LENGPUI AIRPORT TROLLEY TIHCHHIAT MAN HU CHAWITIR DAWN

      Lengpui Airport-a passenger trolley engemaw zat hnathawh nan hman a nih chungchangah Mizoram Assembly House-ah hial auchhuahpui a ni a. GAD (Aviation) chuan February 13, 2023 khan hnathawh nan trolley hmangtute hrem an nih tur thu leh February 14, 2023 khan office order (thupek) thar a tichhuak nghal a ni.

Passenger trolley chungchanga politics inbeihna a lo chhuak hi pawi tiin MNF Media & Publicity Department chuan a theih anga zirchiangin thil awm dan sawifiah tulin a hria a. Trolley tihbawlhhlawh avanga Lengpui airport cheithat hnathawh kal lai titawp (stay) zawnga Congress party an che ta mai hi demawm kan ti hle.

October 20, 2022 khan Principal Consultant, GAD (Aviation) hovin Lengpui Airport-a passenger trolley indaih lohna sawiin meeting an nei a, sorkarah trolley 100 lei belh an dil a. November 10, 2022 khan Finance Dept. chuan remtiin, hun a duh rei loh zawk nan restricted tender hmangin February 17, 2023 thleng hawngin quotation chhuah a ni a, supplier thlan fel a ni. Supply Order issue atanga a rei lo berah ni 30 velah trolley chu hmuh beisei a ni. Tin, hemi hma hian baggage trolley repair-na tur spare part pawh Delhi-ah chah a ni a. A lo thlen ni – Feb 13 leh 14 khan repair zawh fel nghal a ni bawk. Tun dinhmunah baggage trolley hman theih zat chu 74 a awm mek a ni.

February 13, 2023 khan GAD (Aviation) chuan office order tichhuakin hnathawh nana baggage trolley hman a khap nghal a, an tihchhiat man hu chawi turin a hriattir nghal a. Tin, February 14, 2023 khan trolley hman dan tur order khauh tak a tichhuak bawk a ni.

Lengpui Airport cheithat hna – Upgradation/Improvement of Difference facilities at Lengpui Airport, Mizoram under NESIDS (Rs. 19.59 crore) hi DoNER hnuai niin, kum 2021-22 chhungin Rs 783.60 lakh release tawh a ni a. Second instalment release hmabak Rs. 1175.40 a awm mek a ni.

Mizoramin Airport puitling a neih theihna turin Chief Minister Pu Laldenga khan Prime Minister Pu Rajiv Gandhi hnenah tawngkamin a sawi thin a. January 13, 1988-ah DO letter thawnin a bawhzui nghal a. March 1988-ah Survey Team dinin hmun li – Kawmzawl (Lunglei), Suanghuantlang (Muallungthu), Lungleng (Aizawl) leh Lengpui (Aizawl)-te chu thla ruk chhungin an survey zo a. Lengpui Airport Preliminary Survey Report chu NAAI (AAI a la piang lo)-in pawmin kum 1991 khan Central High Level Team an lokal ta a ni.

Tichuan, Lengpui Airport hi kum 1995-ah sak tan a ni a, a tira sum senso chu: Finance Commission – Rs. 57.00 crore, Planning Commission – Rs. 40.92 crore leh State Government – Rs. 21.05 crore, a vaiin Rs. 118.97 crore a ni.

December 12, 1998 khan khatih laia Dy. Prime Minister Pu LK Advani-a’n a hawng a ni. Lengpui Airport ang hi India ramah airport dang a awm lo, State sorkarin a survey, a sak leh a enkawl awm chhun a ni.

Sd/-

MALSAWMPUIA RALTE

Jt. Secretary

Media & Publicity Department

Mizo National Front

Memo No. MNF/Media/04/2023/605

Dt. 17.02.2023