Mizo National Front
General Headquarters
Mizoram : Aizawl
PRESS RELEASE
“Mizoram mipuiin inthlanna felfai kan kalpui thei a ni tih lantira a awm kha a ropui ka ti” – Lalruatkima, Adviser, MNF Gen. Hqrs.
Vawiin November ni 17, 2023 Zirtawpni hian Mizo Hnam Runah chhung inkhawm neih a ni a. Hun hnihna Political session-ah MNF Adviser leh RD Minister ni bawk Pu Lalruatkima chuan thu a sawi. Pu Lalruatkima chuan Inthlan buaipuitu zawng zawng- election officials te, MPF, kohhran, tlawmngai pawl leh venhimna hna thawktu police zawng zawng te inpekna a lawmawm tih sawiin an chungah lawmthu a sawi a. “Mizoram mipuiin inthlanna felfai kan kalpui thei a ni tih lantira a awm kha a ropui ka ti bawk” a ti.
MNF Adviser chuan ‘Pathian leh Kan Ram Tan’ tia beitu MNF sorkar chu harsatna tinreng paltlang chungin, mipui nitin mamawh erawh hnianghnar takin a pe thei a. ‘Min dintu Pathian hian kawng lak lawhah min kalsan lo ang tih ka ring tlat a. Hlauthawng miah lovin MNF hian sorkarna kan lak leh hi ka ring tlat a ni. Hnehna kan chang a nih chuan mipuite hnenah lawm thu sawi hi kan tih tur hmasa ber a ni ang’ a ti.
Pu Ruatkima chuan ‘Sorkarna siam zo an awm lo ang. Thawkho sorkar a din a rinawm’ tih hi inthlan kan hriat tawh thlir letin a dik ngai lova. Party te zawkin a lian zawk behchhana mipui hruaikawi tuma an campaign auhla mai a ni. Inthlan zawh hnua thawhhona (post poll alliance) hi din chawp ngaiin a la thleng ngai lo. Mizoramah Sorkar inthlak a awm apiangin party leader te an dinnaah an tla thin. Kan leader Pu Zoramthanga hi a tlin loh hlauhna nei tumah an awm lo. Chuvangin he ram leh hnam tan hmachhawp hrang hrang kan neihte a hlawhthin theih nan Pathianin hun tha min pe anga, Zoram mipuiin hun min pe leh anga, sorkarna kan chang leh ngei ang. A chhan chu inthlan zawh takah khan MNF Party te hi a thawkrim leh taima, ṭangrual tha ber kan ni. Party ngelnghet kan nihna leh thawhrimna te chhunzawm zel ila Pathianin mal min sawm zel ang tih ka ring tlat a ni a ti.
MNF Adviser chuan ‘MNF hi Mizo nationalism bulpui, a kungpui neitu kan ni. Engtiklai mahin a nghing ngai lo. MNF in hnam thuthlung, Mizo Nationalism chawikangin hmala lo sela chuan hnamdang thlah fa kan hmeichhiaten an awi hle ang tih a rinawm. Chumi hlau chuan MNF in Mizo nationalism kha a chawisang a ni. Kan ram inrelbawl dan leh suk thlak han en hian, Israel fate ang maiin kan hnam lungphum Mizo Nationalism, Pu Laldenga leh hnam sipaiten an lo tuh kha thangtharte hnenah a thara pholang turin kan inbuatsaih chhoh zel a pawimawh a ni a ti.
Pu Ruatkima chuan Party thenkhat chu lal tum hrim hrim tumin an hmanhlel a. Anmahni ni lo zawng chu dik lo, fel lo, Pathian pawl pawh ni lo angin an chhuah a. Sorkarna chelh tawhten engmah ram tan tih nei lo angin an chhuah bawk a. Kohhran, Tlawmngai Pawl, Zirna in lian leh khawtlangah inlungrualna an tichhe nasa em em a. MNF chuan kohhran leh pawlah inlungrual lohna thlen turin hma a la ve ngai lo. ZPM party chuan Soviet Union Communist sorkar ang kha entawnin, Politburo ang chiah Thlan ve loh thuneitu sang VUC an din bawk a. Central India rama Communism awn party hoin “Non Congress Non BJP” din tuma hma an la ang chiahin Mizoramah pawh “non congress non MNF” tih chu an auhla a ni leh zel a. ZPM kalphung leh hlimthla thlir hian Communism chawisangtute ziarang vek an lachhawng a ni a ti.
Aizawl West II MNF Candidate chuan inthlan kan zova, a tute pawhin beiseina sang tak nen inthlan result kan nghak mek tih sawiin, khawthlang lam leh chhim lam bial, minority te tamna bial 10 ah hian bial 5 aia tlem lo MNF in lak a beisei thu sawiin, “kan lak bang hi Congress leh BJP in an lak a rinawm a. Kan lak ngai lohna bialah kutzungtang kan thliak thei tawh dawn a, kan chak a rinawm. ZPM hian bial 30 la awm atangin majority an lak phak hi a rinawm lo a ni” a ti.
Vawiin Hnam Run chhung inkhawm hi Pu C.Zahmuaka, Adviser chuan a kaihruai a, Pu Rochungnunga, Gen. Secy., MNF Gen. Hqrs. Chuan hunserh a hmang.
sd/-LALLIANZUALA FANAI
Joint Secretary
Media & Publicity Deptt
Mizo National Front
Memo No.MNF/Media/04/2023/919
Dt.17.11.2023