Mizo National Front
General Headquarters
Aizawl: Mizoram
Press Release
MIZO NATIONALISM KENGTU MNF A SORKAR LEH NGEI A NGAI: LALCHHANDAMA RALTE
Vawiin 28, 2023 Zirtawpni hian Tuivawl bialah Pu Lalchhandama Ralte chuan campaign rusum a thlak zui zel a, Darlawn MNF campaign office-ah MNF party worker-te nen inkawm khawmin party member thahnem tak an tel a. He hunah hian Pu Lalchhandama Ralte MNF candidate chuan mithar 35 MNF party-ah a lawmlut.
Pu Lalchhandama Ralte chuan thusawiin, “Kumin inthlanpui kan neih turah hian MNF party chuan hnehna chiang takin kan chang leh dawn a ni” a ti a. Pu Chhantea chuan MNF sawrkar hian harsatna tam tak kan lo paltlang tawh thin a, hun harsa tawk fo mah ila Pathianin mak takin min chawisang leh thin, a ti a. Kan sawrkar chhung hian COVID 19, ramri buai, lirnghing leh Zofa hnam hrang hrang harsatna ten min delh rit thin hle a. Mahse, kan CM hoa theihtawp kan chhuah avangin kan miten harsatna lian lutuk tawk loin heng harsatna te hi Pathian kaihhruainain kan paltlang theia kan lawm hle a ni, a ti bawk.
Pu Lalchhandama chuan MNF party chu hnam thuthlung kengtu leh chhawmnung zel tur a nih thu sawiin, Mizo nationalism vanga piang a ni a, Mizo hnam nihphung leh sakhua venhim chu a mawhphurhna a ni a, a tlanchhe ngai dawn lo a ti a. Kan unau, Burma, Bangladesh leh Manipur-a awm ten harsatna lian tak an tawh lai pawhin MNF sawrkar chu an kiangah a ding tlat reng a, sawrkar laipuiin kan mite thawn haw tur leh chhinchhiah bikna siam tura min nawrluih viau pawhin MNF sawrkar chuan a dodal tlat a, kan unaute hi kan hum tlat a ni a ti a. MNF sawrkarin INPUI nih tlin taka a hlen chhuah avang hian Zofa hnam hrang hrang te MNF sawrkarah hian an thlamuanhin an lawm hle a ni. Hetianga kan hnam a insing sak mup mup lai hian Mizoramah hian Zofa hnam hrang hrang te huap zo taka kuah khawmtu tur sawrkar a awm zel a ngai a. Kumin inthlanpui kan hmachhawn turah hian Mizo mipui ten uluk takin an ngaihtuahna hmang se a duh thu sawiin, “Mizo nationalism keng nung tlattu MNF party hi a sawrkar leh ngei ngei a ngai a ni,” a ti.
MNF adviser Pu Lalchhandama Ralte chuan Tuivawl bialah pawh hnehna kan chan leh ngei a beisei thu a sawi a, inthlan puan a nih atanga vote thlak ni inkar a zim em avangin a bial chhungah campaign hun a ngah thei tak loh thu a sawi a. Tuivawl bial mipuite chu an chhenna inah tlawhchhuaka vote dil vek duh hle mah sela hun a nei tawh lo tih hriatpui a, kum 5 chhunga Tuivawl bial tana a hnawthawh chu Tuivawl bial MLA zel tlak a nih leh nih loh teh nana hmang turin a chah a. Kum 5 chhung khan kan ram leh Tuivawl bial tan theihtawpin hna ka thawk a,heng ka hnathawh hmang hian min teh rawh u, ka hnathawh hmang hian MLA zel tlak ka nih leh nih loh teh ka cho a ni, a ti.
Darlawn party office inkhawm hi Darlawn MNF group vice president pu Lalthakima’n a kaihhruai a. MNF general headquarter MNYF vice president pu Zodinpuia pawhin thusawiin Mizoram puma MNF party dinhmun report a pe a, MNF party-in sawrkarna a lak leh ngei tur thu leh Tuivawl bialah chuan Pu Chhantea’n Mizorama inhnehna sang ber a chan ngei a rin thu a sawi bawk.
Sd/-
(PC LALRINHLUA)
Secretary
Media & Publicity Department
Mizo National Front
Memo No.MNF/Media/04/2023/904
Dt 27.10.2023