Mizo National Front
General Headquarters
Mizoram : Aizawl
Press Release
MI TIH BEIDAWN A, MI BEIDAWNNA HMANRUAA HMAN TUM AN AWM: VICE CHAIRMAN, MNF PUBLICITY BOARD
Mizoram University Students’ Council chuan MZU Auditorium-ah VIRTHLI TALK an buatsaih a. He hunah hian Pu J Malsawmzuala Vanchhawng, MNF Publicity Board Vice Chairman chuan MNF aiawhin thu a sawi.
Pu J Sawma chuan, “Mipui leh ṭhalaite tih beidawn a, chu an beidawnna chu hmanruaa hman tum an awm niin a lang a. A pawi hle. Kan ram chhe ta vek ang a sawi te, ṭhalai rual chhe ta vek anga sawi te leh, kan politician te eiruk hmang vek anga chhuah te a awm ṭhin. Hei hi kan ram awm dan dik tak a ni lo. Mi ṭha tam tak karah mi ṭha lo an awm ve a ni chauh zawk,” a ti a. “Hun kal tawhah kan hotuten theih tawp chhuahin ram tan hma an lo la tawh ṭhin a, hma pawh kan sawn ve zel a ni. Slam area awm lohna State kan ni te, kawng hrang hranga eizawng tura remchannain a hual vel ram kan nite hi a vanneihthlak a, remna kan neih hlutzia leh vanneihthlak ziate hi i chhut ang u,” a ti bawk.
Pu Sawma chuan, “Mizote hi social media hian min khawih nasa hle a. Social Media hmanga kan thu hriatah hian thlitfim loh information a tam a. Tum nei rana thu dik tawk lo thehdarh a tam hle a ni. Hei hian a chhe zawnga nghawng a nei tam hle. Aia upa zahna te, Zonun zemawi te leh khawtlang inrel bawlna thlengin a nghawng; ram inrelbawlnaah pawh nghawng a nei a ni,” a ti a. “Mipuite’n Social Media-a kan thil hmuh leh hriatte pawng awih nghal ngawt zel lovin buk ila, a dikna hriatchian tum ila a ṭha khawp mai,” a ti bawk.
MNF Publicity Board Vice Chairman chuan, MNF leh India inremna anga MZU dinin hma a sawn zel chu lawmawm a tih thu a sawi a. “SEDP hmangin kuthnathawktute dinchhuahna turin theih tawpin beih mek zel a ni. Kawng hrang hrangin hmasawnna ruhrel pawimawh pawh a ṭhang zel a ni. Kan kawng te pawh a ṭha ta viau a, Zirna kawngah pawh sokarin hma a la nasa. Ni za inhlawhna pawh sorkar kal taah ni 60 bawr chauhte an inhlawh theih laiin zaa za kan inhlawh thei a ni. Ṭhalaite tan skill development-ah sorkar a kal nasa em em bawk a ni. He sorkar-in hmasawnna hna a thawh hi sawi mai sen loh khawp a ni hial a ni,” a ti a. “Mahni zawn ṭheuha change siamtu nih ṭheuh tumin hma i sawn zel ang u,” a ti bawk.
He hunah hian MPCC aiawhin Pu Lalsawta President a tel , ZPM aiawhin Dr Vanlalthlana a tel bawk a. Zirlaite aṭangin zawhna leh chhanna hun hman a ni bawk.
Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media/04/2023/653
Dt 11.4.2023