Inthlan kan hmachhawn mekah pawh hian MNF hi sorkar leh ngei turin a lang riai ruai tawh a ni – Pu Vanlalzawma, Vice President.

Mi hausa ka ni lova, mi ropui pawh ka ni hek lo, mi naran mai ka ni a. Nangmahni ang tho, bial chhung mi ka nih avangin, in tan hruaitu leh hotu ni loin, in aiawh tura lo penchhuak ka ni.* – J.Malsawmzuala Vanchhawng. MNF Official Candidate.

Vawiin October ni 9, 2023 Thawhtanni hian Serchhip East & West MNF Block huaihawtin Thenzawl Field Veng Kawnah Campaign Kickoff leh Street Campaign neih a ni. He hunah hian MNF Vice President Pu Vanlalzawma chu Khuallian niin Pu C.Lalramzauva,Adviser to CM chu Khualzahawm a ni.

Khuallian Pu Vanlalzawma chuan MNF zawm thar mi 254 a lawmlut nghal a. Lawmluhte hi Congress atangin mi 137, ZPM atangin mi 81, BJP atangin 4 leh Neutral atangin 32 te an ni.

MNF Vice President Pu Vanlalzawma chuan by-election a Serchhip biala a ding kha a inchhir loh thu leh mipuite duhsakna a chan zawng zawng avang khan lawmthu a sawi nawn leh tih a sawi. Serchhip Biala MNF Official Candidate Pu J.Malsawmzuala Vanchhawng hi mipui duh rawn tak a ni a. Inthlan kan hmachhawn mekah pawh hian MNF hi sorkar leh ngei turin a lang riai ruai tawh a ni a ti.

Pu Vanlalzawma chuan tunhnaiah Manipur ah buaina lo chhuakin kan unauten harsatna an tawk a, an in leh lo leh Biak in te hal hial a ni. Kan unaute tuamhlawm kawngah kan sorkar hotuten theihtawp an chhuah a, ‘eitur kan neih chhung chu an nghei bik lovang’ tiin an thlamuan reng a. Heng zawng zawng hi chhut chian chuan MNF chak leh na tura Chung lam remruat zinga pakhat a ni. MNF hnuaiah chuan kan unaute hi an thlamuang tlat a ni a ti.

Pu Zawma chuan MNF kalkhawm te chu MNF Official Candidate Pu J.Malsawmzuala Vanchhawng tana theihtawp chhuaha, vawrh tling ngei tura ngenin, Campaign Kickoff a hawng nghal a ni.

Serchhip Bial MNF Official Candidate Pu J.Malsawmzuala Vanchhawng chuan thu sawiin, he bial tana nasa taka thawk turin a inpeih tawh a, a phur tawh hle tih a sawi. Zofate, tlang hrang hrang leh rorelna hrana thendarhte hi engtikah emaw chuan insuihkhawmin rorelna pakhat hnuaiah kan la awm a ring tlat tih a sawi a. Zofate insuihkhawm lehna hi MNF ṭanhmun nghet a la ni reng tih sawiin, kan ram hruaitu hmasate kha Chung lamin a hun taka min pekte an ni a ti.

J.Sawma chuan ‘mi tam takin kan ram thatna te, kan hnam duhawmna te hi hmuh kân an tum thin a. Ram ralmuang tak hnuaiah hun kan hmang mek te hi a hlutna kan hre lo fo. Good governance index ah Mizoram hi tehna sang ber hmu, pakhatna kan ni a. Hmasawnna daih rei leh tlo (sustainable development goals) ah pawh Mizoram hi hmahruaitu a ni. Covid hripui karah dam khawchhuah tuma kan ram hruaituten an beihna kawngah – nitin ei leh bar kawnga harsatna awm lo te, a tahtawla hmasawnna ruhrel lian din chhoh mek a ni zel te, te hian ram tana thil tha tizel ngam chu MNF hi a ni a ti.

MNF Adviser chuan Zoram mipuiin dinna nghet nei, thli tleh zawnga nghing mai mai lo MNF hruaina hnuaiah hian kan ram hi a him thin tih an hmu mek a. Neutral leh tlawmngai pawl te’n sorkar leh ngei tura min thlir lai hian Serchhip bial mipuiten karfung dik kan neih a hun ta. Chuvangin Pathian leh Kan Ram Tan titute kan nih vangin lungrual tak leh thuhnuai rawlh takin, inthlanpuiah hian chakna chang thei tura ke pen i tum ang u’ a ti.

Pu J.Sawma chuan thenkhat angin, mipuite hnena an mamawhte tihsak tiam duah hnua bawhzui pui lo mai ni lo, ngaihthlaksak zui loh ang kha a ti ve dawn lo tih a sawi a. Pathian leh mipui zara thlantlin a nih chuan Thenzawl College din chungchang pawh a rang thei ang bera zirchian leh bawhzui a tum tih sawiin, Thenzawl thalaite chu Lothazawlah hian chirhdiak ni lo phul chungah ngei an inkhel ngei ang tih a beisei thu leh hotute hriatpuina pawh a nei tawh tih a sawi.

MNF Candidate chuan Serchhip bial mipui tan theihtawp chhuahin, an hmahruaia, an hnung dawltu, nawr ngai na taka nawr tlat tur tein a intiam thu a sawi a. “Engtik lai pawhin in ban phakah ka awm reng anga, ka banphakah tlanchhe loin in tan theihpatawp ka chhuah dawn a ni. Mi hausa ka ni lova, mi ropui pawh ka ni hek lo, mi naran mai ka ni a. Nangmahni ang tho, bial chhung mi ka nih avangin, in tan hruaitu leh hotu ni loin, in aiawh tura lo penchhuak ka ni tih min hriatsak turin ka ngen che u a. Kan hma lawk inthlanpuiah pawh hian in rawngbawl hna thawh theihna remchang min siamsak a, in vote hlu tak min pe turin thinlung takin Serchhip bial mipui ka ngen che u a ni” a ti.

Pu C.Lalramzauva, Adviser to CM pawhin thu a sawi a. ‘MNF leh Congress kan hre tawh a. ZPM hi enchhin ang u’ tituten ZPM an han hrechiang a. Beidawngin an chhuahsan leh hum hum mai a nih hi. Pu Duhoma hi a intiamna tihlawhtling turin By Election ah kan thlangtling leh a. Min duhsak em, min ngaihtuah em tih i ngaihtuah ang u. Bial chhung mi ngei thlang tling ang u. Serchhip bial hi Pathianin mal min sawm dawn chuan Pu J.Malsawmzuala Vanchhawng hmang hian mal min sawm ang” a ti.

He hunah hian Pu VL Krosshnehzova, General Secretary, MNF Gen. Hqrs. Pawhin thu a sawi bawk.

Vawiin Thenzawl field veng kawna Campaign kickoff neih hi Pu Vanlalzawna, President, Serchhip West MNF Block chuan a kaihruai a, Rev. C.Lalrammuana, UPC, N.E.I chuan hunserh a hmang. He hunah hian MNF General Headquarters atangin Pu VL. Krosshnehzova, General Secretary, Pu H.Vanlalrawna, General Secretary leh hruaitu dangten an tel a ni.

Sd/-

LALLIANZUALA FANAI

Jt. Secretary

Media & Publicity Department

Mizo National Front

Memo No. MNF/Media/04/2023/875

Dt. 09.10.2023