MIZORAM SORKARIN TUMAH A THLAHTHLAM DAWN LO

MIZORAM SORKARIN TUMAH A THLAHTHLAM DAWN LO

Mizo National front
General Headquarters
Mizoram : Aizawl

PRESS RELEASE

Mizo hruai hawte hmuahna
MIZORAM SORKARIN TUMAH A THLAHTHLAM DAWN LO: Er. Lalrinawma, Minister

Vawiin May ni 8, 2023 Thawhtanni chhun khan MNF Adviser leh Minister Er. Lalrinawma chuan Lengpui Airport-ah Manipur buai avanga Mizo unau lo hawte a lo hmuak a, Mizoram sorkarin tumah a thlahthlam dawn lo, a ti.

Er. Lalrinawma chuan Manipur buaina kara unaute lo haw chu a lo lawm a. Hun harsa tak kara harsatna tam tak paltlang tawh kan Chief Minister hova ruahmanna siam a hlawhtling chu fakawm a ti a. Central YMA leh mi tlawmngaite chungah lawmthu a sawi bawk.

“He hun khirh tak bakah tunhnaia Mizote kan tlankhawm a tul tlat thin hi mak hle mai,” tiin, khaw thlang lam atang leh khaw chhak lam atanga kan unau raltlan lo lut ta fo mai chu Pathian remruat a nih ngei a rin thu a sawi a. “Hetiang buaina karah hian Mizoram sorkar chuan tumah a en hrang dawn lova, a thlahthlam dawn lo,” a ti a. Manipur atanga hruai hawte chu duhsakna a hlan bawk a ni.

Central YMA President R. Lalngheta pawhin thutawi sawiin, “Kan Chief Minister a che chak em em a, hma a lo la zung zung mai a. Zan dar 11 thlengin a office-ah kan meeting hova, biak tul apiang thurawn kan pek angin a ti zung zung a. Home deptt nena kan thawhhona pawh a tha tak zet a ni,” a ti.

Hruai hawte aiawhin Tv. Emmanuel Lalngaihmanawma, President, All Mizo Medical Students Union, RIMS Manipur chuan lawmthu a sawi bawk a. Ani chuan social media thu thang dik lo – State dang mite an haw vek tawh, tihte chu dawt a nih thu leh, a rual veka Manipur an chhuahsan thu a sawi a. “Mizoram sorkar a che chak em em a, lawmthu kan sawi tak meuh a ni,” a ti.

Home deptt report danin, Mizo unaute hruai hawna turah Chief Minister ruahman angin kar kalta nilaini atang khan theihtawp chhuaha hmalak a ni a. Inrinni leh Chawlhni pawh chawl lovin hruaikir hna thawh a ni. Vawiina hmuahte hi mi 52 an ni a. May ni 7, 8 & 9 chhunga hruaikir tur zat chu an vaiin mi 196 an ni.

Hruai hawte hmuahna programah hian Dr. ZR Thiamsanga, MLA leh Dy Mayor Pu Thanglura te bakah sorkar official thahnem tak an tel a. MNF Gen Hqrs leh MNYF atangin hruaitu thahnem tak an tel bawk a ni.

Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/691
Dt. 08.05.2023

Leave a Reply

Your email address will not be published. Required fields are marked *