Mizo National Front
General Headquarters
Mizoram : Aizawl
Press Release
MNF HI PARTY DANGTE AIIN KAN DANGLAM- Pu D.Thangliana Ex-MLA
Vawiin April ni 24, 2023 Thawhtanni hian Mizo Hnam Runah chhung inkhawm neih a ni a, hun hnihna a thusawitu Pu D. Thangliana Ex-MLA, National Core Committee(NCC) member, MNF General Headquarters chuan thusawiin, MNF Party in a thil tum kan hotuten ruahmanna tha tak an lo kal pui tawhna leh MNF party hi party dangte aia kan dang lamna a sawi.
Pu D.Thangliana chuan, kan hnam pa Pu Laldenga hunah khan Policy tha tak an lo duang a, Mizote hi tu thuhnuaiah mah kan kun ngai lo va. Keimahni’n ram hran leh roreltu(lal) hran neiin kan luah chinah kan khawsa mai a. Kan luah chin ram leh hnam humhalh kan duh avangin phaitual thlengin kan pi leh pute’n lu chhum ban chhum huamin an lo bei a. British sorkar an hneh loh avangin mahnia thuneihna sang tak neiin British thlazar hnuaiah kan awm chauh zawk a ni a, kan ram tana thi leh thau pawlh a bei tute chu MNF party te hi kan nih avangin Party dangte aiin kan dang lam em em a ni, a ti a.
A sawi zelnaah, MNF te hian Mizoram zalenna sualin bei ta lo sela, tuna kan dinhmun hi kan chang phak lo mai thei. Kum 1966 khan Mizoram hi Assam State hnuaiah District Council pakhat ve mai kan la ni a. MNF Movement avangin kum 1972-ah Union Territory-ah hlan kai kan ni a. Inremna thuthlung vangin kum 1987-ah State-ah hlan kai kan ni leh a ni. He inremna thuthlungah hian tuna Mizoram leh hnam humhalhna tur dan engemaw zat siam a ni a. Chung inremna dan te chuan chimrala kan awm lohna turin Mizoram leh hnam hi min humhalh a ni a ti bawk.
MNF NCC member chuan, tunlaiin party thenkhatin mipui sorkar din intiamin, sorkar kaltawh zawng zawng kha mipui sorkar ni lo angin an puh a. Inthlang ram kan nih vangin mipui tam berin an duh a, an vote apiang an tling mai thin. Chu chu mipui siam sorkar a ni, Mizo Union atanga vawiin sorkar thleng hian mipui siam sorkar a la ni zel a ni a ti.
MNF Movement kum sawmhnih chhung kha Mizote’n thil kan thlir thiam theihna tura Pathian hun ruat, Pu Laldenga kha chumi atana hmahruaitu niin a lang a. Missionary-te kaltlanga Pathianin a zawn chhuah Mizote chunga MNF Movement hi Pathian hriatpui ngei a ni bawk. Pathian hian amah ringtute kalsual tur venhim nan, MNF Movement hi Pu Laldenga kaltlangin a rawn tar lang a ni kan ti thei bawk ang. Chuvangin, Pathian hriatpui leh hun ruat leh hriatpui na party anih avangin party dangte aiin kan dang lam bik a ni, Pu D.Thanga chuan a ti bawk.
Pu K Lalremsiama Ngopa VCP pawhin thusawiin, India ram pum huap ‘Gram Panchayat’ (Village Council) hna thawk thate inelna neih zawh takah Ngopa Village Council, Saitual District chuan Nanaji Deshmukh Sarvottam Panchayat Satat Vikas Puraskar (NDSPSVP) lawmman pakhatna an dawn chanchin leh hetiang dinhmun an din theih nachhan chu Ngopa khua mipui te, Mizoram sorkar leh a bik takin bialtu MLA Dr. L.Thangmawia hmalakna a nih thu asawi bawk a ni.
Mizo Hnamrun chhung inkhawm hi Pu H.Vanlalrawna, General Secretary MNF Gen .Hqrs in a kaihruai a, Pu H.Manga MNF General Headquarters secy. chuan hunserh a hmang bawk ani.
Sd/-
(LALTHAKIMA)
Joint Secretary
Media & Publicity Dept.
Mizo National Front
Memo No. MNF/Media/04/2023/669
Dt. 24.04.2023