Mizo National Front
General Headquarters
Mizoram : Aizawl
Press Release
MIZORAM MI TANGKHANGTE HRUAICHHUAK TURIN THEIH TAWP CHHUAH ZEL A NI: CHIEF MINISTER
Manipur State buaina avanga Manipur-a Mizoram mi leh sa tangkhangte lakchhuah dan kawng awm thei apiang, Mizoram Chief Minister Pu Zoramthanga chuan dapin theihtawp a chhuah chhuanzawm zel.
Mizoram Chief Minister Pu Zoramthanga chuan Manipur State-a buaina chhuakah, remna a awm theih nan theihtawp a chhuah a. Manipur-a tangkhang Mizoram mi leh sate himna tur leh lakchhuah dan tur ngaihtuahin Mizoram Sawrkar chuan kawng tinreng a dap a. Thlawhnaa thiar chhuah tumin lakchhuah dan tur ruahmanna thui tak a nei bawk a ni.
Hetiang a nih lai hian Manipur Sawrkar bakah Central lam thuneitu ten, Manipur buaina chuan ziaawm lam a pan thu leh inhruaichhuah (evacuate) kher ngai lovah an ruat a. Mizoram mi tangkhangte an him tih sawiin, Manipur Sorkar chuan an ram chu “war zone” a nih loh avangin thlawhtheihna hmanga inthiarchhuah a remti lova. Mizoram chauh nilovin State dangte pawh a hranpaa thlawhtheihna hmanga inhruaichhuah a remti lo vek a. Remchang dang an dap ve hlawm a ni. Chuvangin, Mizoram pawhin ruahmanna hmasa anga inthiarchhuah rem lo mah sela, Mizoram Chief Minister chuan, “Engti kawng mahin kan mite ka hawisan dawn lo,” a ti a. Ruahmanna dang kalpui leh niin, Commercial Flight dang hmanga thiarchhuah tho a tum thu Chief Minister hian a sawi a ni.
Mizoram Chief Minister Pu Zoramthanga chuan thuneitute hnenah Commercial Flight tam zawk dah belh turin a ngen nghal a. Manipur-a Mizoram mi tangkhang mekte pawh thlawhna ticket (Imphal to Guwahati) te ngaihven a, Guwahati aṭanga Mizorama an rawn haw chhohna tur lirthei leh an thlawhna senso chu Mizoram Sawrkarin a tumsak vek tur thu a sawi bawk a ni.
Pu Zoramthanga chuan, Mizoram ṭhenawm state Manipur-a buaina chu tihtawp a nih thuai theih nan leh remna leh muanna a awm theih nan te theihtawp chhuaha hma lak zel a tum thu a sawi a. “Manipura Zohnahthlak kan chipuite himna pawh kan ngaihtuah reng a, an tan kan ding tlat zel dawn a ni,” a ti.
Manipur-a tangkhang, Mizorama haw duh zawng zawngte chuan Mizoram Home Department-in Helpline number a tarlanah in report ṭheuh ni se, a haw duhte tan flight ticket ngaihtuahsakin hruaichhuah dan kawng ngaihtuahsak zel a tum tih Chief Minister Pu Zoramthanga chuan a sawi bawk a ni.
Sd/-
(VL KROSSHNEHZOVA)
General Secretary
Media & Publicity Department
Mizo National Front
Memo No.MNF/Media/04/2023/686
Dt 05.05.2023