Mizo National Front
General Headquarters
Mizoram : Aizawl
Press Release
MANIPUR BUAINA AVANGA HARSATNA TAWKTE TLAWHIN DR. L.THANGMAWIA MLA LAMKA AH BUHFAI BAG 400 KENGIN A KAL
Nimin May ni 10, 2023 khan Dr. L.Thangmawia MLA, MNYF Headquarters President chu Lamka-ah Manipur buai avanga harsatna tawkte tlawhin a kal a, harsatna tawkte eitur buhfai a hlan nghal bawk.
Manipur buaina avangin Lamka pankhawm an tam a, buhfai eitur lamah harsatna an tawh tan chungchang ngaihtuahpui turin Zomi Students’ Federation(ZSF) ten Dr. L. Thangmawia, MLA , President MNYF ni bawk chu an rawn ngen a. Ani hian rang takin Chief Minister Pu Zoramthanga leh Supply Minister-te hnenah thlen nghalin, Mizoram sorkar chuan kan unau Zofate tan hian buhfai quintal 200 an ruahman sak nghal a, a dah tur leh harsatna tawk mekte kan turin Dr. L.Thangmawia, MLA hi nimin khan Mizoram sorkar hotuten an tir chho nghal bawk a ni.
Manipura zofa harsatna tawk ten Dr. L.Thangmawia hi tha taka lo dawngsawngin “hun harsa an tawh laia an mamawhte Mizoram sorkarin rang taka a lo ngaihtuahsak naah leh thawn chho mai lo va, MLA ngeiin a hmuna a tlawh chu lawmawm an tih thu te, an nitin mamawhte Mizoram kaltlanga lakluh a ngaih rih dawn thu te, Imphala tangkhang mi 20,000 vel zette sipai venna hnuaia Lamka lama hruaichhuah hna kalpui mek chu nimin (10.5.2023) khan zawhfel an beisei thu te, Lamka-ah pawh mahni in chhuahsan raltlan tam tak an awm mek thute MLA hi lo hrilhin, Mizoram atanga puihna leh tawngtaisakna an dawn tawh zawng zawngah an lawmzia te, tun dinhmunah chuan khawvel hmun hrang hranga zofate chu Pathian tih lohah chuan an innghahna a nih thute” an lo hrilh a ni.
Dr Thangmawia chuan amah lo dawngsawng- tute hnenah ‘Mizoram mipuiin Manipur buai avanga kan unaute tawrhna chu mahni tawrhna anga an ngaih thu leh Manipur-ah remna leh muanna a awm thuai an duhsak tak zet thu te, kohhran hoten an tawngtaisak reng thu te’ a hrilh a. Mizorama tlawmngai pawl hrang hrangten anmahni pui tura theihtawp an chhuah mek thu leh he buaina avanga Mizoram a raltlan rawn lutte pawh “I inpui i lo thleng ta” tih banner nen an lo hmuah thute hrilhin Mizoram khawtin maiin unau an nihna ang taka an lo dawnsawn zel thu a hrilh bawk.
Buhfai hi ZSF kaihhruainain nimin khan Kuki Khanglai Lawmpi(KKL) hnenah bag 20 leh Vaiphei People’s Council(VPC) hnenah bag 20 pekchhuah nghal a ni a, vawiin lamah a mamawh dangte hnenah ZSF hian an lo sem chhunzawm leh dawn a ni. Dr.L.Thangmawia hian Assam leh Mizoram buai laia Manipur lama Zofa kan unauten oil lama min lo puihna te, buhfai leh thil hrang hrangah min lo puih tawhnate sawiin, Zofa hmun hrang hranga awmte hi harsatna leh manganna kan tawh laiin, kan inhmangaih a, kan inlainat tawnin kan inpui thin a, Mizo ze dik tak kan lantir thin a ni, a ti.
Dr Thangmawia chuan Mizoram atanga zirlai, Lamka-a tangkhang mek panga(5) te buaipui nghalin an hawna tur a ruahman sak a, tukin zing khan Manipur chhuahsan fel tawhin Mizoram an rawn pan mek a ni.
May ni 10, 2023 thlenga Manipur atanga sahimna zawnga Mizorama rawn lut chhinchhiah zat chu 3583 an ni.
Aizawl District – 934
Champhai District – 68
Kolasib District – 1351
Serchhip District – 4
Khawzawl District – 12
Saitual District – 1214
Total – 3583
Chief Minister Pu Zoramthanga kaihhruai Mizoram sorkar chuan kan unau sahimna zawnga inpui Mizoram rawn belte hi theihtawp chhuahin a pui zel bawk a.
Manipur tualchhung buaina avanga Sahimna zawnga Mizoram rawn lut, kan unaute tan Mizoram sorkar chuan ni thum kal ta chhung khan Buhfai quintal 640 a pechhuak tawh a ni.
Aizawl dist. – 510.40 qtl.
Kolasib dist. – 110 qtl.
Saitual dist. – 19.60 qtl.
MNF chuan CM Pu Zoramthanga kaihhruai sorkarin term khat chhunga harsatna hrang hrang a tawh zozai en hian hun khirh laia Mizoram enkawl tura chunglam belruat ngei a ni tih kan pawm a, heng harsatna danglam tak takte sorkar anga a hmachhawn dan hi ropui kan ti hle a ni. Zofate hi tunah enkawltu sorkar hran hran hnuaiah awm darh rih mah ila engtik niah emaw chuan rorelna pakhat hnuaiah awmin hnama min dintu duh dan angin kan la vul ngei ang tih kan ring tlat a ni.
Sd/-
(LALLIANZUALA FANAI)
Joint Secretary
Media & Publicity Dept
Mizo National Front
Memo No.MNF/Media/04/2023/695
Dt.11.05.2023