Mizo National Front
General Headquarters
Mizoram : Aizawl

Press Release

LMC-ah Chairman,Vice Chairman leh Executive Councillor pahnih an awm dawn – Pu Tawnluia,

Vawiin April ni 13, 2023 Ningani hian Mizo Hnam Runah chhung inkhawm neih a ni a. He hunah hian Pu Tawnluia Sr.Vice President, MNF leh Deputy CM ni bawk chuan thu a sawi.
Pu Tawnluia chuan mipui hnena thuneihna tam zawk pek chu kum 2018 inthlan dawna MNF auhla a ni tih sawiin, Lunglei Municipal Council din chu MNF Manifesto tihhlawhtlinna a ni a ti. ‘Khawpuiah Municipal Council pek a ni ang’ tiin kan tiam a. Lunglei, Champhai leh Kolasib pawhin Municipality hi an dil a. MNF sorkar hnuah cabinet meeting in a pawma, Lunglei MC din a ni. Inthlan buatsaih a nih zawh hnuah LMC ruangam a rawn ding fel chho ta a,LMC-ah hian Chairman,Vice Chairman leh Executive Councillor pahnih an awm dawn a ti.

Pu Tawna chuan LMC a thlantlin te chu thawhpuiah a sawm nghal a, danin a phal chinah chuan chak takin theihtawp a chhuahpui dawn tih sawiin, ‘chumi tur chuan Councillor thlantharte pawh lo inkau deuh se ka duh a ni’ a ti. Lunglei khawpui enkawlna kawnga tih tur a awm chuan Sorkar angin kan tlanchhe dawn lo a ti bawk.

Dy. CM chuan ‘vawiinniah hian ka sawi duh chu Lunglei khawpui hi MNF sorkar hian a ngaihthah hran lova. LMC a kan tlin loh avangin kan ngaihthah dawn lova, a hma aia nasa in kan ngaihsak dawn a ni’ a ti. Pathian leh kan ram tan tiin kum 1961 ah Pu Laldenga hoin MNF hi din a ni a. Chutih lai atanga tun thlenga kan innghahna chu, ‘Thenkhatin tawlailirte an ring a, thenkhatin sakawrte an ring. Keini erawh chuan Lalpa kan Pathian hming chu kan lam zawk ang’ tih a ni. Pathian leh kan ram tan, tiin he thuthlungah hian kan inbual fo a ngai a ni a ti.

Pu Tawna chuan ‘MNF chu Lalpa hian kan tihtheih piah lamah kawng min siamsaka, min hruai thin a ni. LMC ah kan nil hi chuti em em a MNF demna leh chauhna tur a ni lo. Politics -ah chuan san chang leh hniam chang a awm. Chunglamin Kan harhna tur, kan hriat tur min hrilh tawh. Kan thawk zel anga kum 2023ah chakna kan chang leh ang’ a ti.

Vawiin Mizo Hnam Run chhung inkhawm hi LMC inthlana MNF Candidate te pual a ni a. Mizo National Women Front General Headquarters chuan LMC MNF Candidate te hi pangpar an hlan vek a, AMC Mayor Pu Lalrinenga pawhin present a hlan vek bawk. Inkhawm hi Pu D.Thangliana, National Core Committee member, MNF chuan a kaihruai a; Pu Rochungnunga, Gen.Secy. MNF Gen. Hqrs chuan hunserh a hmang. He hunah hian LMC MNF Candidate atangin thutawi ngaihthlak a ni

Sd/-

LALLIANZUALA FANAI
Joint Secretary
Media & Publicity Dept
Mizo National Front
Memo No.MNF/Media/04/2023/655
Dt.13.04.2023