Mizo National Front
General Headquarters
Mizoram : Aizawl
Press Release
MNF hi Zoram innghahna kawnga hma hruaitute kan ni – Pu Manuna, MNF Adviser
Vawiin July 8, 2022 Zirtawpni hian Mizo Hnam Runah chhung inkhawm neih a ni a, he hunah hian Pu TJ Lalnuntluanga, MNF Adviser leh Transport Minister ni bawk chuan Pang Zirlai Pawl(PZP) hruaitu hlui K. Lalhruaitluanga, Secretary, Peter Lalkhuma, Treasurer, Bungbangla Congress Unit, Lalruatkima PZP Sub Hqrs. Damdep Ex Vice President leh hruaitu dang pakua MNF-ah a lawmlut.
Pu TJ Lalnuntluanga chuan thusawiin, “MNF hi Zoram innghahna kawnga hma hruaitute kan ni a, MNF hian innghahna ropui deuh mai Pathian leh Kan ram tan tih thuthlung vuantute kan ni. Vawiin a mithar kan lawmluhte pawh hi Nationalism keng tlat tute an ni a, Chuvang chuan Pathian leh kan ram tan kan thawk ho zel dawn a ni,” a ti.
Pu Manuna chuan, “Mizoram hi Zohnahthlak hnam hrang hrangte awm khawmna hmun a ni a. Pang unaute, Lusei unaute, Lai unaute, Mara, Thahdo leh adangte inpumkhata chengho tur leh thawk ho tur kan ni,” a ti a. “Hnam Movement MNF-in kan kalpui danah hian, Mautam kum 1957-59 chho vel thleng a, kan harsatna tawh avanga MNF hi lo piang ta angin mipui hian kan ngai ang tih ka hlau a. Khuaiin mi a zuk a, a rawn vung chhuak ang chauh kha a ni. Hmanlaiin Mizote hi kan pi leh pu te atangin mi awpbehna hnuaiah kan awm ngai lo a. Mahni a Lal hran nei a, ro in rel ṭhin kan ni. Chu kan ro in rel thinna chu Kumpinu ram zauh zelin thuneihna, an thiamna leh hmanrua hmangin min rawn hneh chhuh a. Kan mi hmasaten kan ram humhimna tur a tan leh kan ram area chin an humhalhna Thingpui huan enkawltute an that a, vailen te pawh alo awm tawh a ni. Chuvangin kan pi leh pu te an sulhnu chhui zelin ram leh hnam hmangaihna kawngah leh Nationalism kan kalpui thinnaah hian kan chian a pawimawh em em a ni,” a ti.
Lawmluhte atanga thusawitu K.Lalrintluanga Secy. PZP Jt.Hqrs chuan “Thangtharte tan Politics ṭhain zirtirna awm chhun chu MNF Party hi a ni. Mizo hnam tan hei bak hi Political Party belh tur leh zawm tur thalaite hian kan hrelo a ni,” a ti a. “Chimrala kan awm loh nan kan hnam vengtu an nih avangin MNF Party hi keini chuan a rinthlak a ni tih kan chiang a, Pathian leh kan ram tih a ding ngam MNF Party hi kan rawn zawm a ni. Kan hnam tarlangtu Party awm chhun chu MNF Party hi a nia, social Media ah Party dangten bei mahse thalaite chuan a sawiseltu leh a beitute hi engtikah mah a ring ngam dawn lo a. Pathian leh kan ram tan tih neitu MNF party hi kan ring ngam a, kan rawn lut a ni,” a ti bawk.
Chhung inkhawm hi Pu K Vanlalauva MNF Treasurer in kaihruaiin, Pi Vanlaltirhkohi Secy.MNF Gen Hqrs chuan hunserh a hmang a, Pu Lalhruaitluanga Secy. hnen atangin zin report ngaihthlak a ni.
Sd/-
LALTHAKIMA
Joint Secretary
Media & Publicity Dept.
Mizo National Front
Memo No. MNF Media/02/2021/467
Dt.8.July.2022