Mizo National Front
General Headquarters
Mizoram : Aizawl
Press Release
MIZORAM HI MIZOTE TA A NI A, MIZO NATIONALISM HI THANGTHARTEN CHAWISANG ZEL ANG U
HNAM MOVEMENT HRUAITU PU ZORAMTHANGA, PU TAWNLUIA LEH MIDANGTE NGAIHHLUTNA CHANG HRIA ANG U -DR.R.LALTHANGLIANA, MNF ADVISER
Vawiin October ni 27, 2022 (Ningani) hian Ramhlun Indoor Stadium-ah ‘V’ Battalion Rising Day lawmna hun hman a ni a.
He huna khuallian MNF Adviser Dr.R.Lalthangliana, H & FW, etc. Minister chuan thusawiin, Mizote hi tuma tihbuai loha kan awm laiin British hovin min awpbet lui a. British-India kan tih mai chuan Bristish India-ah tel lovin Excluded Area tiin (Mizoram) hi a hrangin min awp a, kum 1947-a India Independence khan Mizo aiawhte rawn hmasa miahlo khan India-in an ramah min rinlut lui ta a. Khatih laia kan hruaitute khan kum 10 zet chhung India atanga chhuah duhin thu an dah a. India chuan ngai pawimawh lo luiin min awplui zel tho a ni. India lak atanga inlakhranna (self declaration of Independence) chu March ni 1, 1966 khan MNF chuan a puang ta a ni, a ti.
Dr.R.Lalthangliana chuan, “Vawiin hi ni chhinchhiah tlak tak a ni a, Mizoram tana hnam pasaltha, an nunna hlu tak chan te, In leh lo chante kha kan ngai hlu em em a, chibai ka buk thar leh a ni. Mizo hnam tana bul min tan saktu, hun khirh leh harsa tak kara kan hnam min phochhuaktu Mizo Hnam Pa Pu Laldenga kha zahna chibai kan buk a. Hnam dangte laka min chimralna tura hmalatu niin Mizo hnam veina thinlung pian chhuah tirtu a ni. Kan hnam pasalthate kha an ngaihhlut awm em em a. British laka awmbeh luiha kan awm hnuin India sorkarin Assam hnuaiah hleih nei taka min awp laiin, chumi laka tal chhuah theihna turin kan hnam pasalthaten an bei a, India-in an ralthuam tha ber berin min bei a, kan in leh lo min hal sak a, kan hmeichhiate an pawngsual a, kan hnam pasalthaten nunna hlu tak an chan a. Khang zinga la damte leh nunna chan tawhte kha Mizo hnam tan rohlu in ni. Kan hnam pasalthate khan tlawm lova beih zel an huam laiin, Mizo mipui, kohhran leh NGO-ten inremna kawng zawng tura an tih kha mitui tla chunga pawmpuiin silai an tung zawk a, inremna hlu tak kan lo nei ta hi a hlu takzet a ni. Kan inremnaah khan ILP-te, kan hnam inhumhimna leh kan sakhaw leh culture vawn danahte Mizo hnam tan dan tha tak tak a kengtel a, article 371/G-te kha a hlu tak zet a, kan inremna thuthlungte kha thang leh tharten vawng nung zel ang u,” a ti.
“MNF-te kha kan in surrender lo, tam takin in surrender-ah min puh a, inches khat pawhin kan la tawlh lo. Tih tak taka ram tana beitute kha in hlu em em a, Mizoram tan nangni aia hlu an awm chuang lo, nangni rammute avangin Mizoram hian tun dinhmun hi kan thleng thei chauh zawk a ni. Vawiin thlenga Hnam Movement hruaitu min la dampui rengtu Pu Zoramthanga, Pu Tawnluia leh midangte hi an hlu em em a, ngaih hlutna chang i hria ang u, vawiin hian zahna chibai kan buk nawn leh a ni. Mizoram hi Mizote ta a ni a, Mizo nationalism hi thangtharten chawisang zel ang u,” a ti bawk.
Heta Khualzahawn ‘V’ bn.zinga mi Er.K.Lalsawmvela, MNF Adviser leh Adviser to Chief Minister (Tech) pawhin thu a sawi a. Pu R.Tlanghmingthanga, Ex-Minister, MNF Adviser pawhin he hun hi thusawiin a hmanpui bawk a ni.
Pu C.Zama Vice Chairman ‘V’ Bn. Welfare chuan inhmelhriattirna leh Battalion chanchin report ngaihnawm takin a pe a. Pu Rosangliana Secretary chuan Secreyary Report a pe a, Pu Vanlalruata Ralte, Treasurer, ‘V’ Bn.Welfare chuan an sum dinhmun report a pe bawk a ni. Martar-te sunna leh zah nan minute khat chhung ngawi renga din a ni.
He hun hi Pu V.L.Ringliana ‘V’ Bn.Welfare chuan kaihruaiin, Major Chawnglianthuama chuan hunserh a hmang.
Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/542
Dt.27.10.2022