Mizo National Front General Headquarters Mizoram : Aizawl
Press Release
MIZORAMA ZIRNA HI A CHHIA A NI HRAN LO, CERTIFICATE THA TAK TAK NEI BUAIPUI NGAI TAM TAK AN AWM THUNG – Dr.R.Lalthangliana, Minister, H & TE
Vawiin May ni 16, 2023 (Thawhlehni) hian Dr.R.Lalthangliana Health Minister office chamber-ah ‘Zirna Lamtluang’ (Road map to higher education) tih Pu Lalhruaitluanga Founder, Zocareer Solutions ziah chu tlangzarhna hun hman a ni.
Tlangzarhtu Dr.R.Lalthangliana, H & TE Minister chuan vawiina a lehkhabu tlangzarh chu lehkhabu dang tlangzarh satliah ang anih loh thu a sawi a. A ziaktute nen hian Vanapa Hall-ah college zirlaite kohkhawmin he lehkhabu lam hawia inzirtirna neih chu zirlaiten nasa taka an hlawkpui ngei a beisei tih a sawi. Lehkhabu ziaktu Pu Lalhruaitluanga chu MSc IT (Information Technology), M.Phil leh doctorate degree nei a nih tih a tarlang a, Mizo thalaite hmasawnna tura rim taka a hnathawh chu a fak bawk. Engineer-te, Doctor te, Civil Service leh eizawnna kawng hrang hrang beitute tan he lehkhabu hi a pawimawhin, heng kawng zawng zawng hi a funkim vek a ni a ti.
Higher & Education Minister Dr.R.Lalthangliana chuan, “Mizorama zirna hi a chhia a ni hran lo a, certificate tha tak tak nei chhawr tlak loh buaipui ngai tam tak an awm thung. Chuvangin Mizoram zirna hi ngaihtuah chian a ngai. Kum zabi 21 naah kan chuangkai mek a, a hminga ti ve mai mai tan hna a hmuh theih tawh loh. Hlawhtlinna chang tur chuan tih tak takna nen, a thiam fal nih a ngai zel tawh a ni. Tun tum HSLC result chhuaka hlawhtlinna chang hote kha enge an thlen zel ang tih hi ka ngaihtuah nasa a ni,” a ti.
Health Minister chuan, “Covid vangin kum hnih leh thla hnih engmah thawk thei lovin kan awm a. Hma kan han la tan ve dawn chauh a, inthlan a hnai leh dawn mai si a, heti chung hian theihtawp kan chhuah zel a ni. ZMC-ah kuminah MBBS zir chhuak 68 zet kan nei a, foreign students paruk an tel a, kan lawm hle a, Mizoram tan mellung pawimawh tak a ni. Thil tak tak ti turin manpower lamah Mizote kan phai hle a, tan kan lak nasat a tul takmeuh a ni. ZMC-ah Professor tur pawh kan in hmu zo mang lo a, ram pawna mi pitar putar hmai chuar tawh cheng nuai hnih leh singnga hlawh turin kan inthlem thin a, a hahthlak hle a ni. Super speciality lamah Mizote kan tlachham lutuk a, tih takzeta tan lak zel kan ngai a ni,” a ti.
Dr.R.Lalthangliana chuan sorkar tirh khan RIPANS a tlawh thu sawiin, harsatna leh mutan an neih chu a zawt a. Central atanga an sum hmuh tur cheng vaibelchhe 480 tang reng mai chu thla hnih chhungin kum 2019 February thlaah a nawr chhuak tih a sawi a. Hei hian khum 100 leh post graduate zirna a keng tel a. Mizoram sorkar hnuai ni lo mahse; kum hnih hnuah chuan hmasawnna ropui tak an hmuh tur thu sawiin, Mizo thalaite eizawnna nasa takin a siam dawn a ni tiin, an hmalakna muangchang a tih deuh avangin vawi thum a tlawh tawh thu a sawi bawk.
Dr.R.Lalthangliana chuan ram rethei kan intih fo hi kan thanmawhbawk lai tak hmuh a ngai tiin, Indonesia leh S.Korea hmun pakhata an kal chanchin a sawi a. Indonesia hmun pakhatah chuan thingfanghma an thar chhuah atangin kumtin cheng vaibelchhe 20 an lei chhuak a. Seol khawpui atanga km 45 a hla hmun pakhata an vawk vulh pawh an vulh tlem lai berin sing chuang an vulh a. Hetah hian Very Doctor atanga a chaw petu thlengin eizawnna tam tak an siamsak a, heng zawng zawng kalkawng chu vawiina kan lehkhabu tlangzarhah hian a kalkawng a awm vek a ni, a ti.
Lehkhabu thlir lawkna chu Nl.K.Malsawmtluangi, Training & development Manager, Zocareer Solutions chuan a nei a.
Tv.R.K.Hnuna Director, Zocareer Solutions chuan lehkhabu tlangzarhna hun hi kaihruaiin, Rev.Lalbiakhluna, Asst.Professor, Aizawl Theological College (ATC) chuan hunserh a hmang a. Pu Lalhruaitluanga lehkhabu bustsaihtu chuan lawmthu sawiin hun a khar.
Sd/- (R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/706
Dt.16.05.2023