellung pawimawh tak a ni dawn a. Tuna Kawlchaw Lei sei an dawh ai pawh hian a sei zawk ang a, tui a len lai ber pawha a chim phak ngailoh tura sangin kan dawh dawn a, Truck lian ke 14 nei pawh a insulpel zur zur thei dawn a ni. Tender pawh chhuah tawhin June thla hi chuan a thawktu tur Contractor hming kan hriat hman ka beisei,” a ti bawk.
“Pang khua atanga chhuk thla, Bualpui to Saisihchhuah kawnga lei lian dawh tur pawh central lam ka nawr nasa a. Hmasawnna ruhrel lian tak lei lian kan hlawhtling thei tur pawh hi a lawmawm ka ti hle bawk. He lei kan dawh tur hi Myanmar politics buai a reh hnuah insumdawn tawnna atan rotling tak a ni dawn bawk a ni,” a ti bawk.
Dr.R.Lalthangliana chuan Covid-in kum hnih leh thla thum engmah ti thei lova sorkar a tihbuai thu leh, MNF term hi kum hnih vel pawh tawisak ang mai anih thu a sawi a. “Sorkar kal tawh dangah covid a awm ve lova. Vawkpulh hri, lirnghing, ramri buai te; Myanmar, Bangladesh leh Manipur lam atanga kan unau raltlante lo hmachhawn a ngai ve lova, keini chuan heng zawng zawng hi kan hmachhawn a ngai a ni. Kum tawpa MLA General Election-ah Pathian leh mipui zarah Chief Minister zahawm tak Pu Zoramthanga kaihhruai sorkar hi a piang nawn leh ngei ang a. Zoram mipui tan nasa takin kan thawk tak tak thei tawh dawn a ni,” a ti bawk.
Pu R.Lalhnuna PAC member leh Pu Lalropuia Pachuau General Secretary pawhin thu an sawi a ni.
He hun hi Pu C.Lalrimawia, President South Block chuan a kaihruai a, Upa F.Lianzara Chairman, BCM S.Vanlaiphai pastor bial chuan hunserh a hmang. Pu Hmingthanzuala Secretary, South Block chuan report hrang hrang leh kalkhawmte lawmna thu a sawi.
Dr.R.Lalthangliana hi MNF General Headquarters hruaituten an tawiawm a ni.
Sd/-
(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/718
Dt.26.05.2023