Mizo National Front
General Headquarters
Mizoram : Aizawl

Press Release

Vawiinah hian Hnam Martarte, an taksa kan zingah an awm ta lo. An chanchin leh inpekna kha theihnghilh lo ila, thangtharte hian an ngaihlu thar zel dawn a ni – Dr.R.Lalthangliana, Adviser, MNF Gen.Hqrs.

Vawiin September ni 20, 2023 Nilaini hian MNF Serchhip East Block huaihawtin ‘Martarte Ni’ vawi 44- na, New Serchhip YMA Hall ah hman a ni a. He hunah hian Dr.R.Lalthangliana, Advser MNF Gen.Hqrs. leh Minister ni bawk chu khuallian a ni.

Dr. R.Lalthangliana chuan Martarte Ni-ah tak Serchhip Damdawi in lian, Nuai 2100 senga sak thar tur lung a phum thei chu lawmawm a tih thu sawiin, Mizo hnam tana nun hlantu hnam martar leh pasalthate leh an chhungte, in leh lo chana, tawrhna chitin reng tuartu zawng zawng leh remna avanga lokir zawng zawngte he Maratarte Niah hian kan chawimawiin zahna chibai kan hlan a ni’a ti a. Mizote khawvel hriata min phochhuak a hnam zahawma min tarlangtu, mizo hnam dinchhuah nana zalenna suala beitu Hnam Pa Pu Laldenga zahna chibai a buk thar tih sawiin vawiinah hian Mizo thinlungah Dam reng rawh se tiin chawimawina a hlan bawk.

Pu Thangtea chuan thingbul lungbul be thin kha Pathianin missionary te kaltlangin khawvel eng min hmuhtir a. Kan hnam rohlu, zonunmawi hi chhawm nuna a awm reng theih nan hnam thinlung nationalism hi nei thar theuh turin kalkhawm te a chah bawk. MNF Adviser chuan ‘Kan hnam thendarha awm hi Pathian remruatna hnuaiah rorelna pakhat hnuaiah kan la awm ngei ang tih ka ring tlat a. Ramri hian hnam kan nihnate, zofa kan nihna te hi a daidang thiang lo tiin Raltlan kan unaute chu central duh loh danin kan kuangkuaha kan tuamhlawm a ni. Chief Minister in an thlavang a hauh tlat a. Tunah Manipur leh Bangladesh atangin kan unauten min rawn fin leh a, kan ei ang an ei anga, chaw an nghei kan phal ngai dawn lo a ni’ a ti.

Pu Thangtea chuan Pu Laldengan he hnam movement a din tirh, an inhmuhkhawm hmasakber nia an bible chhiar kha ngaihtuah let ila. Thenkhatin sakawr te, tawlailirte an ring a. Keini erawh chuan Pathian hming kan lam zawk ang tih a nih kha. Hnama min siamtu, ram neia min siamtu Pathian hi a hmasaberah kan dah tur a ni. Pathian leh Kan Ram Tan tih changvawna neitute kan ni a. Vawiinah hian Hnam Martarte, an taksa kan zingah a awm ta lo. An chanchin leh inpekna kha theihnghilh lo ila, thangtharte hian an ngaihlu thar zel dawn a ni a ti.

Dr. Thangtea chuan Zalenna suala beituten la inhuam viau mah se mipui, kohhran leh zirlaipawlte ngenna angin kum 1986 June ni 30 khan MNF leh India sorkar chuan inremna tluantling, (memorandum of understanding) ziah a ni a. Hei hi Hnam sipaite an tlawm vanga in surrender a ni lo tih ka sawi duh a ni.Mipuiin kan ngenna avanga lo chhuak an ni a, inremna khan Hnam thinlung (nationalism) a tibo lo a. Hnam pasalthate hnathawh chhunzawm turin thangtharte kutah an dah ta reng a ni a ti.

Dr. R.Lalthangliana chuan vawiin Martarte Ni-ah hian nunna hlantu kan pasalthate khan fam dairial pawh chang ila kan sakruang Mizoram tan tiin kir leh tawh lo turin ram daiah nun an hlan a, kan ram leh hnam dinchhuah nan theihtawp chhuahin kan bei zel dawn a ni a ti.

He hunah hian Serchhip Biala MNF Candidate J. Malsawmzuala Vanchhawng, Adviser, MNF Gen.Hqrs. pawhin thusawiin kan ram leh hnam tana nunna hlantu Martarte zahna chibai a buk a. Mizote hi hnam tlemte niin, he ramah hian Pathianin min dah a. Kan ram kan hnam a him nan huaisen taka kan din a tul thin a ti. Kan piputen an ram nektute chu Cachar phai thlengin an run a, huaisen takin ram an humhalh thin a ti.

Pu J.Sawma chuan kan hnam leh sakhua him nan, mahnia ro inrelbawlna nei turin kum 1966 khan Hnam Sipaite chuan Zalenna an sual a. He ram tana bei ngam, zalenna sual ngam kan ni hi thangtharten an la ngaihsan zel dawn thu a sawi. Tuten emaw sawisawp thin mahse, zalenna suala nunna leh thisen hlantu tam tak Martar kan nei a. Tin, zalenna suala penchhuak la dam, kan zinga awmte hian zalenna sual ngam, hnam huaisen kan nihna an tarlang a, chawimawi an phu a ni. Ram tana Nunna hlantu Martarte leh tuna kan zinga awm hnam sipaite hi chhuang taka kan sawilan fo a tul ka ti hle a ni.

Kan chhehvelah chimrala awm tawh hnam tam tam an awm lai hian zalen leh ralmuang taka, a hlang deuh thawa he rama kan chen theihna chhan hnam martarte leh zalenna sualtute zahna chibai ka buk thar mawlh mawlh a ni a ti.

Health Minister Dr. R.Lalthangliana hian vawiin chawhma khan Serchhip Damdawi in lian, khum 100 awmna tur sak thar tur Lungphum a phum a, sorkar hotu lianten an tawiawm. Tlai lamah Chhingchhip khuaa Theitui sawrna MIFCO hmunpui a tlawh bawk.

Vawiin Martarte Ni puala hun hman hi Pu C.Lalsiamthara, Vice President, MNF Serchhip East Block chuan a kaihruai a, Capt. Vanlaltharzuala, CO, Serchhip bial chuan hunserh a hmang bawk. Martarte sunna hun, minute khat ngawi rengin neih a ni. Health Minister Dr. R.Lalthangliana hoa New Serchhipa Martarte Ni hmannaah hian Pu T.Liansiama, Gen.Secy. MNF Gen.Hqrs. leh Pu MS. Dawngliana, Gen.Secy. MNF Gen.Hqrs. leh hruaitu dangten an telpui a ni.

Sd/-
LALLIANZUALA FANAI
Joint Secretary
Media & Publicity Deptt
Mizo National Front
Memo No.MNF/Media/04/2023/848
Dt.20.09.2023