Mizo National Front
General Headquarters
Mizoram : Aizawl

Press Release

MINISTER DR.R.LALTHANGLIANA’N FAINA HNATLANG A VAI LIAM HNUIN, LUANGMUAL BRANCH YMA PLATINUM JUBILEE KHARNA HUN A HMANPUI.

Vawiin November ni 8, 2022 (Thawhlehni) zing dar 9:30 (AM) khan MINECO Zawlzau (Open Gym bul)-ah PHED & CYMA Coordination Committee-2022 chuan ‘Tui hna humhalh, fai leh thianghlimna lama thawh dunna an neih hnatlang vai liamna’ hun hman a ni a.

Dr.R.Lalthangliana, Health Minister chuan hna tlang vai liamna hun hmang paha thusawiin PHED leh CYMA hian ‘kan rama tuihna humhalh leh awm sa tihpun’ thupuia neiin kum 2022 khan thawh dunna thuthlung (MoU) an lo siam tawh a. Mipui zirtirna nasa takin an kalpui tawh a, group leh branch YMA-ten tuihna humhalh tha inelna thianghlim kumtin an buatsaih thin a, department lamin a remchang angin sumin an pui bawk a, tuihna tam tak kan neih belh a, a lawmawm hle a ni. Vawiinah Faina hnatlang vai liamna hun kan hmang thei hi a lawmawm takzet a. Biate khua hi a zawn zatin fai lawmman vawi 5 zet an dawng tawh niin ka lo hria a, khaw entawntlak leh chhuanawm tak an ni. PHED leh CYMA-ten thawhdunna nghet tak leh tha em em mai an neih avang hian India rampum tuihna humhalh tha khua thlanah pawh Leng khua, Ailawng leh Sialsir khuate thlan an lo ni tawh bawk a ni. India ram khaw fai inelna (Swachhsurvekshan Grameen) ah pawh kum 2019 khan North East Zone-ah Mizoram chuan lawmman pakhatna a lo dawng tawh a, kumin 2022 hian lawmman pahnihna kan dawng leh a. Mizo mipuiten faina kawngah tan lain hma lam i pan zel ang u, a ti.

Pu R.Lalngheta, President CYMA pawhin tuna kan hun hman hi a vawi hnihna a ni a. Kan hmalakna avang hian tuihna kang tawhna hmunah tui hna thar kan nei leh a. Pathian nia kan inkhawma kan fai hle laiin, kan in leh a vel a fai thin lo. A lang lai chauh ni lo, khawi hmunah pawh fai ang u. Vawiin hnatlangte hian Mizo mipuiah thinlung thar min put tir se, fai hi Pathian an na ber anih avangin fai zel ang u, a ti bawk.

PHED & CYMA Coordination Commitee 2022 hian November ni 3 khan Chief Engineer Zone-I, PHE office-ah committee pawimawh tak an lo nei tawh a. Fai leh thianghlimna kawnga mipui zirtirna runpui atan faina hnatlang neih a lo rel tawh a. Aizawl daifem leh ualau lai hmun 6 thlan bik neiin City Branch YMA leh PHED thawltute nen faina hnatlang an nei a ni. He faina hian nasa takin thawm nei se, Zoram mipuiin faina kawnga rahbi khat tala hma lam a pan hi a buatsaihtuten an duh takzet a ni. He hun hi Prof.Lalnuntluanga, General Secretary CYMA chuan a kaihruai a ni.

Vawiin chawhnu hian Dr.R.Lalthangliana Health Minister hian Luangmual Branch YMA Platinum Jubilee kharna, Luangmual YMA Hall-a neih chu khuallian niin a hmanpui a. “YMA hi kum 1935-a din a lo ni tawh a, a lo rei ve leh ta hle mai. Helai Hall hi kum 20 kal ta a, RD Minister ka nih laia ka kut chhuak a lo ni tawh a, hun kan hmang leh thei hi a lawmawm ka ti hle. Luangmual khua hi kum 100 chuang zeta upa, Sailo Lal Pu Nikhuma leh a fapa thut hmun a ni thin bawk. YMA hi awm ta lo se, kan buai khawp ang, kohhranah chuan pawl hrang hrang kan awm a, YMA chuan Zofa zawng zawngte min huap a. Kum 2 chuang zet Covid-in min tihbuai lai khan YMA hi kan thahrui ber an ni. YMA chu mi zawng zawng min khaikhawmtu, hnam dang neih ve loh an ni. YMA thuvawn pakhat Tlawmngaihna hlutzia hi kan lei li hian a sawi chhuak zo lo a ni,” a ti.

MNF Adviser Dr.R.Lalthangliana chuan, “YMA chu fan tawp nei lova mite tanpui thintu a nih avangin a hlu takzet a. Hetih rual hian hmasawnna thar kawngzawh zel tur kan la nei a ni. Kan rilru chhungril tak taka awm hi a taka parchhuah tir a ngai a, YMA-te hian kan ram chhiat leh thatah mawh kan phur a ni. Central service-ah kan tling thei ta manglo hi YMA ang pawha ngaihtuahna kan sen a ngai a, Supper Specialist Doctor hrang hrang pawh lak tur kan nei lo a, tan kan lak nasat a ngai hle a. Khawvel hi chhoh en lo ang u. Kum zabi 21-na hi Zofate tan chona nasa tak ni se la, khawvel hi chhuk zawnga kan en thei lo anih pawhin chho zawng ni lo, a phei zawng talin i en hram hram ang u,” a ti bawk.

Sd/-

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/548
Dt.08.11.2022