Mizo National Front
General Headquarters
Mizoram : Aizawl
Press Release
MNF in rorelna pakhat hnuaia min hruailuh a tum – K. Vanlalvena MP (RS)
Vawiin May ni 27, 2023 (Inrinni) hian ZORO huaihawtin, Vanapa Hall-ah Zofate Inkhawmpui Lian, hun hnihna hman a ni a. He hun hi Pu K. Vanlavena, MP (RS) NCC member, MNF Gen. Hqrs bawk chuan khuallian niin a hmanpui. Pu K. Vena chuan, “MNF khan independent a sual a ni mailo a, Zofate rorelna pakhat hnuaia min hruailuh a tum a ni. Chuvangin, kan chhehvela hmundangte pawh a bei thin. A tir atanga MNF in a tum ngar ngar chu India nena inremna a lo awm tak avangin, Zofate insuihkhawm duhtu ZORO movement a lo lian ta a ni, “a ti.
Pu K. Vena chuan, Zofate min funkim theiber pawl, ZORO a lo awm hi a lawmawm takzet a. A hmalakna a chhuanawm em em a ni. Inpumkhat dawn chuan buaina leh harsatna kan tawh a tul ve a. Chu chuan inhmangaihna leh inremna, tawng inhriat tawnna a thlen thin. Buaina avangin Zofate kan inhnaih sawt thin a, min ti pumkhat thin a ni. Kan inhmangaih tawn phawt chuan min awp mektute hian kan inpumkhatna leh rorelna pakhata kan awmna tur hi min dal hauhlo ang. Hei hi khawvel history ah pawh a chiang em em a ni, a ti.
Kan pipute kha hnam mawl leh un-civillized atanga lo chhuak an nilo a, civilisation-a lo awm tawh ngei an ni tih, darkhuang leh kan thiam thil te atangin a chiang hle a ni. Thlang an lo tlakin an khawl an kenglo mai a ni. Zofate hi kan chenna a lo hran tak avangin kan tawng a lo danglam ta a. Tawng thuhmunloh avangin thlahkhat kan nihna a bo lo a, hnam dang kan ni heklo. Kan lungrualna tur leh kan inzawmkhawm theihna tur anih phawt chuan kan hnam hming chu engpawh nise a pawilo. Hnam hming leh hming te pawh thlak a ni fo. Zofate hi hmun hrang hrangah awm mah ila, Kristian kan ni deuh vek mai a. Hei hian pumkhat kan nihna a tilang a, kan hnam hi Pathian thutak avangin nuaibo theih kan nilo a ni, a ti.
Zofate Inkhawmpui Lian, hun hnihna hi Pu Moses Lalramchhana, Vice President, ZORO chuan a kaihruai a, Pu Micheal Lalthanmawia, Treasurer, ZORO chuan hunserh a hmang. Political Party hrang hrang aiawhte atangin thusawi ngaihthlak a ni bawk.
Sd/-
(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/720
Dt.27.05.2023