Mizo National Front
General Headquarters
Mizoram : Aizawl

 

PRESS RELEASE

 

MNF CHUAN MIZO HNAHTHLAK ZAWNG ZAWNG RORELNA KHAT HNUAIA AWMTIR A TUM: Pu ZORAMTHANGA

Vawiin May ni 19, 2023 Zirtawpni chawhma dar 11 khan Mizo Hnam Run chhung inkhawmah MNF President leh Chief Minister Pu Zoramthanga chuan thusawiin, MNF thiltum chu Mizo hnahthlak zawng zawng rorelna pakhat hnuaia awmtir a ni, a ti.

“MNF Constitution en ila, kan thuthlungah Mizo hnahthlak zawng zawng rorelna khat hnuaia awmtir hi a thiltum a ni,” tiin a tirah chuan Manipur, Tripura leh Assam-a chengte chauh huamin, foreign-a chengte (IREDENTA) erawh a huam rih lo tiin, “MNF chuan India-a awmte chu chhanchhuah theih an ni a, hei hi a thiltum hmasa a ni,” a ti.

Pu Zoramthanga chuan kum 1965-ah Manipur Zo hnathlakte unaute nen  inkhaikhawmna tur an buaipui thu a sawi a. Kum 1966 ram buai hnuah pawh Manipur-ah operation neiin tam tak chu underground-ah an lo chhuak a, tam tak an martar a, thisena baptis an ni, a ti.

“Kum 1986 – India nen remna tura inbiaknaah Zo hnahthlakte chu rorelna pakhat (administrative unit) hnuaia awm turin kan nawr a. India Sorkar chuan (Danpui) Article 3-ah a awmsa avangin comment pek ngai an ti lo,” a ti a. Hei hi Peace Accord-ah chiang taka ziahlan a nih thu a sawi a. Manipur unaute nena hmalakna chu a inchiah ta vang vang a ni, a ti bawk.

“Tunah Manipur chu a buai ta a, keini’n kan duh dan kan barh luih a rem lo. Article 3-na angin duh an thlang thei. Keini chuan kan bei tawh a, martar thisena baptis thlap tawh an ni. Tunah chuan an kutah a awm tawh a, an inchhandam nan an duhthlanna a pawimawh. Keini chu Pu Denga hunlai atangin kan dinna a la ngai reng.”

Pu Zoramthanga chuan Manipur buainaah buhfai, damdawi leh an mamawhte pek a nih rualin tangkhangte hruaichhuak turin home ministry dawr a ni a. Tuivai lei pawh motor lian kal thei tura siam a nih thu a sawi a. “A piah lam pawh kan la inhuam vek a ni. Kan tanlak ve dan tur chu anmahniin an rawn chhawp ve a ngai,” a ti.

Refigee chungchangah, Covid vanga buaina tinreng leh sum harsatna karah Burma, Bangladesh, Manipur atangin raltlan an lo lut a. Hengho hian tlanna dang an nei lo, Mizoram hi an Jerusalem leh an thlamuanna kulhpui a ni, a ti.

MNF President chuan nationalism chungchangah, party dangin ‘Independence an sual lo’ tiin sawi mah se, kan thangthar leh zirlaiten an rawn chhang thin a, Nationalism an rawn championpui ta zel a ni. Thenkhatin nationalist rawn inti mah se sabengtung, sakei vun sin ang chauh an ni. Keini chu martar thisena lei leh a neitu – ram leh hnam tana kut ser kan ni. Tui anga nghet lote tan kan unaute thisen man a pek theih loh, a ti.

“Hming hrang hrang rawn invuahin tuma tih ngai loh – Campaign-na kutdawh account nen an rawn ti. Hei hi kalphung thar chu a ni! Engang pawhin kalphung thar ti mah se, kum 40 chhungin tuman an enchhin duh lo. Hnam neitu Zoram tana thisen hlantute thisen man chu midangin an claim thei lo,” tiin “Pathian leh kan ram tan tia nghet taka kan din tlatna hi felnaah ruat a ni a, malsawm kan dawnna chu a ni,” a ti.

Chief Minister chuan hripui leh buaina karah sum harsatna nasa taka kan tawrh thu a sawi bawk a – Central atanga sum hmuh tur Rs vbc 3000 vel a lo kal loh avanga indaih lohna chu MLA term thar lo awm turah tupawh sorkar se la sum bawm ruak hi an hnawhkhat thei ang em? Ngaihtuah tham tak a ni, a ti bawk.

Chhung inkhawm hi MNF Vice President Pu Vanlalzawma’n a kaihruai a, Rev. Biaksailova’n hunserh a hmang a. He hunah hian Manipur buainaa Zo hnahthlak thi (martar)-te sunna hun hmangin ngawi rengin minute khat an ding bawk a ni.

Inkhawmah hian Minister leh MLA, Corporator, Party hruaitu thahnem tak bakah Manipur atangin MLA leh chhimtu engemaw zat an tel.

 

Sd/-(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/708Dt. 19.05.2023