Mizo National Front
General Headquarters
Mizoram : Aizawl
Press Release
- Nationalism thinlung pua engpawh kan tih zel chuan, hlemhletna leh thil diklo hian hmun a chang theilo -K Vanlalauva Treasurer MNF, Ex Minister
Vawiin June ni 10, 2023 Inrinni hian Lalvunga Battalion, Mizo National Army Rising Day vawi- 56 na lawmna hun, KV Resort , Durtlangah hman a ni a. K Vanlalauva Treasurer MNF, Ex Minister ni bawk chu khuallian niin, AMC Mayor Pu Lalrinenga Sailo chu khualzahawm a ni.
Khuallian K Vanlalauva Ex minister chuan Lalvunga Battalion, Mizo National Army Rising Day vawi- 56 na lawmnaa kalkhawm zawng zawngte chibai a buk a, Mizo hnam hi vai awp behna atanga chhuah kan duh a, India chuan chu chu a phallo a, MNF chuan chumi chu a do a, tan a la a, kan inkap ta anih kha, kha kha in in pekna rah chhuah vek a ni a ti. Pathianin MNF-te a hruai dan leh a chhanchhuah dan hi a makin a ropui a. Kan hnam Movement a ral theihna leh harsatna tawp khawka an awm lai pawhin engtin emaw hian Pathianin kawng a siam sak thin a ni tih hi a chiang em em a ni ati.
Pu K Auva chuan, “Nationalism thinlung pua engpawh kan tih zel chuan, hlemhletna leh thil diklo hian hmun a chang theilo a, midangte tana malsawmna a kengtel zawk a ni,” a ti. Sorkar hna thawhnaah leh kawng engkimah nationalism thinlung kan put tlat chuan hmabak eng tak kan nei zel ang. Kum sangbi tamtak liam taa hnam ropui leh changkang lo ni tawhte nen hmasawnna kawngah tehkhin chi kan nilo a, hnam hmangaihna thinlung puin theihtawp chhuahin kan um zel zawk tur a ni, a ti a.
Khuallian chuan Mizoram leh hnam chhana an nunna hlu tak hlantu hnam Martar-te chibai buk a pawimawh thu sawiin, anni chuan mahni aia hnam dah hmasain Mizo hnam dinchhuah nan an inpe a, i chawimawi ang u, a ti a. Mizo Hnam Movement avanga kawng hrang hrang a tuar tu te, sawisak leh hliam tuar te, lung In tang leh In leh Lo chante i hre reng ila, heng tawrhnate hi ram leh hnam tan vek a ni tih hre reng ila, chutiangin ram leh hnam tana rammu zawng zawngte pawh kan hre reng a ni, tiin a sawi bawk a ni.
Khual zahawm Pu Lalrinenga Sailo Mayor AMC pawhin thusawiin L Batalion member lo kalte a chhuan thu a sawi a, ram ropui tak takte hian an sipai ropui, zalenna sualte hi an zahin an ngaihlu em em thin a. Keini pawn kan martarte leh an thlan te hi kan zah a, thangthar lo awm tur te pawh in an la ngaihhlu dawn chauh a ni a ti.
Mayor Chuan Mizoram tana lo tuartu, zalenna sual kawnga sulsutute hi in hlu hle a, Martar-te tluk zetin tuna dama te pawh hi in ropui a, in thawhrim rah kan seng mek a ni a ti bawk. Tin Nationalism rilru put hi a pawimawh em em a. Hnam rilru pu lo te chu an ral zel tur thu a sawi bawk. Hnam rilru pu lo Ila eng chen nge kan thlen ang kan hre lo a. Kan hruaitu hlui, kan mihuaite lo thawhrah hi tuna Mizote hian kan nawmsak phah mek a, tuna thalaiten rilru sang tak pua hmasawnna ke kan pen chhan hi in thawhrim rah a ni a ti bawk.
He hun hi hunkhatnaah Pu Saihnuna Sailo Leader L- Battalion Re-union , chuan kaihruaiin, hun hnihnaah Pu Lalchhuanthanga Asst Leader Organising Committee chairman chuan a kaihruai a, Upa Liankhuma Sawleng Re Union Member chuan hunserh a hmang a ni. L Battalion Member boral ta mi 37-te dunna hun hman a ni bawk a, Pu Lalbiakthanga, Treasurer L Battalion Re-Union chuan lawmthu sawina hun a hmang a. Zanriah tuihnai tak kilhona neih a ni bawk.
Sd/-
(LALTHAKIMA)
Jt. Secretary
Media & Publicity Dept.
Mizo National Front
Memo No.MNF/Media/04/2023/736
Dt.10.06.2023.