Mizo National Front
General Headquarters
Mizoram : Aizawl

PRESS RELEASE

MNF HI SAWISEL LEH ELRELNA KARAH KAN KAL ZEL ANG – Pu Lalmalsawma Zasai, MDC

KAN SORKAR LEH NGEI KAN RING – Pu Vanlalzawma, Vice President

Vawiin ni 15 September, 2023 Zirtawpni hian Mizo Hnam Runah chhung inkhawmna neih niin Pu Lalmalsawma Zasai (Pu Patea) MDC chuan thusawiin, Siaha district-ah MLA bial 5 kan nei a, Pathian zarah vanduai thilah pakhat te chu ka inhloh ve mai thei kan ti a, Siaha MNF chuan kan sorkar leh ngei kan ring nghet bur a ni, a ti. Chuvangin, harsatna leh chhan hrang hrang avanga hnam party leh hnam tana martar te kalsan tawh tute leh an chhungte zawng zawng pawh vawiin niah hian Zofate te tan Hnam party a lo haw khawm leh vek turin ka sawm che u a ni, a ti.

Pu Patea chuan, Zofate hi Pathian hnam thlan Israel fate hlimthla a kal kan ni. Chuvangin, ram leh hnam anga kan kalna turah Israel fate Pathianin ahruai ang a hruai kan ni. MNF te hian heng hi kan hriat a ngai hle in ka hria. Nuamsa taka kal a, ram hruai tur kan ni lo. Zoramthar din turin hreawm tam tak kan sut tlang a ngai a ni, a ti.

MNF hian martar thisen nen hnam movement a kalpui a, Hnam pasaltha te hian martar a thi leh a dam te pawh hi Martar rilru pu a, ram leh hnam a inpe pumhlum a ni. MNF hi sawisel leh elrelna karah kan kal zel ang, chu chu kan chakna tur a ni. Zoram hi kan danglamna chu Pathian mite Zawlnei puan sak ngai ram kan ni a, ram hruaina kawngah pawh Pathian thu hi kan behchhan fo a ngai a ni. Chutah chiah chuan kan hotute anga belh tlak party dangah an awm ve lo.

Zofate hi Israel fate dungthulin hruaitu duhkhawp lo thin, hruaitu Mosia pawh duhkhawp lo ang ram leh hnam kan ni a, mahse sawisel leh sawichhiatna karah chunglam Pathian rawn thin tu hruaitu hian zoramthar chu min hruai thleng dawn a ni. Zofate min hruai tur hian football thiam emaw zaithiam emaw, haw haw a kal mai mai hi a ruat ka ring lo. Chuvangin Martar rilru pu chunga zoram hruaina hna hi kan thawh a ngai a ni. Kan politics thlir dan pawh kan sakhaw lungphum nghawrhnghing zawngin kan kal a rem lo.

Politics hian hnam min phuarkhawm tur a ni a, MNF hi Zofate tlankhawmna a nih fo a ngai a, tun boruak hian Zofaten himna kulhpui ah Zoram hi kan hmang mek a ni. Chuvangin, Pathian leh kan ram tan titu, party lungphum a dingnghet leh che sawn ve lova kum 60 chuang kal tawh kan ni. “Thenkhat ten tawlailirte an ring a, thenkhatin sakawrte an ring a. Keini erawh chuan Lalpa kan Pathian hming chu kan lam zawk ang” Sam 20:7 hi kan thinlungah a nung ang a, min khalhtu leh min hruaitu a ni tur a ni.

Mi thenkhatten election oriented-a policy phuahchawp, thar rang Policy hmanga mipui an vehthlem fo hi MNF tan a remchang ve lo. Politics hi hnatlang ang emaw pungkhawm satliah hmanga haw haw a kalna chi a ni lova, sum dawnna hmun a ni lo tih pawh kan hriat thar leh a ngai, a ti.

Pu Patea chuan, milar leh hausa ringawt hian hnam kalsiam an rel arem lova, Hnam leh ram tana martar rilru pu chunga ram rorelna hi kalpui tur a ni tih hi kan thinlungah nung reng sela, Lalpa’n min hruai chhuak ngei ang tih hi ka beisei tlat a ni.

Kan hotute leh MNF sokar ngei pawh famkim lo, duhthusam kan ni lo tih hi kan pawm ngam tur a ni. MLA ticket chanloh vang emaw duhtawk contract hmuhloh vanga chhuak mai mai tur kan ni velo, kan inkhengbet ve ngawt tur a nilo hnam poltics, policy mumal tak nei MNF party hi ading nghet zel dawn, a ti.

Tun election inpuahchah mekna hi kan hruaitute leh worker zawng zawng hian remchanna um a, lo in lak âmna hun tur a ni lova, tun hun reilote hmang hian kum 5 atan sawrkar thar chi kan thlak tan leh mek tih hriat a pawimawh a, Pathian leh kan Ram tan kan sawrkar leh ngei dawn a ni, a ti bawk.

Pu Vanlalzawma MNF Vice President pawhin thu sawiin, Inthlan kan hmachhawn dawna campaign committe din a ni tawh a, kan party President kaihhruainain hmalakna tur hrang duan a ni a, theih tawp kan chhuah mek zel a. Inngaitlawm leh thuhnuairawlh taka kan hmalakna hrang hrangte Pathianin mal a sawm ngei kan ring a, kan sorkar leh ngei kan ring nghet tlat a ni, a ti.

MNF Vice President chuan, 22nd New Siaha-ah MDC vanduai thlak takin boral avangin bye-election neih tur ani a, MNF Official candidate atan Pu Nelson Khenglawt chu dah a nih thu sawiin, sawlai bialah chuan BJP nena inkhing ber tur an nih thu leh BJP an hriat dan erawh Biak In haltu party, tih a ni thung a ti.

Pu Zawma chuan, inthlanna boruak nuam tak kan neih chhoh ngei kan ring a, Lawngtlai lam nen pawh thawhhona a tha em em a, Zoram pum boruak thlir hian Pathian hnathawh a lang a, kan sorkar leh ngei dawn tih hi achiang tulh tulh mai a ni, a ti bawk.

Hnam Run chhung inkhawm hi Pu C.Tawnvela Adviser chuan kaihruaiin, Pu R.Vanlalsawma Adviser, MNF Gen.Hqr.chuan hunserh ahmang bawk.

Sd/-

(B.LALHMANGAIHZUALA)
Joint Secretary
Media & Publicity Deptt
Mizo National Front
Memo No.MNF/Media/04/2023/842
Dt.15.09.2023