Mizo National Front
General Headquarters
Mizoram : Aizawl
Press Release
MANIPUR BUAI CHUNGCHANGA MNF PRESIDENT STATEMENT
A hnuaia tarlan ang hian Mizoram Chief Minister, MNF President ni bawk Pu Zoramthanga chuan vawiin 05.05.2023 hian Statement a siam:
“Manipur buaina chungchanga Zofa hmun hrang hranga awmte tana thuchah
“Manipur State-a buaina awm chungchang thuah Manipur-a awmte chauh nilovin, ṭhenawm ram state zawng zawnga awmte, Mizoram aṭanga awm te, Imphal leh Manipur chhunga chengte zawng zawngin harsatna namen lo kan tawk a. Chumi chu buaipuiin tunah Mizoram Sorkar pawhin, a bik takin Mizoram aṭanga Manipur-a awm te, an harsatna sutkianna turin theihtawpin hma kan la a. Union Home Minister Amit Shah te, Manipur Chief Minister te nen pawh inbiain, official level-ah pawh nasa takin hma kan la mek a ni. Tin, an himna tur pawhin vawi tam inbiain hma kan la bawk a. Tin, chutih laia kan tuma chu kan zirlaite leh a bik takin Imphal-a tangkhang laklawhte an lo chhuah thuai theihna turin thlawhna pawh charter-a hire saka Imphal aṭanga han lakchhuah tumin tunah kan bei mek a, tih thuai pawh kan tum a ni. Hemi thuah hian pawi kan tih em em chu hetianga buaina a lo chhuah takna hi a ni a. Dawhkana thil sawi fel theih ni sela dawhkana sawi fel ṭha kan ti a. Amaherawhchu, chutiang nilova mipui leh mipui inkarah buaina a lo chhuah tak si avangin hemi chinfelna tur hian Manipur Sorkar leh Central Sorkar pawh hian chak taka hma an lak kan duh a; hetiang buaina hi a kal zel ṭha kan ti lo. Tin, he buaina avang hian a bik takin Mizoram lam depa tlang mite chu Churachanpur leh a chhehvela mite pawhin hatsatna chi hrang hrang tawkin ei leh bar kawngah supply hmuhna tur buhfai emaw, oil lam a ni emaw, thil dang a ni emaw an tawk palh ang tih kan hlau em em a. Hetiang hi an lo tawk palh a nih phawt chuan kan theihtawpin Mizoram lam aṭang pawhin lo ngaihtuahpui leh an lakluh theihna tur ngaihtuahpui zel kan tum bawk a ni.
“Kan tlang mipuite, kan Zo hnahthlak unaute harsatna tawk hi kan theihtawpa harsatna tinreng an tawh hi buaipui a, sutpui a, a theih ang zela champion pui zel pawh kan tum a ni. Hei hi kan policy – a bik takin keini Mizo Hnam thinlung nei, lo champion puitu te hian khawia mi pawh, kan unaute Manipur-a mi an ni emaw, Burma lama mi an ni emaw, hmun danga mi an ni emaw, keimahni unaute an ni tih hriaa, an harsatna theihtawpa tihfelpui leh chinfelpui a, huaisen taka ṭanpui zel hi kan tum a ni a. Chu kan tumna chu kum 1966 aṭanga vawiin ni thlengin kan la kal danglam chuang reng reng lova. Chuvangin Manipur lama kan unaute pawh, dawhkana ṭhua chinfel hi kan duh ber a, amaherawh chu harsatna chi hrang hrang an tawh chuan theih ang tawkin kei leh ka Sorkar-te hian puih zel kan tum a ni.
“Tin, chu chang nilovin, tangkhang ten Aizawl an lo thlen ngei theihna tur pawhin hma kan la a. He lama an lo thlenna mai nilovin Imphal lama kan Mizo hnahthlak tangkhangte pawh, Churachanpur leh a chhehvel tlang rama him taka an thlen theihna tura hma la turin Manipur Chief Minister pawh nasa takin ka nawr a, ka lo ti ngei ang e, a ti bawk a. Engpawh ni se, heng thil te hi kan tlang mite tan a ṭha a. Harsatna leh an tan politics-a rahbehna emaw, thil dang emaw thleng lova a kal ngei theihna turin keini pawhin theihtawpa puih zel kan tum a ni tih pawh ka sawi tel duh bawk a ni,” tiin.
Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media/04/2023/685
Dt 05.05.2023