Mizo National Front
General Headquarters
Mizoram : Aizawl

Press Release

 

LUNGLEI AH MI THAR 63-IN MNF ZAWM THAR AGRICULTURE MINISTER-IN YMA BUILDING CUM MARKET SHED HAWNG

Vawiin June ni 8, 2023 (Inrinni) hian Mizo Hnamrun Lungleiah Lunglei West South Block bial atanga MNF party zawm tharte lawmluhna hun hman a ni a.

Minister Pu C.Lalrinsanga, MNF Adviser chuan MNF zawm thar Rahsi veng, Hauruang, Bazar veng, Venghlun leh Serte Unit atangin ZPM-60 leh Congress -3, a vaiin voters 63-te chu MNF-ah a lawmlut.

Lawmluh paha thusawiin, Pu C.Lalrinsanga chuan, vawiina ram mipui inrelbawlna tha duha lo kalkhawmte chungah lawmthu ka sawi a. MNF nih hi a na mai lova, MNF chu Zoram leh hnam tana din a ni. Falu hlauh mai ni lovin, zum leh hriam karah kal hmasaten nasa takin an lo bei tawh a, tuipui leh khawmualah ruang hlawm loha kalsanin kan ram tan an lo bei nasa tawh hle a ni. MNF chu Pathianin a mite kaltlanga a din a ni a, economics independent chu reiloteah kan la kalpui thuai ang a, nakinah chuan Zofate hi rorelna pakhat hnuaia kan awm hun a la awm ngei ka beisei tlat a ni a ti.

Mizote hi kan pipute culture atangin thianghlim taka kal thin kan ni a. Kan ramah Pathian thu a loluh hmain culture tha tak kan nei a ni. Vawiin hian Central sorkar pawhin lo hria se ka duh chu, engzati nge kan Mizo pui, kan Kristian pui Manipura kan unaute buaina hi a en liam reng tih ka zawt a. Rawn ngaihsak thuai rawh se tiin ka ngen a ni. Mizote hi a tul hunah chuan India sorkar pawh lo do reng tawh, Central chala chil hnawm ngam hnam kan lo ni tawh tih hi ka sawi nawn leh a ni a ti.

MNF Adviser chuan, “MNF leh Congress angte angin ZPM hian ruhrel leh mawngkhal a nei ve si lo a. Congress pawh hi chhe viau angin lang mahse, ruhrel tlem a zawng an la nei ve a. Ruhrel hi tisa in a tuam phui loh chuan engtihna mah a ni lo thung, MNF chu ruhrel lian tak, tisain phui tha taka a tuam mek a ni,” a ti bawk.

Pu Vanlalhmuaka President, MNF Sub-Headquarters Lunglei pawhin hman ni lawka LMC inthlan chungchang sawiin sorkar ngei tuma tan an khawh nasatzia thu a sawi a. Mahse, Pathian remruat lo chu thil a kal fuh ngai lo nia sawiin, LMC inthlan laia kan tha chhattute nen lungrual takin ke kan pen ho leh mek a, kan fel vang ni lovin, Pathianin inthlan leha sorkar turin kan tan a ruat zel vang zawk a lo ni. Vawiina kan inlawmluh bak pawh chhawlchhin enge maw zat kan nei a, kan hmalakna zawng zawng chu puanchhuah a la hun rih lo a, vawiina mite hi lawmluh hma hruaitute chauh an la ni. Sorkar tura inpuahchah ve mek kan unau ZPM-te hi a tirah a ki an la sang lutuk a, an uaithla ta raih raih mai a. Pathianin MNF-te hi min sorkartir leh ngei dawn a ni a ti.

Rahsi veng mithar lawmluhte aiawh atanga thu sawitu Lalrinawmi chuan, “Kum 2018 khan ZPM-ah ka lut a, Zonu Secretary hmasa ber ka ni a. IT leh Publicity enkawltute zinga mi ka ni bawk a, Social media-ah chuan ‘Romi’ tiin ka indah. ZPM chhungril buaina tuartute zinga mi ka ni a. LMC inthlanah theihtawp chhuahin kan bei a, hnehna kan chang a. Block leh Unit-te min dah hniam ta daih a, kan duh loh zawng MLA candidate an rawn dah a, kan rilru a na em em a. Tunah hian Mizo Hnam party-ah lawm tak leh thahnemngai taka thawk turin kan lolut a ni,” a ti.

Venghlun Unit lawmluh aiawh atanga thusawitu Pu Rozuala chuan, “Kum 2017 atang khan Venghlun ZPM din hmasa bertu ka ni a, Unit President ka ni reng thin. Theihtawp chhuahin kan seh ve char char a, kalphung thar kan lo hmachhuan ve em em kan thlir laiin; kalphung hlui ai pawha chhe zawkin kan kal leh si a. ZPM hi kalphung thar beiseitute tan beisei tur a awm lo. Kan nupa in MNF-a lut tur hian Pathian kan rawn thlap a, Pathianin min remtihpui a. Kan chuanna Lawng pil mek atangin Lawng lianah kan lo chuangkai ta a ni,” a ti bawk.

He hun hi Pu C.Pu Hmingthantluanga, General Secretary, MNF Sub-Headquarters Lunglei chuan a kaihruai.

Agriculture Minister Pu C.Lalrinsanga hian tukin khan Lunglei Rahsi venga YMA building cum Market shed a hawng a. He building hi YMA leh sorkar tangrualin a tul ang a pianga mipui tana chhawr theih tura an sak a ni.

Hawn paha thu sawiin, Pu C.Lalrinsanga chuan, “He building hi hun rei tak atang tawha YMA-te nen kan lo ruahman tawh a ni a, tukinah a taka hawn theiha hmel hmai fel tak kan nei ta hi a lawmawm hle. RKVY hnuai atanga sum cheng nuai 15 vel ka pawh chhuah atanga sak a ni a, chu chu Market shed ni tura ruahman a ni a, mipui leh YMA-ten kan hman tangkai theih tura sak a ni. YMA-te hi khawtlang nu leh pa chanchang ber in ni a, ram leh khawtlang tana hmasawnna sawr chhuaktu ber in ni. Tuna kan hawn pawh hi mipui market atan leh YMA tan tangkai taka hman anih theih nan duhsakna ka hlan a che u,” a ti.

Sd/-

(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/762
Dt.08.07.2023