Mizo National Front
General Headquarters
Mizoram : Aizawl
Press Release
Mi sangtel rual thisena lei, MNF party hi Pathianin mal a sawm thin -Pu Zoramthanga, MNF President.
Vawiin July ni 9, 2022 Inrinni hian Mizo Hnam run, Sub Headquarters Lunglei ah MNF chhung inkhawm hun hman a ni a. He hunah hian MNF party president, Chief Minister, Pu Zoramthanga chuan a hmanpui a. Pu Lalchhandama Ralte, Adviser MNF Hqrs, Education Minister ni bawk chuan a hmanpui bawk.
Pu Zoramthanga chuan, “Mi sangtel rual thisena lei tawh MNF party hi he ram tungding tura Pathianin a ruat a ni. Hun khirhtak kara beisei phak baka sawrkar hmalakna a ropui hi Pathian malsawmna a ni a. Pathian remruatna a lo thlen chuan dan theih a ni lo. Kan fel vang ni loin, a duh dan anga kan kal thin avangin a hun takah mal min sawm thin a ni.” a ti.
MNF party President chuan, MNF party chu beiseina leh hmathlir nei thui, a eng zawnga thlir thin party a ni a. A din tirh ata, kalphung thlak ve hauh lo a, Pathian leh kan ram tan tih kalpui ngar ngartu a ni. Kan khingpuiten min sawiselna tur pawh an hre tawh mang lo a, kan hnathawh leh thiltih vangin an chil a put mek a ni, a ti a. Hruaitu bawra buai leh central lama tlachhia party te tan dinchhuah a harsa hle ang, a ti bawk.
Chief Minister hian, Lungleia MZU Southern Campus panna kawng siamna tur leh tui lakna tur buaipui nan sum dah anih thu a puang bawk.
Thusawitu dang, Pu Lalchhandama Ralte, Education Minister, MNF Adviser ni bawk chuan, “MNF sawrkar, Education department hnuaiah mi 1500 chuang thawktu lak a ni tawh a. India ram hmundanga an tih theih ve miah loh, hripui leng karah board exam hlawhtling taka buatsaih thei state kan ni a. Zirna inah Zonun zemawi leh nationalism inzirtirna kalpui a ni a. Leader nei tha leh buai ve ngai lo, MNF chu a sawrkar nawn ngei opposition lam pawhin an ring a ni,” a ti.
Pu J. Malsawmzuala Vanchhawng, MNF adviser pawhin, MNF-a a luhchhan sawiin, hrileng kara MNF sawrkar hmalakna a ropui a tihzia a sawi a ni.
Chhung inkhawm hi Pu Lawmawma Tochhawng, MLA, MNF Sub Hqrs. Lunglei President in kaihruaiin, Dr. K. Vanlallawma chuan hunserh a hmang a. Pu Sailothanga Sailo, Treasurer, MNF Sub. Hqrs. Lunglei chuan lawmthu sawiin hun a khar a ni.
Sd/-PETER CHHANGTE
Joint Secretary
Media & Publicity Dept.
Mizo National Front
Memo No. MNF Media/02/2021/468
Dt. 09.07.2022