MIZO NATIONAL FRONT
GENERAL HEADQUARTER
MIZORAM : AIZAWL

Press Release

MNF NGE NGE AN SAWRKAR LEH DAWN TIH CHU MIPUITE TITI A NI LEH TA: LALCHHANDAMA RALTE, ADVISER

Vawiin ni 2 June, 2023 Zirtawpni hian Mizo Hnam Runah chhung inkhawmna neih a ni a, hun hnihnaah MNF Adviser leh Minister ni bawk, Pu Lalchhandama Ralte chuan thu a sawi a. “Kum 2018 kan sawrkar atangin covid-19 vanga inkhuahkhirhna hrang hrang vangin kan sawrkar kum 2 leh thla 2 chiah mumal takin kan la kal a. Mi thil chikmi leh intellectual ho chuan ‘MNF hi in ropui khawp mai, hun harsa khawvelin a tawh laia mipui inngaihsak dante, ram in kalpui dan te leh state dang zawng zawngte ngaihtuah chuan ram inkalpui dan hi hotu mumal tak nei in ni tih a hriat, tiin fakna thu kan dawng a ni,” a ti.

Pu Chhantea chuan, “Lunglei Municipal Council inthlanah leh Zemabawk Local Council by-election ah min han vaw sil viau na a, Pathianin kan hotute finna a pe a, kha inthlan kha hmachhawn lo ta ila, tha ni a kan hriat ang khan lo kal ta tak tak mai ila, kumin kumtawp inthlanah chuan kan nasa lo mai thei. Darthlalangah chiang takin kan inhmu a, tawngtaina nen ngaihtuahna tak tak kan han hmanga chutah chiah chuan party organisation tha kan nihna alo lang chhuak leh a chiang takin kumtawp inthlanna pawh min hmuh lawk tir a ni,” a ti.

MNF Adviser chuan, “Kan party manifesto hi kan sawrkar hian a theih chin chinah tihlawhtling turin hma a la a. Tihhlawhtlin pawh ka ngah tawh hle reng a ni. Abikin ka Department chan Labour Employment & Entrepreneurship-ah thalaite skill development-ah nasa takin hma kan la a. India ram pumah skill development-ah state hmala tha Award kan dawng nghe nghe a ni. India leh Japan sawrkarin thawhhona thu an thlung a, a vawi khat nan nurse 50 zingah Mizo nula leh tlangval 20 an tling a, chungte chuan Gurgoan ah training an nei mek. An exam vawikhatnaah an la pass kim vek a, vawi hnihna an exam leh ang a, an la pass chhoh chuan September emaw October thlaah Japan-ah nurse turin an chho thuai dawn a ni,” a ti.

Education Minister chuan, “Kumin May thla khan Mizoram Mega Job Fair, Millenium Center chungah neih a ni a. Kan Dy.CM-in min hawnsak a, thalai mibik ten eizawnna an neih theihna turin company hmun hrang hrang atangin interview an rawn nei a. Chutah chuan mi 150-in eizawnna appoinment an hmu tawh a, chung zingah chuan British Army turin mi 2 an tling a. Hei bakah hian Singapore-a eizawnna nei turin mi 71 an tling bawk a ni,” a ti a. “He Mega Job Fair vang hian thalai mi 200 velin eizawnna an neih phah a. Lunglei leh Siaha lamah pawh Job Fair hi neih leh tur a ni,” an ti.

Pu Chhantea chuan, “Kan policy & programme bu V-3(4) ah education a kan hmalakna tur a inziak tel a. Mizorama zirna leh Mizo Nationalism hnuh hnaiha thangthar ten thiamna, hnam thinglung an neih theihna turin moral education an neih theih zelna turin theih ang tawkin hma kan la. An lo than len a nationalism thinglung an put theihna tur atan ṭan kan la a. Vawiinah hian kan sikul hi en rawh u, a tha em em tawh a, tun hmaa nu leh pa ten kan fate sawrkar sikula kal tir duh mang thin lo khan tunah chuan an kaltir ta hum hum a. Kan standard tisang turin theih ang tawkin hma kan la a, zirtirtute pawhin an awm hmun atanga internet facility-te nen zirna an pek theihna turin primary sikul zirtirtu te hi Tablet engemawzat pek turin ruahmanna scheme kan siam a. Central pawhin min rawn pe tawh a, tunah hian tablet 550 lei thlen tawh a ni a, 2652 kan lei leh tawh bawk a, khawvel changkanna mil zelin zirna kan kalpui zel a ni,” a ti bawk.

MNF Adviser chuan, “Kan Dan buah chuan, Mizote hnama dintu Pathian tih leh rawn chunga, Mizoram leh a mipuite rawngbawla hnam thil hlu leh ro te vawnghim tlat turin, Pathian leh kan ram tan Mizo National Front hi din a ni, tih a inziak a. MNF member kan ni ringawt pawh hi a ropui a, Congress party chu hnamdang din a ni a, Mizote tana din a ni ve lo. ZPM pawh, MNF nilo, Congress nilo tih ringawt hi an dinchhan a ni. In nghahna (Preamble) an nei lo a ni, a ti. MNF erawh chu Pathian leh kan ram tana din a ni a, kan Hnam tan, Zohnahthlak zawng zawngte rorelna pakhat hnuaia kan awm theihnan a din a ni. Myanmar lam kan unauten harsatna an tawk a, mi sing 3 chuang an rawn chhuk a. Sawrkar leh NGO ten kan theih angin tan lain kan lo dawngsawng a. India sawrkar chuan raltlante thawn kir turin thu an chhuah a, kan CM erawhin kan thawnkir ve thei lo, kan ei a kan in chhung chu kan unaute hian an ei in ve tur a ni a ti. Kan CM hi a ropui a ni. Inthliarna awm miahloin abikin zirnaah lehkhabu leh uniform kan pe a, tunhma chuan MNF an ngaisang ngai lo, ameherawh an ram a han buaia kan Pu Zoramthanga ropui zia an hmu a, an tuiral a, chawimawi an duh a, an fak a ni,” a ti.

MNF Adviser chuan, “Tunhnaiah Congress party an inban phengphung a, an PAC te an thiat a, block te an bang a.
ZPM nise nimin lawkah pawh an PAC te nilengin an thu a, an luhaina ber chu an phur lutukin bial viltu mi 35 an puang chiah mai chu an hniam ta ruai ruai a. Vawiinah chuan bialtin an invil thuah sup sup ta mai a, a tawpah chuan mipuite hian MNF nge nge an sawrkar leh dawn tih chu office leh tualzal titi a ni leh ta a ni,” a ti.

Hnam Run chhung inkhawm hi Pu H.Vanlalrawna General Secretary chuan kaihruaiin, Pi C.Lalrinsangi Adviser chuan hunserh hmangin Pu Lalramchuana Secy, Pu Francis Lalrammuana Secy. leh Pu Lalrindika Jt.Secy. te hnen atangin zin report ngaihnawm tak ngaihthlak a ni bawk.

Sd/-

(B.LALHMANGAIHZUALA)
Jt. Secretary
Media & Publicity Department
Mizo National Front
Memo No. MNF/Media 04/2023/725
Dt.02.06.2023